അതെ, സൂസമ്മ വളരുകയായിരുന്നു. ബാഹ്യമായ സൗന്ദര്യത്തില് മാത്രമല്ല,
പക്വമതിയായ ഒരു തരുണിമണി ആയി സൂസമ്മ മാറിയിരിക്കുന്നു. നേഴ്സിംഗ്
ട്രയിനിംഗിന്റെ അവസാനഘട്ടം. ആഡംബരപൂര്വ്വമായ ഗ്രാഡുവേഷന് സെറിമണി.
ഇപ്പോഴും സെലീനയും കൊച്ചുറാണിയും തന്നെയാണ് അവളുടെ ഏറ്റം അടത്ത
സുഹൃത്തുക്കള്. ഡ്യൂട്ടി സമയം ഒഴിച്ചുള്ള ജീവിതം അവര് ഒരുമിച്ചു
പങ്കിടുന്നു. ലൈബ്രറിയിലും ഊണുമുറിയിലും അവര് ഒന്നിച്ചാണ്.
മൂന്നുപേര്ക്കും അവരുടെ കുടുംബത്തിന്റെ പുരോഗതിയാണ് പ്രഥമലക്ഷ്യം.
സന്തോഷവും സന്താപവും പരസ്പരം പങ്കുവയ്ക്കുന്നവര്. ഗ്രാഡുവേഷനു വേണ്ടി
അണിഞ്ഞൊരുങ്ങിയ ആ മൂന്നു സുന്ദരികള് അഭിമാനപൂര്വ്വം പരസ്പരം ആലിംഗനം
ചെയ്തു. ഗ്രാഡുവേഷന് പാര്ട്ടിക്കു അവര്ക്കു മൂന്നുപേര്ക്കും കൂടി ഒരേ ഒരു
അതിഥി, സെലീനയുടെ അങ്കിള്. അദ്ദേഹം സെലീനയോടൊപ്പം അവളുടെ
കൂട്ടുകാരികളെയും ഹൃദയപൂര്വ്വം അഭിനന്ദിച്ചു.
ഇന്നു സൂസമ്മ
ഉദ്യോഗസ്ഥയാണ്. കൊക്കൂണില് നിന്നും പുറത്തുവന്ന ചിത്രശലഭംപോലെ
സുന്ദരിയായ സൂസമ്മ. അവളുടെ സ്വപ്നങ്ങള് പൂവണിഞ്ഞിരിക്കുന്നു. തന്റെ
കുടുംബത്തിന്, ഇച്ചാച്ചന് താങ്ങും തണലുമായി നിന്ന് കഴിയുന്നത്ര സഹായം
ചെയ്യണം. മേരിയെ ഒരു നല്ല നിലയില് എത്തിക്കണം. തന്റെ ലക്ഷ്യങ്ങള്
സഫലമാകണെ എന്നിവര് ഹൃദയപൂര്വ്വം
പ്രാര്ത്ഥിച്ചു.
ഉദ്യോഗസ്ഥയായി ആദ്യം കിട്ടിയ ശമ്പളത്തില്
തനിക്കത്യാവശ്യമായതുമാത്രം മാറ്റിവച്ച് ബാക്കി മുഴുവന് അവള്
ഇച്ചാച്ചനു മണിയോര്ഡര് അയച്ചു. തന്റെ ഓമനമകളുടെ പ്രയത്നഫലം
കൈപ്പറ്റിയപ്പോള് ആ പിതാവിന്റെ കണ്ണുകളില് നിന്നും ആനന്ദാശ്രുക്കള്
വര്ഷിച്ചു.
ശാന്തമായ ഒരു നദി പോലെ ജീവിതം ഒഴുകിക്കൊണ്ടിരുന്നു.
സൂസമ്മയുടെ മനസ്സില് പള്ളിപ്പുരയിടത്തില് താന് വളര്ന്ന വീടും
കഷ്ടപ്പാടിന്റെയും വിയര്പ്പിന്റെയും ഉടമയായ ഇച്ചാച്ചനും ഒപ്പം
പ്രായാധിക്യത്തിലേക്കു കാലൂന്നിക്കൊണ്ടിരിക്കുന്ന അമ്മച്ചിയും
താരുണ്യത്തിന്റെ പടിവാതില്ക്കലെത്തിനില്ക്കുന്ന അനുജത്തി മേരിയും
കുന്നിന്മുകളിലെ കൊച്ചുപള്ളിയും എല്ലാം നിറഞ്ഞുനിന്നു. അവരെ ഒക്കെ ഒന്നു
പോയിക്കാണണം. അവസാനം ഒരു തീരുമാനത്തിലെത്തി. അവധിയ്ക്കപേക്ഷിച്ചു.
രണ്ടാഴ്ച അവധി അനുവദിച്ചു കിട്ടി. ഉദ്യോഗസ്ഥയായ മകള് വരുന്നു. ആ
വൃദ്ധദമ്പതികളുടെ മനം കുളിര്ത്തു. ഒപ്പം ചേച്ചിയെക്കാണാന് കൊതിക്കുന്ന
മേരിയുടെയും. അവള് ഇച്ചാച്ചനോടാവശ്യപ്പെട്ടു. ""ഇച്ചാച്ചാ, ചേച്ചി
വരുമ്പോള് എനിക്ക് ഒരു പുതിയ സാരി കൊണ്ടുവരാന് എഴുതട്ടെ.'' അവളുടെ ഒരു
കൊച്ചാഗ്രഹം.
ഇച്ചാച്ചന്: ""വേണ്ട മോളെ, അവള് ഇതുവരെ കിട്ടിയ പണം
നമുക്കയച്ചുതന്നില്ലേ. അവളുടെ കൈയ്യില് മിച്ചം ഒന്നും കാണുകയില്ല.''
അതോടെ മേരി തന്റെ ആഗ്രഹം ഉപേക്ഷിച്ചു.
ഞായറാഴ്ച പ്രഭാതം. ഇച്ചാച്ചനും
അമ്മച്ചിയും മേരിയുമൊത്തു ദേവാലയത്തില് പോയി വന്നു. ഇന്നാണ് തങ്ങളുടെ
ഓമനമകള് വരുന്നത്. സാറാച്ചേടത്തി മകള്ക്കിഷ്ടമുള്ള വിഭവങ്ങളെല്ലാം
ഒരുക്കി. മേരിയും അടുക്കളയില് അമ്മച്ചിയെ സഹായിക്കുന്നതില്
ഉത്സാഹിച്ചു. സൂസമ്മയെ എതിരേല്ക്കാന് ഇച്ചാച്ചനോടൊപ്പം മേരിയും റെയില്വേ
സ്റ്റേഷനിലേക്കുപോയി. പതിവുപോലെ അരമണിക്കൂര് താമസിച്ചാണ് ട്രെയിന്
എത്തിയത്. വര്ണ്ണാഭമായ സല്വാര് കുര്ത്തയും ഷാളും അണിഞ്ഞ് തീവണ്ടിയില്
നിന്നിറങ്ങിയ ചേച്ചിയെ ആഹ്ലാദത്തോടെ മേരി ആശ്ലേഷിച്ചു. ആനന്ദക്കണ്ണീര്
പൊഴിച്ചുകൊണ്ട് ആ വൃദ്ധനായ പിതാവ് തന്റെ മകളെ തലയില് കൈവച്ച് അനുഗ്രഹിച്ചു.
പോര്ട്ടര് സൂസമ്മയുടെ ലഗേജ് അവരുടെ അടുത്തെത്തിച്ചു. ഹാന്ഡ് ബാഗു തുറന്ന്
പോര്ട്ടര് കൂലി കൊടുത്ത് സൂസമ്മ അയാളെ യാത്രയാക്കി.
ടാക്സിയില്
വന്നിറങ്ങിയ സൂസമ്മയെക്കാണാന് സാറാച്ചേടത്തിയോടൊപ്പം
നിഷ്ക്കളങ്കരായ, കൂലിപ്പണിക്കാരായ അയല്ക്കാരും കാത്തുനിന്നിരുന്നു.
സൂസമ്മ അമ്മച്ചിയെ ആലിംഗനം ചെയ്തു ചുംബിച്ചു. അയല്ക്കാരോടെല്ലാം
സ്നേഹപൂര്വ്വം സംസാരിച്ചു. അവള് കരുതിയിരുന്ന മിഠായി എല്ലാവര്ക്കും
സമ്മാനിച്ചു.
അയല്ക്കാര് പോയിക്കഴിഞ്ഞപ്പോള്, സൂസമ്മ തന്റെ
സൂട്ട്കേസ് തുറന്ന് മേരിക്ക് ഒരു സമ്മാനപ്പൊതി നല്കി. മേരിക്കേറ്റവും
ഇഷ്ടപ്പെട്ട നിറമുള്ള സാരി. അവള് സന്തോഷം കൊണ്ട് തുള്ളിച്ചാടി. ചേച്ചിയെ
കെട്ടിപ്പിടിച്ചു ചുംബിച്ചു. ഇച്ചാച്ചനും അമ്മച്ചിയ്ക്കും വേണ്ടി അവള്
കരുതിയിരുന്ന സാധനങ്ങളെല്ലാം കണ്ടപ്പോള് ആ വൃദ്ധമാതാപിതാക്കള്
വിങ്ങിപ്പൊട്ടി.
സൂസമ്മയെ ഇന്നത്തെ നിലയിലെത്തിക്കാന് സഹായിച്ച ആ
വന്ദ്യപുരോഹിതന് ഇതിനിടെ സ്ഥലം മറി പൊയ്ക്കഴിഞ്ഞിരുന്നു. സൂസമ്മ
മേരിയെയും കൂട്ടി ദേവാലയത്തിലേക്കു പോയി. തനിക്കു ലഭിച്ച എല്ലാ
അനുഗ്രഹങ്ങള്ക്കും അവള് തിരുമുമ്പാകെ മുട്ടുകുത്തി നന്ദി പറഞ്ഞു. തിരിച്ചു
വീട്ടിലെത്തിയ സഹോദരികള് സ്വാദിഷ്ടമായ അത്താഴം കഴിച്ച് പരസ്പരം ആലിംഗനം
ചെയ്തു കിടക്ക പൂകി.
(തുടരും)