മുമ്പു സൂചിപ്പിച്ചതു പോലെ നവാബുമായുള്ള എന്റെ അഭിമുഖത്തിന്റെ എല്ലാ ദിവസങ്ങളിലും കലഹിച്ചാണ് അവസാനിപ്പിച്ചിരുന്നത് . വൈകിട്ട് അഞ്ചു മണിക്കു തുടങ്ങുന്ന മദ്യപാനം രാത്രി ഒന്‍പതു മണിയാകുമ്പോള്‍ അവസാനിക്കുന്നു ..ഒടുവില്‍ നവാബു പറയും ..ടാഡാ ..എന്നെയൊന്നു പ്രീമിയര്‍ ലോഡ്ജു വരെ കൊണ്ടാക്കിത്താ ..കൊതുമ്പു പോലുള്ള ആ മനുഷ്യനെ തോളിലേറ്റുന്നതാണെളുപ്പമെന്നതിനാല്‍ ഞാനപ്പോളദ്ദേഹത്തെ തോളിലേറ്റി ഒരു പോക്കാണ് ..പ്രീമിയര്‍ ലോഡ്ജിലേക്ക് ...പല ദിവസം ഇതാവര്‍ത്തിച്ചപ്പോള്‍ എന്റെ മാധ്യമ സുഹൃത്തുക്കളെന്നെ കളിയാക്കി തുടങ്ങി ..ദേ പോകുന്നു വിക്രമാദിത്യനും വേതാളവും ...അങ്ങനെ എനിക്കൊരു പേരും കിട്ടി..

നിയമയുദ്ധങ്ങളിലൂടെ പ്രശസ്തനായ അദ്ദേഹത്തിന്റെ ചെറുതെങ്കിലും കാലദൈര്‍ഘ്യമേറിയ ആദ്യകാല നിയമ പോരാട്ടങ്ങളിലൊന്ന് കരുണാകരന്റെ കുടുംബ സുഹൃത്തുക്കളായ കല്യാണ്‍ സില്‍ക്‌സിനെതിരെയായിരുന്നു . തൃശൂര്‍ എം.ഒ റോഡിലുള്ള ഒരു കടയുടെ നിര്‍മാണം ഒരടി ഫുട്പാത്തിലേക്കും രണ്ടടി പാരപ്പറ്റിനു മുകളില്‍ ആകാശത്തേക്കും നഗരസഭയെ സ്വാധീനിച്ചു നടത്തിയ നിര്‍മാണമാണ് നവാബിനെ ചൊടിപ്പിച്ചത് . ചെറുതായിരുന്നു അഴിമതിയെങ്കിലും അതു മതിയായിരുന്നു അവരെ വെള്ളം കുടിപ്പിക്കാന്‍ അദ്ദേഹത്തിന് . അതിനാല്‍ തന്നെ ആ കേസ് 25 ആണ്ടു നീണ്ടു . സുപ്രീം കോടതി വരെ പോയിട്ടേ അദ്ദേഹം അടങ്ങിയുള്ളു . അതും കല്യാണിന്റെ ആദ്യ പ്രസ്ഥാനത്തിനെതിരെ .. കുറച്ചൊന്നുമല്ല കല്യാണിനു നവാബുണ്ടാക്കിയ ക്ഷീണമേറ്റത് .

കേരള ഹൈക്കോടതിക്കു പുറമേ നവാബിന്റെ മുഖ്യ വ്യവഹാര കേന്ദ്രമായിരുന്നു തൃശൂര്‍ വിജിലന്‍സ് ആന്‍ഡ് ആന്റികറപ്ഷന്‍ കോടതി . പലപ്പോഴും ഈ കോടതി നവാബിനു വേണ്ടി സൃഷ്ടിക്കപ്പെട്ടതാണോ എന്നു തോന്നിയിട്ടുണ്ട് . വിജിലന്‍സ് കോടതിയില്‍ കേസുകള്‍ നടത്തിയിരുന്നത് പലപ്പോഴും സര്‍ക്കാരാണ് . എന്നാല്‍ വ്യക്തികള്‍ക്കും വിജിലന്‍സ് കോടതിയില്‍ കേസ് നടത്താമെന്ന് ആ പ്രഗത്ഭ നിയമപുസ്തകം തെളിയിച്ചു . മുന്‍ സ്പീക്കര്‍ തേറമ്പില്‍ രാമകൃഷ്ണന്‍ , നിരവധി ദേവസ്വം ബോര്‍ഡുകള്‍ , അഴിമതി വീരന്മാരായ നിരവധി രാഷ്ട്രീയ പ്രമുഖര്‍ , എക്‌സൈസ് ഉദ്യോഗസ്ഥര്‍ തുടങ്ങിയവരെയെല്ലാം നവാബ് ആ കോടതി കയറ്റിച്ചു . എംഎല്‍എ ഫണ്ടുമായി ബന്ധപ്പെട്ട അഴിമതിയായിരുന്നു തേറമ്പിലിനെ കോടതി കയറ്റിയത് .

ട്രെയിനിനകത്തും പുറത്തും പുകവലി നിരോധിച്ചു കൊണ്ടുള്ള കോടതി ഉത്തരവു സമ്പാദിച്ചതും നവാബ് രാജേന്ദ്രന്റെ നിയമയുദ്ധത്തിന്റെ മറ്റൊരധ്യായമാണ് . ഇതിന്റെ ചുവടു പിടിച്ചു കൊണ്ടാണ് പൊതുസ്ഥലത്ത് പുകവലി നിരോധിച്ചു കൊണ്ടുള്ള സുപ്രധാനമായ ഹൈക്കോടതി വിധി പിന്നീടുണ്ടായത് .

കാറ് പൊതുസ്ഥലമല്ലെന്നും കാറിലിരുന്നു മദ്യപിക്കുന്നത് കുറ്റകരമല്ലെന്നുമുള്ള വിചിത്രമായ കോടതി വിധി സംസ്ഥാന സര്‍ക്കാരിനെയും പോലീസിനേയും ഒരുപോലെ വെട്ടിലാക്കിയിരുന്നു. നവാബ് കൊണ്ടുവന്ന നിയമയുദ്ധമാണ് പോലീസിനെയും വെട്ടിലാക്കിയത്.