അടിയന്തര വിഷയങ്ങളിലേക്ക് സമൂഹ മനസാക്ഷിയുടെ ശ്രദ്ധ ക്ഷണിക്കുന്ന
മോഹന്ലാലിന്റെ ബ്ലോഗ് കുറിപ്പുകള് അഥവാ തുറന്ന കത്തുകള് മലയാള സമൂഹം
തീര്ച്ചയായും വായിച്ചിരിക്കേണ്ട കാര്യങ്ങളാണ്. രാഷ്ട്രീയപാര്ട്ടികളും
മതസംഘടനകളും നടത്തുന്ന ജാഥകളും പ്രകടനങ്ങളും സാധാരണക്കാരന്റെ വഴി
തടയുകയും സഞ്ചാര സ്വാതന്ത്ര്യത്തെ ഹനിക്കുകയും ചെയ്യുന്നു എന്നതാണ്
മോഹന്ലാലിന്റെ ഏറ്റവും പുതിയ ബ്ലോഗ് കുറിപ്പ്. കേരളത്തിലെ റോഡില്
സഞ്ചരിക്കുന്ന ഏത് മലയാളിയും നേരിടുന്ന ഒരു പ്രശ്നം തന്നെയാണിത്. ഏതോ
രാഷ്ട്രീയ പാര്ട്ടിക്കളുടെ വഴിപാട് പോലുള്ള സമരത്തിനും ജാഥയ്ക്കും വേണ്ടി
അല്ലെങ്കില് ആരുടെയൊക്കെയോ മതത്തിന്റെയും ജാതിയുടെയും ഉപജീവന
ആഘോഷങ്ങള്ക്ക് വേണ്ടി സാധാരണക്കാരന് സഹിക്കണം. അവന്റെ അത്യാവശ്യങ്ങള്
മാറ്റിവെച്ച് വഴിയില് കിടക്കണം. മെയിന് റോഡുകള് ജാഥക്കാര്ക്ക്
മണിക്കൂറുകള് വിട്ടുകൊടുക്കണം.
ഇതിന് മുമ്പ് മാലിന്യ
പ്രശ്നമായിരുന്നു മോഹന്ലാലിന്റെ ബ്ലോഗ് കുറിപ്പിലെ ഒരു വിഷയം. ടി പി
ചന്ദ്രശേഖരന് വധവും, കേരളത്തിലെ അപകടകരമായ ഡ്രൈവിംഗും, അമ്മമാരെ
തെരുവില് ഉപേക്ഷിക്കുന്ന പുതിയ തലമുറയും അങ്ങനെ പല വിഷയങ്ങളും കടന്നു
വന്നിട്ടുണ്ട് ലാലിന്റെ ബ്ലോഗില്. അടുത്തിടെ ആദിവവാസികള് നേരിടുന്ന
പ്രശ്നങ്ങള് ബ്ലോഗില് ലാല് എഴുതിയത് വലിയ ചര്ച്ചയായിരുന്നു. ഒരു
താരത്തിന്റെ പക്ഷത്ത് നിന്നുകൊണ്ടല്ല ഈ കത്തുകള് ലാല് എഴുതുന്നത്. മറിച്ച്
ഒരു കലാകാരന്റെയും പൗരന്റെയും പക്ഷത്ത് നിന്നുകൊണ്ടാണ് എഴുതുന്നത് എന്നതും
സവിശേഷതയുള്ള കാര്യമാണ്. അതില് മിക്കവയും മധ്യവര്ത്തി മലയാളി പുരുഷനെ
അസ്വസ്ഥപ്പെടുത്തുന്ന വിഷയങ്ങളുമാണ്.
മോഹന്ലാലിന്
കേരളത്തിലുള്ള സ്പെയിസ് തന്നെയാണ് അദ്ദേഹത്തിന്റെ കുറിപ്പുകളെ
ശ്രദ്ധേയമാക്കുന്നത് എന്നതില് സംശയമില്ല. ലാല് എന്ന സൂപ്പര്
താരത്തിന്റെ സ്പെയിസില് നിന്നുകൊണ്ട് ഈ സാമൂഹിക വിഷയങ്ങളൊക്കെ ലാല്
ഉന്നയിക്കുന്നത് അഭിനന്ദാര്ഹവുമാണ്. കാരണം ഇവയില് പലതും
ഭരണകൂടത്തോടുള്ള ഓര്മ്മപ്പെടുത്തലുകളാണ്. നിര്ദ്ദേശങ്ങളാണ്.
പ്രധാനപ്പെട്ടയൊരു വ്യക്തി ഇത് വിളിച്ചു പറയുമ്പോള് ഉണ്ടാകുന്ന കരുത്ത്
വളരെ വലുതാണ്. താരങ്ങള് ഇത്തരം സാമൂഹിക ഇടപെടലുകള് നടത്തുകയും വേണം.
ഒരിക്കല് ജപ്പാനില് പോയ മോഹന്ലാല് അവിടെയുള്ള ഗവണ്മെന്റ്
ഉദ്യോഗസ്ഥരുടെ ജോലിയുള്ള അര്പണബോധം കണ്ട് അതിനെ നമ്മുടെ നാടുമായി
താരതമ്യം ചെയ്യുന്ന ഒരു ബ്ലോഗ് കുറിപ്പുണ്ട്. നമ്മുടെ നാട്ടില് ഒരു കാര്യം
നടത്തിക്കിട്ടാന് എത്ര കാലം വേണമെന്നാണ് ലാല് ചോദിക്കുന്നത്. സമരവും
വിവാദവും പണിമുടക്കുമല്ലാതെ നമ്മുടെ നാട്ടിലെത്തുണ്ട് എന്ന ചോദ്യവും
മുമ്പോട്ടു വെക്കുന്നു. ലാലിന്റെ നിരിക്ഷണം ഒരു പരിധിവരെ ശരിയമായിരിക്കാം.
എന്നാല് ഇതുപോലെ സമൂഹത്തിലെ പ്രശ്നങ്ങളില്, അതായത് സമൂഹത്തിന്റെ
തെറ്റായ പോക്കിലും പലപ്പോഴും ഭരണകൂടത്തിന്റെ അനാസ്ഥയിലുമൊക്കെ
പ്രതികരിക്കുന്ന മോഹന്ലാല് സ്വന്തം കാര്യത്തില് ഈ പ്രതികരണങ്ങളെ എങ്ങനെ
കാണുന്നു എന്നതാണ് ചോദ്യം.
ആഹാ അതിനിപ്പോ മോഹന്ലാലിനെന്താ കുഴപ്പം എന്ന
മറുചോദ്യം അവിടെ നില്ക്കട്ടെ. എണ്ണിയെണ്ണി കുറച്ച് കാര്യങ്ങള് പറയാം.
തമിഴ്, തെലുങ്ക്, ഹിന്ദി സിനിമകളെ വെച്ച് നോക്കുമ്പോള് താരതമ്യേന
തീര്ത്തും ചെറുതായ മലയാള സിനിമയിലെ സൂപ്പര്താരങ്ങള് ഇത്രയും ഭീമമായ
പ്രതിഫലം വാങ്ങുന്നത് ശരിയാണോ?
സൂപ്പര്താരങ്ങളുടെ പ്രതിഫലമാണ്
മലയാള സിനിമയുടെ ഏറ്റവും വലിയ പ്രതിസന്ധിയെന്ന് പ്രൊഡ്യൂസര്
അസോസിയേഷന് നാള്ക്കുനാള് പരാതി പറഞ്ഞിട്ടും അതില് ഒന്നാമനായ താങ്കള്
എന്താണ് അല്പമെങ്കിലും പ്രതിഫലം കുറയ്ക്കാത്തത്.
പോകട്ടെ, സിനിമ
വിജയിക്കുമ്പോള് ഉയര്ത്തുന്ന പ്രതിഫലം സിനിമകള് തുടര്ച്ചയായി
പരാജയപ്പെടുമ്പോഴെങ്കിലും
കുറയ്ക്കേണ്ടതല്ലേ?
ഉത്തരവാദിത്വപ്പെട്ട കലാകാരനായ താങ്കള്
സമീപകാലത്ത് അഭിനയിച്ച മിക്ക സിനിമകളും പരാജയപ്പെട്ടു എന്നത്
യഥാര്ഥ്യമാണല്ലോ. മിസ്റ്റര് ഫ്രോഡ് മുതല് ലൈലാ ഓ ലൈലാ വരെ എത്ര
ഉദാഹരണങ്ങള്. സിനിമകളിങ്ങനെ ചവറ് പോലെ അഭിനയിച്ചു കൂട്ടുമ്പോള്
തിരഞ്ഞെടുക്കുന്ന തിരക്കഥയുടെ ക്വാളിറ്റി വിലയിരുത്താനുള്ള മിനിമം
പ്രൊഫഷണലിസമെങ്കിലും കാണിക്കേണ്ടതല്ലേ?
ശരി. സിനിമയുടെ കാര്യം
പോകട്ടെ. സിനിമയ്ക്ക് പുറത്തുള്ള കാര്യങ്ങളിലേക്ക് നോക്കാം.
താങ്കള്
അഭിനയിക്കുന്ന പരസ്യങ്ങളുടെ ലിസ്റ്റ് നോക്കു. കണ്ണില് കണ്ട
സകലകുണ്ടാമണ്ടികളുടെയും ബ്രാന്റ് അംബാസിഡറാണ് താങ്കള്.
സ്വര്ണക്കടയുടെ കാര്യമെടുക്കാം. വിവാഹമെന്നാല് സ്വര്ണ്ണത്തില്
കുളിക്കണം എന്ന ലൈനിലുള്ള പരസ്യങ്ങളാണ് താങ്കള് സ്വന്തം മുഖം വെച്ച്
പ്രമോട്ട് ചെയ്യുന്നത്. ഏറിയ പങ്കും സാധാരണക്കാരുള്ള കേരളത്തില് ഈ
സ്വര്ണ്ണക്കൊതി പ്രമോട്ട് ചെയ്യുന്നത് തീര്ത്തും പ്രതിലോമകരമായ ഒരു
കാര്യമല്ലേ?
കുറച്ചുകാലം മുമ്പ് മദ്യത്തിന്റെ പരസ്യത്തില് വരെ
അഭിനയിച്ച് കാശ് വാങ്ങിയ താരമാണ് താങ്കള്. അതിന് മറുപടിയായി താങ്കള് പറഞ്ഞ്
ആ പരസ്യത്തിന്റെ സര്ഗസൃഷ്ടിയാണ് അതില് മുഖം കാണിക്കാന് പ്രേരിപ്പിച്ചത്
എന്നാണ്. ആമ്പോ... കേള്ക്കുമ്പോള് എന്തൊരു നിഷ്കളങ്കന്. മോഹന്ലാലിന്
സര്ഗസൃഷ്ടി പ്രകടിപ്പിക്കാന് കള്ളുകമ്പിനിയുടെ പരസ്യം തന്നെ വേണമല്ലോ.
കഷ്ടം.
പിന്ന ആനക്കൊമ്പ്, ഇന്കം ടാക്സ് അങ്ങനെ ആരോപണങ്ങളും
ഗോസിപ്പുകളും വേറെ.
എല്ലാം പോകട്ടെ. വിട്ടു കളയാം. പക്ഷെ മണ്മറഞ്ഞു
പോയെങ്കിലും ആ പാവം തിലകന് ചേട്ടന്റെ കാര്യം അങ്ങനെ മറക്കാന് പറ്റുമോ.
സൂപ്പര്താരങ്ങളെ എന്തോ കുറ്റം പറഞ്ഞുവെന്ന് പറഞ്ഞ് ഒരു കലാകാരനെ
സിനിമയില് അഭിനയിക്കുന്നതില് നിന്നു വരെ വിലക്കിയ പരിപാടിക്ക്
പരസ്യമായി പക്ഷം ചേര്ന്ന വ്യക്തിയാണ് താങ്കള്. അത് മറന്നു പോയോ?
ഒരു
താരം എന്ന നിലയിലും കലാകാരന് എന്ന നിലയിലും താങ്കള്ക്ക് വലിയ പ്രശ്നമൊന്നും
കൂടാതെ പരിഹരിക്കാവുന്ന ചില കാര്യങ്ങളാണ് മേല്
സൂചിപ്പിച്ചിരിക്കുന്നത്. താങ്കളുടെ മനസിന്റെ ഒരു തീരുമാനം മാത്രം
മതിയാകും വലിയ ചലനങ്ങളുണ്ടാക്കാന്. അതായത് ഇനി നല്ല തിരക്കഥകള്
വായിച്ച് സെലക്ടീവാകാം. പ്രതിഫലം കുറച്ച് നിര്മ്മാതാക്കളുടെ ഭാരം
കുറയ്ക്കാം. സ്വര്ണ്ണക്കടയുടെ പരസ്യത്തില് നിന്ന് പിന്മാറാം. ഏറ്റവും
കുറഞ്ഞത് തിലകന് ചേട്ടനോട് മാപ്പു ചോദിച്ച് ഇനിയെങ്കിലുമൊരു ബ്ലോഗ്
കുറിപ്പ് എഴുതാം. എഴുതുമെന്ന് പ്രതീക്ഷിക്കുന്നു.