Image

കൊച്ചി മെട്രൊ ഉദ്‌ഘാടനം ഈ മാസം 30ന്‌

Published on 19 May, 2017
കൊച്ചി മെട്രൊ  ഉദ്‌ഘാടനം ഈ മാസം 30ന്‌

കൊച്ചി:  കേരളത്തിന്‍റെ അഭിമാന പദ്ധതിയായ  കൊച്ചി മെട്രൊയുടെ ഉദ്‌ഘാടനം ഈ മാസം 30ന്‌ നടക്കും. മന്ത്രി കടകംപളളി സുരേന്ദ്രനാണ്‌ ഇക്കാര്യം അറിയിച്ചത്‌. ചടങ്ങിന്‌ പ്രധാനമന്ത്രി നരേന്ദ്രമോഡി എത്തുമെന്നാണ്‌ പ്രതീക്ഷയെന്നും അദ്ദേഹത്തിന്റെ സമയത്തിനായി ശ്രമിച്ചുകൊണ്ടിരിക്കുകയാണെന്നും മന്ത്രി പറഞ്ഞു.

 പ്രധാനമന്ത്രിയുടെ ഒഴിവിനായി അനന്തമായി കാത്തിരിക്കില്ലെന്നും അദ്ദേഹം പറഞ്ഞു. ആലുവയിലായിരിക്കും ഉദ്‌ഘാടന ചടങ്ങുകള്‍. മുഖ്യമന്ത്രിയടക്കമുളള മന്ത്രിമാരും മറ്റ്‌ നേതാക്കളും ചടങ്ങിനുണ്ടാകും.

മൂന്നുകോച്ചുളള ആറു ട്രെയിനാകും തുടക്കത്തില്‍ സര്‍വീസ്‌ നടത്തുക. രാവിലെ ആറുമുതല്‍ രാത്രി പതിനൊന്നുവരെ പത്ത്‌ മിനിറ്റ്‌ ഇടവിട്ടാകും സര്‍വീസ്‌. തിരക്ക്‌ കുറവുളള സമയങ്ങളില്‍ ഈ ഇടവേള ദീര്‍ഘിപ്പിക്കുന്നതും പരിഗണനയിലുണ്ട്‌. ആലുവ മുതല്‍ പാലാരിവട്ടം വരെ 13 കിലോമീറ്ററാണ്‌ ഉദ്‌ഘാടന സജ്ജമായത്‌. പതിനൊന്ന്‌ സ്റ്റേഷനുകളാണ്‌ ഇതിനിടയിലുളളത്‌. മിനിമം നിരക്ക്‌ 10 രൂപ. ആലുവ മുതല്‍ കമ്പനിപ്പടി വരെ 20 രൂപ, കളമശേരി വരെ 30 രൂപ, ഇടപ്പളളി വരെ 40 രൂപ എന്നിങ്ങനെയാണ്‌ പ്രാഥമികമായി നിരക്കുകള്‍ നിശ്ചയിച്ചിട്ടുളളത്‌.

ആലുവയില്‍ നിന്ന്‌ പുറപ്പെടുന്ന ട്രെയിന്‍ 20 മിനിറ്റ്‌ കൊണ്ട്‌ പാലാരിവട്ടത്തെത്തും. സ്ഥിരയാത്രക്കാര്‍ക്കായി കൊച്ചി വണ്‍ കാര്‍ഡെന്ന സ്‌മാര്‍ട്ട്‌ കാര്‍ഡുണ്ടാകും. ഇതുപയോഗിച്ച്‌ യാത്ര നടത്തുന്നവര്‍ക്ക്‌ പരമാവധി 20 ശതമാനം വരെ യാത്രാനിരക്കില്‍ ഇളവ്‌ ലഭിക്കുമെന്നാണ്‌ സൂചന. വിദ്യാര്‍ത്ഥികള്‍ക്ക്‌ മെട്രൊയില്‍ ഇളവുകള്‍ നല്‍കണമെന്ന ആവശ്യവും ഉയര്‍ന്നിട്ടുണ്ട്‌

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക