ബ്രിട്ടീഷ് പ്രധാനമന്ത്രിയുമായി ഡെപ്യൂട്ടി മേയര്‍ ടോം ആദിത്യ കൂടിക്കാഴ്ച നടത്തി
Published on 21 August, 2017
ബ്രിസ്‌റ്റോള്‍ (യുകെ): ബ്രിട്ടനിലെ മലയാളിയായ ഡെപ്യൂട്ടി മേയര്‍ ടോം ആദിത്യ ബ്രിട്ടീഷ് പ്രധാനമന്ത്രി തെരേസ മേയുമായി കൂടിക്കാഴ്ച നടത്തി. ബ്രിട്ടനിലെ ഭരണകക്ഷിയായ കണ്‍സേര്‍വേറ്റീവ് പാര്‍ട്ടിയുടെ ആദ്യത്തെ ഇന്ത്യന്‍ വംശജനായ ഡെപ്യൂട്ടി മേയറാണ് കൗണ്‍സിലര്‍ ടോം ആദിത്യ.
ബ്രിട്ടനിലെ ന്യുനപക്ഷ ജനവിഭാഗഡങ്ങളുടെ ഇടയിലുള്ള ആശങ്കകളും പ്രശ്‌നങ്ങളും അദ്ദേഹം പ്രധാനമന്ത്രിയുടെ ശ്രദ്ധയിപ്പെടുത്തി. യുകെയില്‍ നഴ്‌സിംഗ് ജോലിയില്‍ പുതുതായി പ്രവേശിക്കുന്ന വിദേശ ഉദ്യോഗാര്‍ത്ഥികള്‍ക്കു എന്‍എംസി രജിസ്‌ട്രേഷന്‍ ലഭിക്കുവാനുള്ള ഇംഗ്ലീഷ് ഭാഷാ പ്രാവീണ്യ പരീക്ഷയുടെ (കഋഘഠട) സ്‌കോര്‍ 6 ആയി കുറയ്ക്കണമെന്ന് അദ്ദേഹം ആവശ്യപ്പെട്ടു. യുകെ.യുടെ വിവിധ തൊഴില്‍ മേഖലകളില്‍ ജോലി ചെയ്യുന്ന വിദേശ പൗരന്മാരുടെ പ്രത്യേകിച്ചു ഇന്‍ഡ്യക്കാരുടെ മാതാപിതാക്കള്‍ക്ക് ബ്രിട്ടനില്‍ വന്നു മക്കളോടൊപ്പം താമസിക്കുന്നതിന് തടസം നില്‍ക്കുന്ന ബ്രിട്ടീഷ് വീസ നിയമങ്ങള്‍ മാറ്റേണ്ടതിന്റെ ആവശ്യകതയും കൗണ്‍സിലര്‍ ടോം ആദിത്യ പ്രധാനമന്ത്രിയുടെ മുന്‍പാകെ അവതരിപ്പിച്ചു. വംശീയ അക്രമങ്ങള്‍ക്കു വിധേയരാകുന്ന വ്യക്തികള്‍ക്ക് നല്കുന്ന പരിരക്ഷ കൂടുതല്‍ ശക്തമാക്കേണ്ടതിന്റെ ആവശ്യവും, കുറ്റവാളികള്‍ക്ക് തക്ക ശിക്ഷ നല്‍കുവാന്‍ ജുഡീഷ്യല്‍ വ്യവസ്ഥയില്‍ മാറ്റം വരുത്തേണ്ടതിന്റെ ആവശ്യകതയും ടോം ആദിത്യ പ്രധാനമന്ത്രിയുമായി സംസാരിച്ചു. കാര്യങ്ങള്‍ പഠിച്ചതിനു ശേഷം ആവശ്യമായ നടപടികള്‍ സ്വീകരിക്കാമെന്ന് പ്രധാനമന്ത്രി ഉറപ്പു നല്‍കി.
ബ്രിട്ടനിലെ സാമൂഹ്യസാംസ്‌കാരിക മേഖലകളില്‍ സാമൂഹ്യ പ്രതിബദ്ധതയോടും, അര്‍പ്പണമനോഭാവത്തോടും കൗണ്‍സിലര്‍ ടോം ആദിത്യ നടത്തിയ സേവനങ്ങളെ പ്രധാനമന്ത്രി ശ്ലാഘിക്കുകയും, ഡെപ്യൂട്ടി മേയര്‍ പദവിയിലേക്ക് തെരഞ്ഞെടുക്കപ്പെട്ടതില്‍ അഭിനന്ദിക്കുകയും ചെയ്തു.
ബ്രിസ്‌റ്റോളിലെ ബ്രാഡ്‌ലി സ്‌റ്റോക്കില് നിന്നും 2011 ലും 2015ലും തെരഞ്ഞെടുക്കപ്പെട്ട ടോം, അന്ന് പോള്‍ ചെയ്യപ്പെട്ട വോട്ടിന്റെ മൂന്നില്‍ രണ്ടു ഭാഗവും നേടിയാണ് കഴിഞ്ഞ രണ്ടു തവണയും കൗണ്‍സിലറായി വിജയഭേരി മുഴക്കിയത്.
സൗത്ത് വെസ്റ്റ് ഇംഗ്ലണ്ടിലെ ബ്രിസ്‌റ്റോള്‍ സിറ്റിയുടെയും സമീപ ഒന്‍പതു ജില്ലകളുടെയും പോലീസ് സേനയെ നിയന്ത്രിക്കുന്ന പോലീസ് ബോര്‍ഡിന്റെ (സൂക്ഷ്മപരിശോധനാ പാനല്‍) വൈസ് ചെയര്‍മാനായി സേവനം ചെയ്യുന്ന ടോം ആദിത്യ, 98 ശതമാനം വെള്ളക്കാര്‍ താമസിക്കുന്ന തെക്കന്‍ ഗ്‌ളോസ്‌ററര്‍ഷയര്‍ കൗണ്ടിയില്‍ തെരഞ്ഞെടുക്കപ്പെടുന്ന ആദ്യത്തെ ഏഷ്യന്‍ വംശജനാണ്. ബ്രിസ്‌റ്റോള്‍ നഗരത്തിലെ വിവിധ മതനേതാക്കളുടെ പൊതുവേദിയായ ബ്രിസ്‌റ്റോള്‍ മള്‍ട്ടി ഫെയിത്ത് ഫോറത്തിന്റെ ട്രസ്റ്റിയുമാണ് അദ്ദേഹം.
റിപ്പോര്‍ട്ട്: ജോസ് കുന്പിളുവേലില്‍
Facebook Comments
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala