വയനാട്ടിലെ അവസാന കാഴ്ചകളിലൊന്നായിരുന്നു ബാണാസുരസാഗര്.
അണക്കെട്ടിന്റെ തീരത്ത് ഒരു റിസോര്ട്ട്. അവിടെ ചെന്നപ്പോള് വളരെ ചെറിയ
ഹോംസ്റ്റേ ആണെന്നാണു കരുതിയത്. റിസപ്ഷനില് നില്ക്കുമ്പോള് അബദ്ധമായി
പോയോയെന്നു സംശയിച്ചെങ്കിലും ഉള്ളിലേക്ക് കയറിയപ്പോള് കോട്ടയം അയ്യപ്പാസ്
പോലെ തോന്നി. പുറത്തു നിന്നു നേക്കിയാല് ചെറിയകട, അകത്തു കയറിയാല വിശാലമായ
അകത്തളം. അതു തന്നെ സംഭവിച്ചു. ലഭിച്ച മുറിയുടെ ബെഡ് റൂമില് നിന്നു
കര്ട്ടന് വലിച്ചു മാറ്റിയപ്പോള് ശരിക്കും അത്ഭുതപ്പെട്ടു പോയി.
പുറത്തേക്കുള്ള ബാല്ക്കണിയില് നിന്നും നീട്ടിത്തുപ്പിയാല് ചെന്നു
വീഴുന്നത് അണക്കെട്ടിലേക്ക്. ദൂരെ ചെറിയൊരു ദ്വീപ്. അതിനപ്പുറത്ത്,
വയനാടന് മലനിരകള്. കബിനി നദിയുടെ പോഷകനദിയായ കരമനത്തോടിനു
കുറുകെയാണ് ബാണാസുര സാഗര് അണക്കെട്ട്. 1979ലാണ് ഇതു
നിര്മ്മിച്ചത്. കക്കയം ജല വൈദ്യുത പദ്ധതിക്ക് ജലം എത്തിക്കുക
എന്നതും വരണ്ട കാലാവസ്ഥയുള്ള ഈ പ്രദേശത്ത് ജലസേചനം, കുടിവെള്ളം
എന്നിവ എത്തിക്കുക എന്നതുമാണ് ഈ പദ്ധതിയുടെ ലക്ഷ്യങ്ങള്. എന്നാല്
ഇതൊന്നുമല്ല, ഇതിന്റെ വിശേഷങ്ങള്. ഇന്ത്യയിലെ ഏറ്റവും വലിയ
മണ്ണുകൊണ്ടുള്ള അണക്കെട്ടും ഏഷ്യയിലെ രണ്ടാമത്തെ വലിയ
അണക്കെട്ടും ആണിത്. കണ്ടാല് തോന്നുകയേയില്ല.
അണക്കെട്ട്
പദ്ധതി പ്രദേശത്തുള്ള സ്ഥലങ്ങളെ വെള്ളത്തിന് അടിയില്
ആഴ്ത്തിയപ്പോള് ഇവിടെ അണക്കെട്ട് പദ്ധതി പ്രദേശത്ത് ഏതാനും
ദ്വീപുകള് രൂപപ്പെട്ടു. അങ്ങനെയാണത്രേ, ഇവിടം വിനോദസഞ്ചാര
ഭൂപടത്തിലേയ്ക്കു ഒരുങ്ങിയെത്തിയത്. ഇന്ന് സഞ്ചാരികളുടെ
പറുദീസയാണിവിടം. ഞാനതിനെക്കുറിച്ച് വിശദമായി നെറ്റില് നിന്നും
വായിച്ചിരുന്നു. ഈ റിസോര്ട്ടിന്റെ ബ്രോഷറിലും നല്ല ഭംഗിയായി തന്നെ ഈ
വിശദീകരണം നല്കിയിട്ടുണ്ട്. ഓളപ്പരപ്പുകളും ചെറുദ്വീപുകളും
അതിനു അഭിമുഖമായി നില്ക്കുന്ന ബാണാസുരമലയും ശരിക്കും മനം കവരുക
തന്നെ ചെയ്യുന്നുണ്ട്. ഞാന് ഒരു ചായ ഉണ്ടാക്കി നുകര്ന്നു കൊണ്ട്
ബാല്ക്കണിയിലെ കസേരയിലിരുന്നു. ഏഷ്യയിലെ രണ്ടാമത്തെ വലിയ മണ്
അണക്കെട്ട്. അതിനു നേര്ക്കു നേരെയാണ് ഞാനിപ്പോള് എന്നത് വാസ്തവത്തില്
അത്ഭുതപ്പെടുത്തുക തന്നെ ചെയ്തു. ഇവിടെയിങ്ങനെ റിസോര്ട്ട് നിര്മ്മിക്കാമോ
എന്നൊക്കെ റൂം ബോയി ആയി എത്തിയ ചെറുപ്പക്കാരനോട് ചോദിച്ചെങ്കിലും അയാള് ചെറു
ചിരിയോടെ സ്ഥലം വിട്ടു.
യാത്രാക്ഷീണം ഉണ്ടായിരുന്നു. ഡയറി എഴുതി.
ഭക്ഷണം റൂമിലേക്ക് വരുത്തി. നേരത്തെ കിടന്നു. മൊബൈലിനു റേഞ്ചില്ല. ഭാഗ്യം.
ആരുടെയും ശല്യമില്ലാതെ കിടന്നുറങ്ങാം. നേരത്തെ വിളിച്ചുണര്ത്തണമെന്നു
റിസപ്ഷനില് പറഞ്ഞ് ഏര്പ്പാടാക്കി. രാവിലെ നല്ല തണുപ്പുണ്ടായിരുന്നു.
മൂടല് മഞ്ഞ് പ്രകൃതിയെ പുതപ്പണിയിച്ച് നില്ക്കുന്നു. അണക്കെട്ട് കാണാന്
പോവുകയാണ്. റിസോര്ട്ട് നിന്നുള്ള വണ്ടി റെഡിയായി നില്പ്പുണ്ടായിരുന്നു.
കോഴിക്കോട് നിന്ന് വരുകയാണെങ്കില് വൈത്തിരിയില് ഇടത്തേയ്ക്കു
തിരിഞ്ഞ് തരുവണയ്ക്കുള്ള വഴിയിലൂടെ ഏതാണ്ട് 25 കിലോമീറ്റര്
സഞ്ചരിച്ചാല് ബാണാസുരസാഗര് അണക്കെട്ടില് എത്താം.
പടിഞ്ഞാറത്തറയാണ് അടുത്തുള്ള പ്രമുഖ സ്ഥലം. ഞങ്ങള് യാത്ര
തിരിച്ചിട്ട് അധികം വൈകിയില്ല, മൂന്നു കിലോമീറ്ററോളം പിന്നിട്ടു കാണും.
നോക്കുമ്പോള് റോഡിന് സമാന്തരമായി നീണ്ടുകിടക്കുന്ന അണക്കെട്ട്.
ബോട്ടുയാത്രയെക്കുറിച്ചുള്ള ബോര്ഡ് മുന്നില് കാണാം. ഇതു
തുടങ്ങിയതോടെയാണ് ഇവിടുത്തെ സാധ്യതകള് സഞ്ചാരികള്
തിരിച്ചറിഞ്ഞത്. ഓളപരപ്പുകളിലൂടെ ബോട്ടില് മുന്നേറുമ്പോള്
അകലങ്ങളില് അനേകം തുരുത്തുകളും അവയോടു ചേര്ന്നുള്ള
കാനനക്കാഴ്ചകളും തേക്കടിയെയാണ് ഓര്മ്മിപ്പിച്ചത്. എന്നാല്,
തേക്കടിയുടേതു പോലെ ഇടയ്ക്കിടെ മരക്കുറ്റികളും അവയില് പക്ഷികളുടെ നീണ്ട
നിരയുമൊന്നും ഇവിടെ കാണാനുമായില്ല.
പ്രകൃതി സന്തുലിത വിനോദ
സഞ്ചാരത്തിന്റെ മനോഹര ദൃശ്യമാണ് ബാണാസുര സാഗറിന്റെ മുഖമെന്നു
പറയാം. ഞാന് ആ പ്രകൃതിയെ ക്യാമറയ്ക്കുള്ളിലാക്കി. ഡാമിന് താഴെ ഒന്ന്
രണ്ടു പെട്ടികടകള്. പലയിടത്തും തേനില് ചാലിച്ച നെല്ലിക്ക
കണ്ണാടികുപ്പികള്ക്കുള്ളില് കണ്ടു. ആ കടകള്ക്കടുത്തായി
അണക്കെട്ടിലേക്കുള്ള പ്രവേശനടിക്കറ്റ് കൊടുക്കുന്ന സ്ഥലം.
വേണമെങ്കില് അണക്കെട്ടിന്റെ വശത്തുള്ള പടവുകളിലൂടെ
മുകളിലേക്ക് നടന്നുകയറാം. അതിനു പ്രയാസമുള്ളവര്ക്ക് മറ്റൊരു
വഴിയിലൂടെ ജീപ്പിലും പോകാം, പ്രത്യേകം ടിക്കറ്റ് എടുക്കണമെന്ന്
മാത്രം. ഞങ്ങള് ജീപ്പിലാക്കി യാത്ര. അണക്കെട്ടിനു മുകളിലൂടെ
സഞ്ചരിച്ച് അത് നമ്മളെ മറുകരയില് എത്തിക്കുന്നു. അവിടെ ചെറിയ
പാര്ക്കോ പൂന്തോട്ടമോ എന്നപോലെ ചില നിര്മ്മതികള് കണ്ടു.
സ്വാഭാവികത മാത്രം മുതല്ക്കൂട്ടാവുന്ന ചോലവനങ്ങളും മലനിരകളും
ജൈവ മേഖലകളുമാണ് ഇവിടത്തെ പ്രത്യേകതയെന്ന് അവിടെ കണ്ടു പരിചയിച്ച
ജോസഫ് ചേട്ടന് പറഞ്ഞു. ആവശ്യത്തിന് ഗാര്ഡുകളൊന്നും ഇവിടയില്ല. അതു കൊണ്ട്
തന്നെ അപകടങ്ങള് ഏറെയും ഉണ്ടാകുന്നുണ്ട്. പലരും വെള്ളത്തില്
കുളിക്കാനിറങ്ങി ആഴത്തിലേക്ക് കൂപ്പുകുത്തുന്നു. കാട്ടാനകള്
സൈ്വരവിഹാരം നടത്തുന്ന താഴ്വാരങ്ങള് ഉയര്ത്തുന്ന സാഹസികതകള്
വേറെ. ഇപ്പോള് ന്യൂജെന് പിള്ളേരൊന്നും പറയുന്നത് കേള്ക്കാറില്ലെന്നും അത്
അപകടനിരക്ക് കൂട്ടുന്നുണ്ടെന്നും ജോസഫ് ചേട്ടന് പറഞ്ഞു.
ഹൈഡല്
ടൂറിസമാണ് ഇവിടെ കാണാനാവുന്നത്. കഴുത്തിനൊപ്പം മുങ്ങിനില്ക്കുന്ന
കുന്നിനു മുകളില് ഹെറിറ്റേജ് വീടുകള് നിര്മിക്കുന്നതും
തുരുത്തുകളിലേയ്ക്കു റോപ്പ്വേ സൗകര്യം ഏര്പ്പെടുത്തുന്നതും
പരിഗണിക്കുന്നുണ്ടത്രേ. ഇനി അടുത്ത തവണ വരുമ്പോ ഇവിടെയുള്ള ഹൈഡല്
ടൂറിസത്തിന്റെ മുഖം തന്നെ മാറിയേക്കാമെന്നു ജോസഫ് ചേട്ടന് ഒരു ചിരിയോടെ
പറഞ്ഞു. അന്നു നമ്മളൊക്കെ കാണുമോയെന്ന ആശങ്കയും അദ്ദേഹം പങ്കുവച്ചു.
നീലഗിരിയില് മാത്രം കണ്ടുവരുന്ന അനേകം സസ്യജാലങ്ങളുടെ
കലവറയാണ് ബാണാസുരന് കോട്ട. വെള്ളക്കുറിഞ്ഞി സമൃദ്ധമായി
വളരുന്ന അടിക്കാടുകളും ജൈവ സമ്പുഷ്ടതയുള്ള ഷോലെ വനങ്ങളും
കാണണമെങ്കില് ട്രക്കിങ്ങിന് കാടു കയറണം.
ഇന്ത്യയിലെ ഏറ്റവും
വലിയ മണല്ചിറയത്രേ ബാണാസുരസാഗര്. മറ്റു അണക്കെട്ടുകളുമായി
താരതമ്യം ചെയ്യുമ്പോള് തുലോം വ്യത്യസ്ഥമാണ് കാഴ്ചയില് തന്നെ ഈ
ഡാം. ഒരു വശത്തുനിന്ന് ചെളിമണല് ഭീമാകാരമായ രീതിയില്
ഉയര്ത്തിപ്പൊക്കി നദിയുടെ സ്വാഭാവികമായ ഒഴുക്കിനെ തടഞ്ഞു
നിര്ത്തിയിരിക്കുകയാണ് ഇവിടെ. കബനിയുടെ കൈവഴിയായ കരമനത്തോട്
പുഴയ്ക്കാണ് ഇവിടെവച്ച് അതിന്റെ സ്വാഭാവിക സഞ്ചാരം
അവസാനിപ്പിക്കേണ്ടി വന്നത്. കക്കയം ജലവൈദ്യുത പദ്ധതിക്കും
ജലസേചനത്തിനും ഒക്കെ ഇവിടെ നിന്നുള്ള വെള്ളം ഉപയോഗിക്കുന്നുണ്ട്.
പെന്സ്റ്റോക്ക് പൈപ്പുകള് ഒഴിവാക്കി ഭൂമിയില് വെട്ടിയ സ്വാഭാവിക
ചാലുകളിലൂടെയാണ് ജലം കൊണ്ടുപോകുന്നത്. സാധാരണ
അണക്കെട്ടുകളില് കാണുന്ന വലിയ കോണ്ക്രീറ്റ് പാളികള്
ഒഴിവാക്കിയും പെന്സ്റ്റോക്ക് പൈപ്പുകള് ഉപയോഗിക്കാതെയും
പരിസ്ഥിതി സൗഹൃദ നിര്മ്മാണം നടത്തിയിരിക്കുന്നത് ഒരു കൗതുകത്തോടെ
ഞാന് നോക്കി നിന്നു. അണക്കെട്ടില് നിന്നും അല്പ്പംമാറി
സ്ഥിതിചെയ്യുന്ന ഷട്ടറുകളുടെ ഭാഗത്ത് കോണ്ക്രീറ്റ് എടുപ്പുകള്
ജോസഫ് ചേട്ടന് എന്നെ കാട്ടിത്തന്നു. അധികം സന്ദര്ശകരൊന്നും ആ ഭാഗത്ത്
ഉണ്ടായിരുന്നില്ല. അതിനുമപ്പുറം ബോട്ടുജെട്ടി. രണ്ട് സ്പീഡ്
ബോട്ടുകള് വെള്ളത്തില് കിടന്ന് തലങ്ങും വിലങ്ങും ഹരിശ്രീ വരയ്ക്കുന്നു.
ജലാശയത്തിന്റെ പ്രതലത്തെ പിളര്ന്നു, ചെറുദ്വീപുകളുടെ ഇടയിലൂടെ
ബോട്ട് അകലേക്ക് അകലേക്ക് സഞ്ചരിച്ചു, കണ്ണില് നിന്നും മറഞ്ഞു പോയി.
ചുറ്റും മലകള് നിറഞ്ഞ കായലിന് നടുവില് മനുഷ്യമണമുള്ള
ഏകാന്തമായ ഒരു തുരുത്ത് പോലെ ബോട്ടിന്റെ മുരളിച്ച മാത്രം മലകളില്
തട്ടി പ്രതിധ്വനിക്കുന്നു...
അണക്കെട്ട് വരുന്നതിനു മുന്പ്
ഇവിടം കരയായിരുന്നുവെന്ന് ജോസഫ് ചേട്ടന് പറഞ്ഞു. ആള്
കുറവിലങ്ങാട്ട്കാരനാണ്. കുടിയേറിയതാണ്, വര്ഷമൊന്നും കൃത്യമായി
ഓര്ക്കുന്നില്ല. മനുഷ്യനും മൃഗങ്ങളും കിളികളും ജീവിച്ചിരുന്ന
അന്നത്തെ സ്ഥലമൊക്കെ ഇന്ന് വെള്ളത്തിനടിയിലാണ്. വെള്ളം കയറി ഇല്ലാതായ ഒരു
കവലയെ കുറിച്ച് ഗൃഹാതുരതയോടെ ജോസഫ് ചേട്ടന് ഓര്ത്തു. അവിടം ഈ
ജലാശത്തിനടിയിലെവിടെയോയാണ്. ഞാന് കുറച്ചു സമയം കൂടി അവിടെ
ചെലവഴിച്ചു. വെയില് മൂത്തു തുടങ്ങിയപ്പോള് ജോസഫ് ചേട്ടനോടു നന്ദി പറഞ്ഞു
റിസോര്ട്ടിലേക്ക് തിരിച്ചു. കഥയും കാലവും പ്രകൃതിയും പങ്കിട്ട ചില നല്ല
നിമിഷങ്ങള്. ജലവും മണ്ണും കാടും പ്രകൃതിയുമൊക്കെ ചേര്ന്ന് വയനാടിനു
നല്കിയിരിക്കുന്ന ലാസ്യത മറ്റ് എവിടെയും കണികാണാനാവില്ലെന്നു തോന്നി.
റിസോര്ട്ടില് സുഖശീതളിമയില് ഭക്ഷാണാനന്തരം മയങ്ങിയപ്പോള് ഞാന്
കേരളം എന്ന സ്വര്ഗ്ഗത്തെക്കുറിച്ച് മാത്രമാണ് ചിന്തിച്ചത്. എത്ര
വൈവിധ്യങ്ങള് നിറഞ്ഞ അപൂര്വ്വ സുന്ദര സുരഭിലമായ സ്ഥലങ്ങള്. ഇതു പോലെ, ഈ
ഭൂമിയില് മറ്റൊരു ലോകമുണ്ടോ? ഇല്ല. ഇല്ല. ഇല്ല.
ഇവിടെ
എത്തിച്ചേരുവാന്
കോഴിക്കോട് നിന്ന് വരുകയാണെങ്കില്
വൈത്തിരിയില് ഇടത്തേയ്ക്കു തിരിഞ്ഞ് തരുവണയ്ക്കുള്ള വഴിയിലൂടെ
25 കിലോമീറ്റര്
പടിഞ്ഞാറത്തറയാണ് അടുത്തുള്ള പ്രമുഖ സ്ഥലം.
My Stay @ Banasura Hill Resort, Vellamunda, Wayanad, Kerala
670731
Phone: 04935 277 900
(തുടരും)