പ്രസ്റ്റണ്: വിശുദ്ധ കൂദാശകളുടെ പരികര്മത്തിനും മറ്റു വിശുദ്ധ ആവശ്യങ്ങള്ക്കും ഉപയോഗിക്കുന്നതിനായി ഗ്രേറ്റ് ബ്രിട്ടന് സീറോ മലബാര് സഭയിലെ വിശ്വാസികള്ക്കായി രൂപതാധ്യക്ഷന് മാര് ജോസഫ് സ്രാന്പിക്കല് ഇന്നലെ പ്രസ്റ്റണ് സെന്റ് അല്ഫോന്സാ കത്തീഡ്രലില് വി. തൈലം വെഞ്ചരിപ്പു ശുശ്രൂഷ നടത്തി. രാവിലെ 11.30ന് അര്പ്പിക്കപ്പെട്ട ദിവ്യബലിക്കിടയിലായിരുന്നു തൈലം വെഞ്ചരിപ്പു ശുശ്രൂഷ നടന്നത്.
പിതാവായ ദൈവത്താല് അഭിഷിക്തനായി ലോകത്തിലേയ്ക്കുവന്ന ക്രിസ്തുവില് എല്ലാവരെയും ഒന്നിപ്പിക്കുന്ന മാമോദിസായില് ഉപയോഗിക്കുന്ന ഈ തൈലം, ക്രിസ്തുവിനോടോപ്പം സ്വര്ഗത്തില് അവകാശം നേടിത്തരാന് നമ്മേ സഹായിക്കുന്നുവെന്ന് ദിവ്യബലി മധ്യേ വചനസന്ദേശം നല്കി ലങ്കാസ്റ്റര് രൂപതാധ്യക്ഷന് അഭി. ബിഷപ്പ് മൈക്കിള് ജി. കാംബെല് പറഞ്ഞു. ക്രിസ്തുവിന്റെ രാജകീയ പൗരോഹിത്യത്തില് നാമെല്ലാം പങ്കുകാരാകുന്നത് ഈ അഭിഷേക തൈലത്താല് മുദ്രിതരാകുന്നത് വഴിയാണെന്നും അദ്ദേഹം ഓര്മിപ്പിച്ചു.
അഭി. പിതാക്കന്മാരോടൊപ്പം പ്രോട്ടോ സിഞ്ചെല്ലൂസ് റവ. ഡോ. തോമസ് പാറയടിയില് എംഎസ്ടി, വികാരി ജനറാള്മാരായ റവ.ഫാ. സജിമോന് മലയില് പുത്തന്പരയില്, ഫാ. മാത്യു ചൂരപൊയ്കയില്, രൂപതാ ചാന്സലര് റവ. ഡോ. മാത്യു പിണക്കാട്ട്, സെക്രട്ടറി റവ. ഫാ. ഫാന്സ്വാ പത്തില് തുടങ്ങിയവരും ഗ്രേറ്റ് ബ്രിട്ടണ് രൂപതയുടെ വിവിധ ഭാഗങ്ങളില് ശുശ്രൂഷ ചെയ്യുന്ന വൈദികരും സിസ്റ്റേഴ്സും നൂറുകണക്കിന് അല്മായരും തിരുകര്മ്മങ്ങളില് സന്നിഹിതരായിരുന്നു. ലങ്കാസ്റ്റര് രൂപതയിലെ ഏതാനും വൈദികരുടെ സാന്നിധ്യവും തിരുകര്മ്മങ്ങള്ക്ക് പുതുചൈതന്യം നല്കി.
സീറോ മലബാര് സഭയില് കര്ത്താവിന്റെ നാമത്തിലുള്ള ഏതെങ്കിലും തിരുനാള് ദിവസമാണ് വി. തൈല ആശീര്വാദത്തിനായി തെരഞ്ഞെടുക്കാറുള്ളത്. ഈശോയുടെ സ്വര്ഗാരോഹണ തിരുനാളില് തന്നെ ആദ്യ തൈല വെഞ്ചരിപ്പു ശുശ്രൂഷ നടന്നത് സവിശേഷ ദൈവാനുഗ്രഹമായി കണക്കാക്കപ്പെടുന്നു. തിരുകര്മങ്ങള്ക്കുശേഷം ഉച്ചകഴിഞ്ഞ് രൂപതാധ്യക്ഷന്റെ നേത്യത്വത്തില് വൈദികരുടെ സമ്മേളനവും വിവിധ കമ്മീഷനുകളുടെ വിലയിരുത്തലും നടന്നു. തുടര്ന്നുള്ള പ്രവര്ത്തനങ്ങള്ക്ക് രൂപതാധ്യക്ഷന് മാര് ജോസഫ് സാന്പ്രിക്കല് മാര്ഗനിര്ദേശങ്ങള് നല്കി.
രൂപതാധ്യക്ഷന് എല്ലാവര്ക്കും സ്വര്ഗാരോഹണ തിരുനാള് മംഗളങ്ങള് നേരുകയും നേര്ച്ചഭക്ഷണം വിതരണം ചെയ്യുകയും ചെയ്തു. രൂപതാധ്യക്ഷന് ആശീര്വദിച്ച വി. തൈലമായിരിക്കും ഇനി മുതല് ഗ്രേറ്റ് ബ്രിട്ടണ് സീറോ മലബാര് രൂപതയിലെ തിരുകര്മ്മങ്ങള്ക്ക് വൈദികര് ഉപയോഗിക്കുന്നത്.
റിപ്പോര്ട്ട്: ഫാ. ബിജു കുന്നയ്ക്കാട്ട്