ഡാളസ്: മാര്‍ത്തോമാ സഭയുടെ മരാമണ്‍ കണ്‍വെന്‍ഷനില്‍ രാത്രിയിലുള്ള കണ്‍വെന്‍ഷനില്‍ സ്ത്രീകള്‍ക്കുള്ള വിലക്ക് യാതൊരു കാരണവശാലും മാറ്റില്ലെന്ന് ദിവ്യ ശ്രീ.ജോസഫ് മാര്‍ മെത്രാപ്പോലീത്ത അറിയിച്ചു. കണ്‍വെന്‍ഷന്‍ നടത്തിപ്പിന്റെ ചുമതലയുള്ള പ്രസംഗ സുവിശേഷ സംഘത്തിന്റെ തീരുമാനമാണിതെന്നും ആ തീരുമാനം അന്തിമമെന്നും മെത്രാപ്പോലീത്ത പറഞ്ഞു.

രാത്രി കേട്ടാല്‍ മാത്രമേ സുവിശേഷമാകൂ എന്ന് കരുതുന്ന സ്ത്രീകളുണ്ട്. ആ പ്രവണത ശരിയല്ല. മാധ്യമങ്ങളില്‍ പേര് വരാന്‍ ശ്രമിക്കുന്നവരാണ് ഇപ്പോള്‍ പ്രശ്‌നമുണ്ടാക്കാന്‍ ശ്രമിക്കുന്നത്. കണ്‍വെന്‍ഷന്റെ ഭാഗമായി രാത്രി ഏഴു മുതല്‍ ഒന്‍പത് വരെ നടക്കുന്ന പ്രഭാഷണം കേള്‍ക്കുന്നതിനാണ് സ്ത്രീകള്‍ക്ക് വിലക്കേര്‍പ്പെടുത്തിയിരുന്നത്.

സ്ത്രീ വിലക്കില്‍ പ്രതിഷേധിച്ച് കഴിഞ്ഞ ദിവസം കേരള വനിതാ സാഹിതി സമിതി കോഴഞ്ചേരിയില്‍ പ്രതിക്ഷേധ റാലി നടത്തി. ഇതിനെ പ്രതികരിച്ചു കൊണ്ടായിരുന്നു മാര്‍ത്തോമാ സഭയുടെ പരമാധികാരിയായ ദിവ്യ ശ്രീ.ജോസഫ് മാര്‍ മെത്രാപ്പോലീത്ത അറിയിച്ചത്.