ആറ്റുകാലമ്മേ,ഭഗവതീ, ഭാര്‍ഗവീ
ആറ്റുക ഞങ്ങടെ ദുഃഖമെല്ലാം!
ആയുരാരോഗ്യവും ഐശ്വര്യവും നല്‍കി
ആദ്യന്തം കാത്തുരക്ഷിക്കേണമേ!

നേടുന്നതൊന്നുംതന്‍സ്വന്തമക്ലെന്നുള്ള
നേരറിയുന്നില്ലമര്‍ത്യഗണം!
വിദ്യയും വേലയും വീടുമതുപോലെ
വിത്തവും നീതരും ഭിക്ഷയല്ലോ!

ജന്മങ്ങളില്‍വച്ചുസുശ്രേഷ്ഠമാം നര-
ജന്മമരുളിയദേവികേ നിന്‍
പത്മപാദങ്ങളതൊന്നുതാനാശ്രയം
പത്മാവതീ,പരമേശ്വരിയേ!

മോഹിതവസ്തുക്കള്‍ കാണുന്നമാത്രയില്‍
മോഹമെന്നുള്ളിലുദിക്കരുതേ!
നിത്യമല്ലാത്തക്ഷണികസുഖങ്ങളില്‍
നിത്യാംബികേ, മനം ചൂഴരുതേ!

മായതാന്‍ കാണുമീവസ്തുക്കളത്രയും
മായും മറയുമൊരുക്ഷണത്തില്‍!
ഭംഗിയെഴും മോഹവസ്തുക്കളില്‍, മോഹ-
ഭംഗവും ലീനമെന്നാരറിവൂ?

ചാരുവാം താരുകള്‍താനേയുതിരുന്ന
"പാരിജാത'' തരുവല്ലയോ  നീ!
ഭക്തിയാര്‍ന്നുള്‍ത്തടം കൊണ്ടു കുലുക്കിയാല്‍
വര്‍ഷിക്കും നീ കരുണാസുമങ്ങള്‍!

ബ്രഹ്മമെന്തന്നറിഞ്ഞീടാന്‍ത്രസിക്കുന്നു
കന്മഷം തീണ്ടാത്തചേതനകള്‍!
ബ്രഹ്മമെന്തന്നറിയില്ലെന്നതല്ലയോ
മര്‍മപ്രധാനമാം ബ്രഹ്മജ്ഞാനം!