""സ്ത്രീകളെ എന്തിനുകൊള്ളാം, പ്രസവിക്കാനല്ലാതെ'' എന്ന സുന്നി നേതാവ് കാന്തപുരം അബൂബക്കര് മുസലിയാരുടെ ആക്ഷേപം കേരളത്തിലെ മുസ്ലിംവനിതകള് ഉള്പ്പെടെയുള്ളവരെ അരിശം കൊള്ളിക്കുന്നതിനിടയില് വരുന്നു നോര്ത്തേണ് അയര്ലന്ഡില് നിന്നൊരു വാര്ത്ത. "" സ്ത്രീകളെ ഞങ്ങള്ക്കുവേണം, സ്ത്രീയായതുകൊണ്ടല്ല, സ്നേഹത്തിന്റെയും സേവനത്തിന്റെയും പര്യായമായതുകൊണ്ട്'' അവിടത്തെ ആന്ട്രിം എന്ന കൊച്ചുപട്ടണത്തിലെ ആളുകള് പണം പിരിച്ചു, മറുനാട്ടുകാരിയായ സുബി ഫിലിപ്പിനു ഒരു പുതുപുത്തന് കാറുവാങ്ങികൊടുക്കാന്.
മണിമലക്കാരിയായ സുബി 11 വര്ഷമായി ആന്ട്രിമിലെ ജനറല് ആശുപത്രിയില് ഹൃദ്രോഹവിഭാഗത്തില് നഴ്സാണ്. കാറുവാങ്ങിക്കൊടുക്കാന് കാരണമുണ്ട്. ഇക്കഴിഞ്ഞ ദിവസം വിദ്വേഷികള് പെട്രോള്ബോംബെറിഞ്ഞ് അവരുടെ ഒരുവര്ഷം പഴക്കമുള്ള കാര് തീവച്ചു നശിപ്പിച്ചു, വീടിനും കേടുപാടുവരുത്തി.
ഭര്ത്താവ് ഷിജോ ജയിംസ് കുര്യന് പിതാവ് അത്യാസന്നനിലയിലാണെന്നറിഞ്ഞു നാട്ടിലേക്കുപോയ തക്കം നോക്കിയായിരുന്നു ആക്രമണം. സുബിയും എട്ടുംപത്തും വയസ്സുള്ള രണ്ടുപെണ്മക്കളും ഉറങ്ങിക്കിടക്കുമ്പോള് കൊച്ചുവെളുപ്പാന് കാലത്തു പൊട്ടിത്തെറിയുടെ ശബ്ദം കേട്ടു സുബി ഞെട്ടിയെണീറ്റപ്പോള് കാറും വീടിന്റെ ഒരറ്റവും അഗ്നിക്കിരയായതാണു കണ്ടത്.
നേരം വെളുക്കുംമുമ്പേ ആന്ട്രിമിലെ നാട്ടുകാര് ഓടി കൂടി. ധാരാളം മലയാളികളും അവിടത്തെ മേയറും കൗണ്സിലര്മാരായ ജോണാതന്മക്കാര്ത്തിയും മൈക്കള് വില്ക്കിന്സനും മുന്കൈയെടുത്തു ധനശേഖരം തുടങ്ങി. അയ്യായിരം പൗണ്ട് (അഞ്ചുലക്ഷം രൂപ) യാണു ലക്ഷ്യമിട്ടതെങ്കിലും മണിക്കൂറുകള്കൊണ്ട് 6823 പൗണ്ട് ശേഖരിച്ചു. പത്തു മുതല് 50 പൗണ്ട് വരെ സംഭാവന ചെയ്തവരുണ്ട്.
അയര്ലന്ഡ് ബ്രിട്ടനുതൊട്ടു ചേര്ന്നുകിടക്കുന്ന വലിയൊരു ദ്വീപാണ്. അതില് നോര്ത്തേണ് അയര്ലന്ഡ് വടക്കേ അറ്റത്താണ്. അതു ബ്രിട്ടന്റെ പ്രവിശ്യയാണ്. പാര്ലമെന്റില് പ്രതിനിധിയുമുണ്ട്. ബെല്ഫാസ്റ്റാണ് പ്രവിശ്യാതലസ്ഥാനം. അവിടെ നിന്നു 28 കിലോമീറ്റര് അടുത്താണു ആന്ട്രിം. ബെല്ഫാസ്റ്റ് ഇന്റര്നാഷണല് എയര്പോര്ട്ട് 8 കിലോമീറ്റര് അടുത്ത്.
മലയും താഴ്വരയും കടലും ചേര്ന്ന മനോഹരഭൂമിയാണു അവിടം. ആന്ട്രിം ആകട്ടെ സിക്സ് മൈല് വാട്ടര് എന്ന തടാകക്കരയിലും. ആറുലക്ഷമാണ് ജനസംഖ്യ. അറുപതുപേരുണ്ട് മലയാളികള്.
""ഞങ്ങള് അറുപതേ ഉള്ളുവെങ്കിലും ഓണവും ക്രിസ്മസും തകര്ത്താഘോഷിക്കും.'' - മലയാള സമാജം പ്രസിഡന്റ് കടുത്തുരുത്തി സ്വദേശി ചെറിയാന് സ്കറിയ ഫോണില് അറിയിച്ചു. നാട്ടുകാര്ക്കും വലിയ കാര്യം. അവരുടെ സ്നേഹാദരവുകളുടെ അര്ച്ചനാപുഷ്പമായാണല്ലോ മണിക്കൂറുകള് കൊണ്ടുനടന്ന ധനശേഖരണം.''
ഷിജോ ജയിംസ് കുര്യന് പിതാവിന്റെ അടക്കം കഴിഞ്ഞു ഇന്നലെ രാത്രി എത്തിയതേയുള്ളൂ. സമാജത്തിന്റെ മുന്പ്രസിഡന്റ് കൂടിയാണു ഷിജോ. പിതാവിന്റെ അടക്കംനടക്കുമ്പോഴായിരുന്നു ആന്ട്രിമിലെ അക്രമം. പക്ഷെ നാട്ടുകാര് സ്നേഹാദരവുകൊണ്ട് സുബിയെയും ഷിജോയെയും പെണ്മക്കളായ ടാനിയയെയും, മോണിക്കയെയും ആശ്വസിപ്പിച്ചു.
സുബി ഫിലിപ്പും കത്തിയകാറും
ജനപ്രതിനിധിയുടെ സാന്ത്വനം
ആന്ട്രിമിലെ മലയാളി സപ്പോര്ട്ട്
മനോഹരഭൂമി
ആന്ട്രിമിലെ ഫുട്ബോള് കമ്പം