എന്നാ പറയാനാ, മര്യാദയ്ക്കുള്ള രാവിലത്തെ ഒരു കാപ്പി കുടി മുട്ടിക്കുന്ന
ലക്ഷണമാണ് കാണുന്നത്. ഒരു ശരാശരി അമേരിക്കക്കാരന്റെ ദൈനംദിന ജീവിതം
തുടങ്ങുന്നത് ഒരു കാപ്പി കുടിയില് നിന്നാണല്ലോ? അതിപ്പോ,
ജോലിയിലായാലും വെക്കേഷനായാലും വീട്ടിലായാലും അങ്ങനെ തന്നെ. കാപ്പി
വിട്ടൊരു കളിയില്ല, മക്കളേ ! അമേരിക്കയിലേക്ക് ചേക്കേറിയിരിക്കുന്ന
മലയാളികളുടെ കാര്യവും അങ്ങനെ തന്നെ. പുലര്കാലെ ഓഫീസിലേക്ക്
ഓടുമ്പോള് തന്നെ ഡങ്കിന് ഡോണെറ്റ്സ്, സ്റ്റാര് ബക്സ്, ബര്ഗര് കിങ്, മക്
ഡോണള്സില് നിന്നോ ഒരു വലിയ കപ്പ് കാപ്പിയും ബേഗളുമായി കാറിലെ പരിമിത
സൗകര്യത്തിലിരുന്ന് ആകാവുന്നിടത്തോളം അകത്താക്കുന്ന പതിവ് ഇന്നും
ഇന്നലെയും തുടങ്ങിയതല്ല. അതിന് കാലങ്ങളുടെ പഴക്കമുണ്ട്. അത്
ജീവിതരീതിയുമായി ഇണങ്ങിച്ചേര്ന്നു കഴിഞ്ഞു. രാവിലെ
സ്റ്റിയറിങ്ങില് പിടിച്ചു കൊണ്ട് നുണഞ്ഞിറങ്ങുന്ന ആ ചൂടു
കാപ്പിയുടെ സുഖം ഒരു പ്രത്യേകതയാണ്. അതിന്റെ ത്രില്ല്
പറഞ്ഞറിയിക്കാനും മേലാ. ആ കാപ്പിക്കാണ് ഇപ്പോള് ബ്രേക്ക് വീഴാന്
പോകുന്നത്. വണ്ടിയോടിച്ചു കൊണ്ടുള്ള കാപ്പി കുടി നിരോധിക്കാന്
ആലോചിക്കുന്നു. ഞെട്ടിയോ? ഇല്ലെങ്കില് ശരിക്കും ഞെട്ടിക്കോ.
പുലര്കാലെ മണിക്കൂറുകള് നീളുന്ന ഡ്രൈവിലെ എനര്ജി ഡ്രിങ്ക്
ഉപേക്ഷിക്കാന് കുറഞ്ഞപക്ഷം ന്യൂജേഴ്സിയിലെ മഹാന്മാരും മഹതികളും
തയ്യാറെടുത്തോളൂ.
ന്യൂജേഴ്സി സ്റ്റേറ്റ് അസംബ്ലി
ട്രാന്സ്പോര്ട്ടേഷന് കമ്മിറ്റി ഇക്കാര്യത്തില് വൈകാതെ തന്നെ
ഉറച്ച നിര്ദ്ദേശം പുറപ്പെടുവിക്കുമെന്നാണ് സൂചന.
സ്റ്റേറ്റ്സുകളില് ന്യൂജേഴ്സിയിലാണ് ഇത് ആദ്യമായി നടപ്പാക്കാന്
ഉദ്ദേശിക്കുന്നത്. മറ്റു പല കാര്യങ്ങളിലുമെന്നതു പോലെ ഇക്കാര്യത്തിലും
ന്യൂജേഴ്സി വാര്ത്തയിലിടം പിടിക്കുമെന്നുറപ്പായി. ഇതു സംബന്ധിച്ച
മാര്ഗ്ഗനിര്ദ്ദേശങ്ങളെക്കുറിച്ച് പഠിക്കാന് നിയോഗിച്ച കമ്മിറ്റി
വണ്ടിയോടിച്ചു കൊണ്ടുള്ള കാപ്പി കുടിക്ക് റെഡ് സിഗ്നല് കാണിക്കാനാണ്
നീക്കം. നാഷണല് ട്രാന്സ്പോര്ട്ടേഷന് സേഫ്റ്റി ബോര്ഡ്
ഇക്കാര്യത്തില് കഴിഞ്ഞ മാസം പുറപ്പെടുവിച്ച മാര്ഗ്ഗരേഖയാണ്
ഇത്തരമൊരു നീക്കത്തിനു ന്യൂജേഴ്സി സ്റ്റേറ്റിനെ
നിര്ബന്ധിച്ചതെന്നു കരുതുന്നു. വണ്ടിയോടിക്കുമ്പോള്
ഗാഡ്ജറ്റുകള് ഉപയോഗിക്കുകയും പത്രം വായിക്കുകയും മറ്റ് അനുബന്ധ
കലാപരിപാടികളില് ഏര്പ്പെടുകയും ചെയ്യുന്നതു മൂലം
വാഹനാപകടങ്ങള് കുത്തനെ ഉയര്ന്നിരുന്നു. ഇതിനു
നിരോധനമേര്പ്പെടുത്താന് ആലോചിക്കുന്നതിനിടെയാണ് ഈ
കാറ്റഗറിയിലേക്ക് കാപ്പി കുടിയേയും തിരുകി കയറ്റാനുള്ള
അധികൃതരുടെ ആലോചന.
വണ്ടിയോടിക്കുമ്പോള് യാതൊരു തരത്തിലുള്ള
മറ്റ് പരിപാടികളിലേക്കും ഡ്രൈവര് തിരിയാന് പാടില്ലെന്നും
ഇക്കാര്യത്തില് ഉറച്ച നിയമനിര്മ്മാണം തന്നെയാണ് നടത്താന്
പോകുന്നതെന്നും അസംബ്ലിമാന് ജോണ് വസ്നൂസ്കി
(ഡെമോക്രാറ്റ്-മിഡില്സെക്സ്) വ്യക്തമാക്കുന്നത് ടിവിയില് കാണിച്ചു
കൊണ്ടേയിരിക്കുന്നുണ്ട്. സുഹൃത്തുക്കളേ, ഇതു മാത്രമല്ല,
ഇക്കാര്യത്തില് പരസ്യമായി പൊതുജനങ്ങളില് നിന്ന്
അഭിപ്രായമറിയാനും അദ്ദേഹം ആഗ്രഹിക്കുന്നു. കാരണം, ഈ
കമ്മിറ്റിയുടെ ചെയര്മാന് അദ്ദേഹമാണ്. ബില് വൈകാതെ നിയമമാക്കി
മാറ്റും. കാര്യങ്ങളുടെ പോക്ക് കണ്ടിട്ട് അക്കാര്യത്തില് ആര്ക്കും
സംശയം വേണ്ട. അങ്ങനെ വന്നാല് ഡ്രൈവര് സീറ്റിലിരുന്നു കൊണ്ട്,
സ്റ്റിയറിങ്ങ് നിയന്ത്രിക്കുക മാത്രമാകും ഡ്രൈവറുടെ പണിയായി
നിജപ്പെടുത്തുന്നത്.
ഈ നിയമം നിലവില് വന്നാല്
ന്യൂജേഴ്സിയിലെ പൊതുജനങ്ങള് അംഗീകരിക്കേണ്ടി വരുന്ന ഏറ്റവും
ബുദ്ധിമുട്ടേറിയ ഗതാഗത നിയമമായിരിക്കും ഇതെന്നു സംശയമില്ല. നിയമം
തെറ്റിച്ചാല് 200 മുതല് 400 വരെ ഡോളര് പിഴ നല്കേണ്ടി വരും. രണ്ടാം
തവണയും ആവര്ത്തിച്ചാല് 400 മുതല് 600 വരെ ഡോളറാവും പിഴ. മൂന്നാം
തവണയും പിടിവീണാല് പിന്നെ അത് 800 ഡോളര് പിഴയും അടുത്ത 90
ദിവസത്തേക്ക് ലൈസന്സ് സസ്പെന്ഷനും സംഭവിക്കും. ഇതില് എന്തൊക്കെ
ചെയ്യാനാവും, ചെയ്യാതിരിക്കാനാവും എന്നൊക്കെ തീരുമാനിക്കുക
പോലീസാവും. അക്കാര്യത്തില് യാതൊരു മാറ്റവുമില്ല. അതു കൊണ്ട് കാപ്പി
കുടിയന്മാര് ശ്രദ്ധിക്കുക.
റേഡിയോയില് ടോക്ക് ഷോയും
നവമാധ്യമങ്ങളിലെ സജീവ ചര്ച്ചാ വിഷയമായും കാപ്പി കുടിയന്മാര്
മാറിക്കഴിഞ്ഞിട്ടുണ്ട്. ഡ്രൈവിങ് സീറ്റിലിരുന്ന് തിന്നുകയോ, കോഫി
നുണയുകയോ ചെയ്താല് ഫൈന് ടിക്കറ്റുകളുടെ എണ്ണം വര്ദ്ധിക്കുന്നത്
ഒട്ടും ആശ്വാസ്യമല്ലല്ലോ..
അടുത്ത ഗവര്ണര്
സ്ഥാനാര്ത്ഥിയാകാനിടയുള്ള ഡെമോക്രാറ്റിക്കുകാരനായ ജോണ്
വസ്നൂസ്കി ഒരു കാര്യം ഉറച്ചു പറയുന്നുണ്ട്- തങ്ങള് ടാര്ജറ്റ്
ചെയ്യുന്നത് കാപ്പി കുടിക്കാരേയല്ല. പിന്നെയോ, ഡ്രൈവിങ്
സീറ്റിലിരുന്ന് ന്യൂസ് പേപ്പര് വായിക്കുന്നവരെയും ഇലക്ട്രോണിക്സ്
ഗാഡ്ജറ്റുകള് ഓപ്പറേറ്റ് ചെയ്യുന്നവരെയുമാണ്. എന്നാല് നിയമം
എല്ലാവര്ക്കും ബാധകമാണല്ലോ. അതു കൊണ്ട് കാപ്പികുടിക്കുന്നവര്
പെട്ടു പോയെന്നേയുള്ളുവത്രേ. എന്തൊരു ന്യായം, അല്ലേ?
സീറ്റ്
ബെല്റ്റ് ബില്, സ്പീഡ് ലിമിറ്റ് ബില് പോലെ തന്നെ കാപ്പികുടിയും ഒരു
ബില്ലായി ഇറങ്ങാനിടയുണ്ടോയെന്ന് അദ്ദേഹത്തിന് ഉറപ്പില്ലെങ്കിലും
കൊണ്ടു വരാനിടയുള്ള നിയമ ആശയങ്ങളില് കാപ്പി കുടി
കടന്നുകൂടിയിട്ടുണ്ടെന്ന് അദ്ദേഹം ഉറപ്പിച്ചിട്ടുണ്ട്. വാഹന
അപകടങ്ങള് സംബന്ധിച്ച സ്റ്റേറ്റ് പോലീസ് അനാലിസ് നോക്കിയിട്ടല്ല
അദ്ദേഹം കാപ്പികുടിയന്മാരെ ഉപദ്രവിക്കുന്നതെന്നും അതു വരാന്
പോകുന്ന ഗവര്ണ്ണര് തെരഞ്ഞെടുപ്പ് ലക്ഷ്യമിട്ടാണെന്നും
അസൂയാലുക്കള് പറഞ്ഞു പരത്തുന്നുണ്ട്. എന്നാലും ഒരു കാര്യം വ്യക്തം- ഇല
വന്നു മുള്ളില് വീണാലും മുള്ള് വന്ന് ഇലയില് വീണാലും ദോഷം കാപ്പി
കുടിയന്മാര്ക്കു തന്നെയാണല്ലോ.