മമ്മൂട്ടിയെ നായകനാക്കി നാദിര്‍ഷ ചിത്രം ഒരുക്കുന്നു എന്ന വാര്‍ത്തകള്‍ സജീവമായിരുന്നു. എന്നാല്‍ ചിത്രം സംബന്ധിച്ച് ചര്‍ച്ചകള്‍ നടക്കുന്നതേ ഉള്ളു എന്ന് നാദിര്‍ഷ വ്യക്തമാക്കിയിരുന്നു. പുതിയ റിപ്പോര്‍ട്ടുകള്‍ പ്രകാരം ചിത്രത്തിന്റെ സ്‌ക്രിപ്റ്റ് പൂര്‍ത്തിയായി കഴിഞ്ഞു. മാത്രമല്ല നിര്‍മ്മാതാവിനെയും കണ്ടെത്തി കഴിഞ്ഞുവത്രെ.

ബെന്നി പി നായരമ്പലത്തിന്റേതാണ് സ്‌ക്രിപ്റ്റ്. അദ്ദേഹം തന്നെയാണ് ഇക്കാര്യം അറിയിച്ചത്. നാദിര്‍ഷയ്‌ക്കൊപ്പമുള്ള സ്‌ക്രിപ്റ്റിന്റെ പണിപ്പുരയിലാണ് താന്‍ എന്ന് അദ്ദേഹം പറഞ്ഞു. ചിത്രത്തിലെ മമ്മൂട്ടിയുടെ കഥാപാത്രത്തിന്റെ വിവരം ഉടന്‍ അറിയിക്കും. നാദിര്‍ഷയുടെ മുന്‍ ചിത്രങ്ങളായ അമര്‍ അക്ബര്‍ അന്തോണിയും കട്ടപ്പനയിലെ ഋത്വിക് റോഷനും പോലെ നര്‍മ്മത്തില്‍ പൊതിഞ്ഞാവും പുതിയ ചിത്രം എത്തുകയെന്ന് ബെന്നി പി നായരമ്പലം വ്യക്തമാക്കി.

ഏതൊരു സംവിധായകന്റെയും സ്വപ്നമാണ് മമ്മൂട്ടിയെയും മോഹന്‍ലാലിനെയും കേന്ദ്ര കഥാപാത്രമാക്കി ഒരു ചിത്രം സംവിധാനം ചെയ്യുകയെന്ന് നാദിര്‍ഷ നേരത്തെ പറഞ്ഞിരുന്നു. എന്നാലും കഥയാണ് തന്റെ ചിത്രത്തിലെ ഹീറോ. സ്‌ക്രിപ്റ്റ് കൃത്യമാക്കാന്‍ എന്ത് പരിശ്രമം  വേണമെങ്കിലും ചെയ്യും. അതിന് ശേഷമാണ് താരങ്ങളെ കുറിച്ച് ചിന്തിക്കുന്നത്. നാദിര്‍ഷ പറ!ഞ്ഞു.

അടുത്ത വര്‍ഷം ബെന്നി പി നായരമ്പലത്തിന് മറ്റൊരു വമ്പന്‍ പ്രോജക്ടുമുണ്ട്. ആദ്യമായി മോഹന്‍ലാലിനെ നായകനാക്കി ലാല്‍ജോസ് ഒരുക്കുന്ന ചിത്രമാണത്. മോഹന്‍ലാല്‍ കോളേജ് പ്രൊഫസറായി എത്തുന്ന ചിത്രം കോമഡി പശ്ചാത്തലത്തിലാണ് എത്തുന്നത്. ദിലീപ് നായകനായ വെല്‍കം ടു സെന്‍ട്രല്‍ ജയിലിന്റെ തിരക്കഥയാണ് ബെന്നി പി നായരമ്പലം അവസാനമായി ഒരുക്കിയത്.