ഒരമ്മ തന്റെ കുഞ്ഞിന് വേണ്ടി തോട്ടില്
കെട്ടുകയാണ്. എത്രമാത്രം ശ്രദ്ധയും, ദീര്ഘ വീക്ഷണവുമാണ് ആ 'അമ്മ
തൊട്ടിലിലേക്ക് പകരുന്നത് ?! കുഞ്ഞിന്റെ മൃദുമേനിക്ക് അലോസരമുണ്ടാക്കാത്ത
മിനുത്ത തുണി തന്നെ തൊട്ടിലിനായി തെരഞ്ഞെടുത്തിരിക്കുന്നു, കാറ്റും,
വെളിച്ചവും ലഭ്യമാവുന്ന ഒരിടം കണ്ടെത്തിയിരിക്കുന്നു, ഒരു കാരണവശാലും
പൊട്ടിപ്പോകാത്ത കയറില് തൊട്ടിലിനെ ഉറപ്പിച്ചിരിക്കുന്നു, ബലമാര്ന്ന ഒരു
മോന്തായത്തില് അതിനെ തൂക്കിയിരിക്കുന്നു, കുഞ്ഞിന് പരമാവധി സുഖദായകമായ ഒരു
വേഗത്തില് 'അമ്മ തൊട്ടിലിനെ ആട്ടുന്നു. അനുഭൂതികളുടെ അനശ്വരമായ
സ്വപ്നലോകത്ത് കുഞ്ഞ് വളര്ച്ചയുടെ പടവുകള് താണ്ടുന്നു!!
ദൈവസ് സ്നേഹത്തിന്റെ പരമമായ സൃഷ്ടി പൂര്ണ്ണതയാണ് മനുഷ്യന്.
പ്രപഞ്ചത്തിലെങ്ങും ഇതുപോലൊരു സൃഷ്ടിയുള്ളതായി ആര്ക്കും അറിവില്ല.
മനുഷ്യന് എന്ന തന്റെ അരുമക്കുഞ്ഞിന് വേണ്ടി ദൈവം ഞാത്തിയിട്ട
കളിത്തൊട്ടിലാകുന്നു ഭൂമി എന്നാണു എന്റെ വിശ്വാസം. തന്റെ ഓമനയുടെ മൃദു
ചര്മ്മത്തിന് പോറലും, കീറലും ഏല്ക്കാതിരിക്കാനായി വായുവെന്ന മസ്ലിന്
പുതപ്പുകൊണ്ട് ഇതിനെ പൊതിഞ്ഞിരിക്കുന്നു. ചുട്ടുപൊള്ളാനും, തണുത്തു
മരവിക്കാനും വിടാതെ അത്യാസ്വാദ്യകരമായ ഒരു മിതോഷ്ണാവസ്ഥ ഉപരിതലത്തിലെ
മിക്കവാറും ഭാഗങ്ങളിലും ഒരുക്കിയിരിക്കുന്നു. അറിയപ്പെടുന്ന പ്രപഞ്ചത്തില്
എവിടെയും കാണപ്പെടാത്ത തരത്തില് മൂല പദാര്ത്ഥങ്ങളെ അതി സമര്ത്ഥവും,
അത്യതിശയകരവുമായി സംയോജിപ്പിച് ജല സമൃദ്ധി കൊണ്ട് ഇതിനെ
നിറച്ചിരിക്കുന്നു. സൂര്യന് ചിരിക്കുന്പോള് ഭൂമിയില് വെളിച്ചം
നിറയുന്നു, ചന്ദ്രന് മന്ദഹസിക്കുന്പോള് നറുനിലാവ് പരക്കുന്നു !!
മനസ്സിനെയും, ശരീരത്തെയും പോഷിപ്പിക്കുന്ന സസ്യ ലതാദികള് കൊണ്ട്
ഉപരിതലത്തെ പച്ചപ്പിന്റെ പരവതാനി അണിയിച്ചിരിക്കുന്നു. രത്നഗര്ഭയും,
സുഗന്ധ വാഹിനിയുമായ മണ്ണ് മനുഷ്യ സ്വപ്നങ്ങള്ക്ക് തണലും, തലോടലുമേകുന്നു.
എത്രയോ യുഗങ്ങളായി മനുഷ്യന് എന്ന ഈ മനോഹര ജീവി സൗര യൂഥത്തിലെ ഈ നീലവര്ണ്ണ
ഗോളത്തിന്റെ സജീവ സാന്നിദ്ധ്യമായി ഇര തേടിയും, ഇണ തേടിയും
നിലനില്ക്കുന്നു !
ആധുനിക ജീവിതത്തിന് അത്യന്താപേക്ഷിതമായ ഒന്നാണ് വൈദ്യുതി എന്ന്
നമുക്കറിയാം. വൈദ്യുതി ആവശ്യം വരുന്പോള് നാം ആശ്രയിക്കുന്നത് നമ്മുടെ
കൈയെത്തുന്നിടത്തെ സ്വിച്ചിനെ മാത്രമാണ്. സ്വിച്ച് ഓണ് ചെയ്തുകൊണ്ട് നാം
ടി.വി. കാണുന്നു, പാട്ടു കേള്ക്കുന്നു, എ. സി. അനുഭവിക്കുന്നു. അങ്ങിനെ
നൂറു നൂറ് ആവശ്യങ്ങള്ക്കായി നാം വൈദ്യുതി ഉപയോഗിക്കുന്പോളെല്ലാം നമ്മുടെ
സമീപനം സ്വിച്ചില് വരെ മാത്രമേ എത്തുന്നുള്ളു. സ്വിച്ചിന്റെ പിറകിലുള്ള
മഹത്തും, ബൃഹത്തുമായ സാങ്കേതിക വിദ്യയെ പലപ്പോഴും നാം മറക്കുന്നു. നമ്മുടെ
സ്വിച്ചില് വൈദ്യുതി എത്തിക്കുന്ന വയറുകള്, വയറുകള്ക്കു പിന്നിലുള്ള
കണ്ട്രോള് പാനലുകള്, സര്ക്യൂട്ട് ബ്രേക്കറുകള്, മെയിന്
സ്വിച്ചുകള്, അളവുകളുടെ അടിസ്ഥാനത്തിലുള്ള സപ്ലെ ലൈനുകള്, എല്ലാ ലൈനുകളും
ചെന്ന് ചേരുന്ന പവര് സ്റ്റേഷനുകള്, പവര് സ്റ്റേഷനുകള്ക്ക് ശക്തി
പകരുന്ന കൂറ്റന് ജനറേറ്ററുകള്, ജനറേറ്ററുകളെ തിരിക്കുന്നതിനായി
ഉപയോഗപ്പെടുത്തിയിരിക്കുന്ന ജല ശക്തിയോ, താപ ശക്തിയോ, അണുശക്തിയോ മറ്റും
മറ്റുമായ ശാക്തിക റിസോര്സുകള്.
നമ്മള് വിരല് നീട്ടിയെത്തുന്ന ഒരു സ്വിച്ചില് നിന്ന് നമുക്ക് സുഖം
പകരുന്നതിനായി ആയിരക്കണക്കിന് നിര്മ്മിതികളും, സംവിധാനങ്ങളും,
സാഹചര്യങ്ങളും, ചിന്തകളും, പ്രവര്ത്തികളും ലക്ഷ്യബോധത്തോടെ
സമന്വയിച്ചിരിക്കുന്നതായി നമുക്ക് കാണാം.
ദൈവാവബോധമുള്ള ഒരു മനുഷ്യനെ സംബന്ധിച്ചിടത്തോളം ഇത് പോലെ തന്നെയാണ് ഭൂമി
മനുഷ്യവാസ യോഗ്യമാക്കുന്നതിനുള്ള സംവിധാനങ്ങളും ദൈവം ഒരുക്കിയിട്ടുള്ളത്.
നമ്മുടെ കണ്ണുകള് കാണുന്നത് കൊണ്ട് സൂര്യനും, ചന്ദ്രനും
വെളിച്ചങ്ങളാണെന്ന് നമുക്കറിയാം.ഇവ മുന് സൂചിപ്പിച്ച സ്വിച്ചുകള്
പോലെയാണ്. ഈ സ്വിച്ചുകളിലൂടെ വെളിച്ചം മാത്രമല്ലാ നമുക്ക് കിട്ടുന്നത്.
സര്വ സസ്യങ്ങളെയും, ജീവികളെയും ഇവകളോട് ബന്ധിപ്പിച്ചിരിക്കുന്നു.
കടലുകളെയും, കാറ്റുകളെയും ഇവകളോട് ബന്ധിപ്പിച്ചിരിക്കുന്നു. മനസ്സുകളെയും,
വികാരങ്ങളെയും ഇവകളോട് ബന്ധിപ്പിച്ചിരിക്കുന്നു. ഇരയേയും, ഇണയെയും അതി
സമര്ത്ഥമായി ഇവകളോട് ബന്ധിപ്പിച്ചു കൊണ്ട്, ഇര തേടലിലൂടെ നിലനില്പ്പും,
ഇണ ചേരലിലൂടെ പ്രത്യുല്പ്പാദനവും സംവിധാനം ചെയ്തിരിക്കുന്നു !!
നാം നേരിട്ട് കാണുകയും, അനുഭവിക്കുകയും ചെയ്യുന്നത് കൊണ്ടാണ് സൂര്യനും
ചന്ദ്രനും പ്രാഥമിക സ്വിച്ചുകളുടെ നിരയില് വരുന്നത്. നാം കാണാത്ത എത്രയോ
സംവിധാനങ്ങള് ? സൂര്യ കുടുംബത്തില് ( സോളാര് സിസ്റ്റം ) തന്നെ എട്ട്
ഗ്രഹങ്ങള്. ( പ്ലാനറ്റ്സ് ) നവ ഗ്രഹ സിദ്ധാന്തം പഴയ കഥ. (നമ്മുടെ
പ്ലൂട്ടോയെ 2006 ല് ഡിസ്മിസ് ചെയ്ത് തരം താഴ്ത്തി കുള്ളന്
ഗ്രഹങ്ങള്ക്കൊപ്പം ( ഡ്വാര്ഫ് പ്ലാനറ്റ് ) മാറ്റി നിര്ത്തിയത്
ഓര്ക്കുമല്ലോ? ) പ്ലൂട്ടോയുടെ ഉപഗ്രഹം ( ചാറോണ് ) ഉള്പ്പടെ എഴുപതോളം
ഉപഗ്രഹങ്ങള്;(മൂണ്സ് ) കുള്ളന് ഗ്രഹങ്ങള് ; (ഡ്വാര്ഫ് പ്ലാനറ്റ്സ് )
വാല് നക്ഷത്രങ്ങള്; ( കോമറ്റ്സ് ) ഉല്ക്കകള്; (അസ്ട്രോയിഡ്സ് )
പൊടിപടലങ്ങള്.
ഇവിടന്നും പിന്നോട്ട് പോയാല് സൂര്യന്റെ തറവാടായ ക്ഷീരപഥം.( മില്ക്കിവേ )
ക്ഷീരപഥത്തില് തന്നെ ശാസ്ത്രജ്ഞരുടെ നിഗമനപ്രകാരം നൂറ് ബില്യണിലധികം
വരുന്ന നക്ഷത്രങ്ങള്. ഇവയില് പലതും സൂര്യന്റെയൊക്കെ വല്യ വല്യേട്ടന്മാരായ
ഭീമാകാരന്മാരാണ്. ഓരോന്നും തമ്മിലുള്ള ദൂരമാകട്ടേ പ്രകാശ വര്ഷങ്ങള്.
സെക്കന്ഡില് ഒരു ലക്ഷത്തി എണ്പത്താറായിരം മൈല് വേഗതയില് സഞ്ചരിക്കുന്ന
വെളിച്ചം ഒരു വര്ഷക്കാലം കൊണ്ട് ഇതേ വേഗതയില് എത്തിച്ചേരുന്ന ദൂരമാണ്
ഒരു പ്രകാശ വര്ഷം. നമ്മുടെ സൂര്യന്റെ തൊട്ടയക്കാരനായ നക്ഷത്രത്തില്
എത്തിച്ചേരാന് ഇതേ വേഗതയില് നാലേകാല് വര്ഷം വേണം പ്രകാശത്തിന് . അതായത്
നാലേകാല് പ്രകാശ വര്ഷം. അവിടന്നും പിന്നോട്ട് പോയാല് കോടാനുകോടി പ്രകാശ
വര്ഷങ്ങള്ക്ക് അകലെ നില്ക്കുന്ന നക്ഷത്ര ഭീമന്മാര് വരെയുണ്ട് നമ്മുടെ
ഗാലക്സിയില്. ഒന്നും രണ്ടുമല്ല, നൂറ് ബില്യണിലുമധികമാണ് മില്ക്കി വേയുടെ
കുഞ്ഞു കുട്ടി പരാധീനങ്ങള് !
നമ്മുടെ ഗാലക്സിയായ മില്ക്കി വേ ഗാലക്സികളുടെ ഒരു നാലംഗ സംഘത്തിലെ
അംഗമാണ്. ഈ സഖ്യത്തെ ' ആന്ഡ്രോമീഡിയാ ' എന്ന് ശാസ്ത്രജ്ഞന്മാര്
വിളിക്കുന്നു. നഗ്ന നേത്രങ്ങള് കൊണ്ട് കാണാവുന്ന ഈ നാല്വര് സംഘം
ലോക്കല് ഗ്രൂപ് എന്നറിയപ്പെടുന്നതും, 30 ഗാലക്സികള് ഉള്പ്പെടുന്നതുമായ
ഒരു കൂട്ടുകുടുംബത്തിലെ അംഗങ്ങളാണ്.
വീണ്ടും പിന്നോട്ട് പോയാല്, ഗാലക്സികളുടെ ഒരു പ്രളയമാണ്.ചുരുങ്ങിയത്
നൂറുബില്യണ് ഗാലക്സികളെ ഇതിനകം കണ്ടെത്തിക്കഴിഞ്ഞു എന്ന് അവകാശപ്പെടുന്ന
ശാസ്ത്രം, ആകെയുള്ളതിന്റെ അഞ്ചു ശതമാനം പോലും കണ്ടെത്താനായിട്ടില്ലാ എന്നും
പരിതപിക്കുന്നു? ശക്തിയേറിയ പുത്തന് ടെലസ്കോപ്പുകളുടെ വരവോടെ കൂടുതല്
ഗാലക്സികളെ കണ്ടെത്താനാവും എന്ന പ്രതീക്ഷയിലാണ് ശാസ്ത്രജ്ഞര്.
ഇവയെയെല്ലാം നില്ക്കേണ്ടിടത്ത് നിര്ത്തിയിരിക്കുന്നു. ആകര്ഷണ
വികര്ഷണങ്ങളുടെ അജ്ഞേയങ്ങളായ ചരടുകളില് ബന്ധിപ്പിച്ചിരിക്കുന്നു . മനുഷ്യ
മനസിനോ,അവന്റെ ബുദ്ധിക്കോ , അവന് എന്ന സാധുജീവിയുടെ അവിരാമമായ
അന്വേഷണങ്ങള്ക്കോ ഒന്നിനും ഇതെല്ലാം എങ്ങിനെ സംഭവിച്ചു എന്നതിന് ഒരവസാന
ഉത്തരം കണ്ടെത്താനാവുകയില്ല. സര്വ ശക്തനായ ദൈവത്താല് ഇതെല്ലാം സംഭവിച്ചു
എന്ന് ദൈവ വിശ്വാസികളായ മനുഷ്യര് വിശ്വസിക്കുകയും ആശ്വസിക്കുകയും
ചെയ്യുന്പോള്, മറ്റുള്ളവര് അവരവരുടെ ന്യായങ്ങളില് ഉത്തരം തേടുന്നു. കാല
വിസ്മൃതികളുടെ തീരഭൂമികളില് ജീവിച്ചുമരിച്ച , ആത്മ നിഷ്ഠയുടെ
അതീന്ദ്രിയങ്ങളില് നിന്നും ജ്ഞാനം ആര്ജ്ജിച്ച കാലാതിവര്ത്തികളായ
ദാര്ശനികരുടെ കണ്ടെത്തലുകളാണ് മറ്റേതു നിഗമനങ്ങളെക്കാളും ഇന്നും
തലയുയര്ത്തി നില്ക്കുന്നത്.
അംബര ചുംബികളായ സൗധസമുച്ചയങ്ങളുടെ ഒരു സമാഹാരമാണ് പ്രപഞ്ചമെങ്കില്,
അതിലൊന്നിലെ ഒരു ചെറുമുറിയിലെ കുഞ്ഞുപോടില് ഒളിഞ്ഞിരിക്കുന്ന ഒരു
പാറ്റാക്കുഞ്ഞിനെപ്പോലെയാണ് മനുഷ്യന്. വീടിനുള്ളില് അതിനു മിതോഷ്ണാവസ്ഥ
കിട്ടുന്നുണ്ട്, രാത്രിയില് പുറത്തു വരുന്പോള് ആഹാരം കിട്ടുന്നുണ്ട്,
താമസിക്കാന് മനോഹരമായ ഒരു പോട് അതിന് സ്വന്തമായിട്ടുണ്ട് . നമ്മളെപ്പോലെ
അതും പറയുന്നുണ്ടാവണം: എനിക്ക് വീടുണ്ട്, കാറുണ്ട്, ജോലിയുണ്ട്, പണമുണ്ട് ,
പദവിയുണ്ട് എന്നൊക്കെ.ആത്മാര്ത്ഥമായ ഒരന്വേഷണത്തില് ഇതൊന്നും അത്
ആര്ജ്ജിച്ചതല്ലാ, അതിന് ലഭിച്ചതാണ് എന്ന് കാണാം.
മനുഷ്യന്റെ സാങ്കേതിക ജ്ഞാനം കൊണ്ടുവരുന്ന വൈദ്യുതി ഉപയോഗിച്ചും, ഗ്യാസ്
എരിയിച്ചുമുണ്ടാക്കുന്ന മിതോഷ്ണാവസ്ഥയാണ് അതിന് അനുഭവേദ്യമാവുന്നത്. അവന്റെ
തീന് മേശയില് നിന്നും തൂവിപ്പോയ ചെറു തരികളായിരുന്നു, രാത്രിയില് അതിന്
ലഭ്യമായ ഫൈവ് കോഴ്സ് ഡിന്നര്. മനുഷ്യന്റെ ഭവനത്തിലെ ഏതോ ചെറുപോടാണ്
അതിന് ലഭ്യമായ ലക്ഷ്വറി ഹവുസ്.
പാറ്റ ഇതറിയുന്നുണ്ടോ? ഇല്ലേയില്ല. അതിന്റെ മനസ്സ് ഇതൊന്നും
ഉള്ക്കൊള്ളാന് മാത്രം വളര്ന്നതല്ല. മനുഷ്യനെ അത് കണ്ടിട്ടുണ്ടോ?
തീര്ച്ചയായും ഇല്ല. അതിന്റെ കണ്ണുകള്ക്ക് കാണാനാവുന്ന ചെറു
ഫ്രെയിമിനെക്കാള് എത്രയോ വലുതാണ് മനുഷ്യന്? അവന്റെ സാന്നിദ്ധ്യം
അതറിയുന്നുണ്ടോ? ഉണ്ടാവാനിടയില്ല. അവന്റെ പാദപതന നാദം അതിനനുഭവപ്പെടുന്ന
ഭൂകന്പമാണ്. അവന്റെ സഞ്ചാരം അതിന് കൊടുങ്കാറ്റാണ്. അവന്റെ ശബ്ദം അതിന്
ഇടിനാദവും, അവന്റെ ചലനം അതിന് സുനാമിയുമാണ് ?!
തന്റെ ഓമനക്കു വേണ്ടി തൊട്ടില് കെട്ടിയ അമ്മയുടെ ശ്രദ്ധയും, കരുതലുമാണ്
തന്റെ അരുമയായ മനുഷ്യന് വേണ്ടി ദൈവം ഇവിടെ ഒരുക്കിയിട്ടുള്ളത്. അനന്തമായ
ആകാശത്തിലെ ഭൂമിയെന്ന ഈ നക്ഷത്രപ്പാറയിലെ വായു കുമിളയില് ദൈവം മനുഷ്യനെ
കിടത്തിയിരിക്കുന്നു. അവന്റെ സുഖത്തിനും, സന്തോഷത്തിനും നിലനില്പ്പിനും
വേണ്ടതെല്ലാം ഒരുക്കിയിരിക്കുന്നു. പ്രഥമ വിശകലനത്തില് നമ്മുടെ ചിന്ത
എത്തുന്നത് കേവലമായ ചില സ്വിച്ചുകളില് മാത്രമാണ്. ഈ സ്വിച്ചുകളില്
നിന്നാണ് നമുക്കെല്ലാം കിട്ടുന്നത്.സംശുദ്ധമായ വായു, സ്പടിക നിര്മ്മലമായ
ജലം, അകളങ്കിതമായ അഗ്നി, ഊര്ജ്ജ സര്വ്വസ്വമായ ആകാശം, സസ്യ ജന്തു ജാല
സമൃദ്ധി.
ഈ സ്വിച്ചിനും പിറകിലുള്ള സംവിധാനങ്ങളിലേക്ക് നമുക്ക്
എത്തിപ്പെടാനാവുന്നില്ല. ഒരു പാറ്റക്കുഞ്ഞിന് അതിരിക്കുന്ന പോട് സ്ഥിതി
ചെയ്യുന്ന വീടിന്റെ മേല്ക്കൂര പോലും കാണാനാവാത്തതു പോലെ, നാം പരമാവധി
നമ്മുടെ ഭൂമിയും, അതിന്റെ ചമയങ്ങളുമേ കാണുന്നുള്ളൂ. മനുഷ്യന് പറന്നു,
പറന്ന് ചന്ദ്രനിലിറങ്ങിയത്രേ! അത് ശരിയാണെങ്കില്ത്തന്നെയും നമ്മുടെ പാറ്റ
അത് വസിച്ചിരുന്ന പോടില് നിന്നും പുറത്തിറങ്ങി എന്ന് പറയുന്നത് പോലെയേ
അതുള്ളൂ. ഈ നക്ഷത്രപ്പാറയിലെ ( ശാസ്ത്ര ഭാഷയില് റോക്കി പ്ലാനെറ്റ് ) വായു
കുമിള ഇതുപോലെ നിലനിര്ത്തുന്നതിനുള്ള പവര് സ്റ്റേഷനുകളും, സപ്ലൈ
ലൈനുകളും, സര്ക്യൂട്ട് ബ്രെക്കറുകളുമാണ്, നാം കാണുന്നതും,
കാണപ്പെടാത്തതുമായ മഹാപ്രപഞ്ചം ! കാരണം, ദൈവത്തിന് പ്രിയപ്പെട്ടത്
മനുഷ്യനാണ്. ദൈവത്തിന്റെ ഓമനയാണവന് ! പ്രപഞ്ചത്തിന് വേണ്ടി മനുഷ്യനെയല്ലാ,
മനുഷ്യന് വേണ്ടി പ്രപഞ്ചമാണ് ദൈവം ഒരുക്കിയിട്ടുള്ളത്. തന്റെ
അരുമക്കുഞ്ഞിന് വേണ്ടി തൊട്ടിലൊരുക്കിയ അമ്മയെപ്പോലെ !
' അന്നം ഹി ഭൂതാനാം ജേഷ്ഠം ' എന്ന് ഭഗവത് ഗീത പറയുന്നു. സര്വ
ഭൂതങ്ങള്ക്കും അഥവാ ജീവികള്ക്കും അന്നം അഥവാ ആഹാരം ജേഷ്ടാവസ്ഥയില് (
മുന്പേ ഉണ്ടായ ) ആയിരുന്നു എന്ന് സാരം. .കാലാതിവര്ത്തിയായ ഒരു
ദാര്ശനികന് ലഭിച്ച വെളിപാടായിരുന്നു അത്. അന്നം എന്നതിന് ' അനുകൂലമായ
ജീവിത സാഹചര്യങ്ങള് ' എന്നും കൂടി അര്ഥം കല്പിക്കേണ്ടതുണ്ട്.
ജീവിക്കുന്നതിന് അനുകൂലമായ എല്ലാ സാഹചര്യങ്ങളും ജീവിക്കു മുന്പേ തന്നെ
ജേഷ്ടാവസ്ഥയില് ഉണ്ടായിരുന്നു. ഈ അനുകൂലാവസ്ഥകള് ഒരുങ്ങി നിന്ന
ഒരിടത്തേക്കാണ്, അഥവാ, ദൈവം ഒരുക്കിയ ഭൂമി എന്ന പിള്ളത്തൊട്ടിലിലേക്കു
തന്നെയാണ് അനുഗ്രഹത്തിന്റെ ആഗ്ര വിരലില് തൂങ്ങി അവന് ( മനുഷ്യന്) കടന്നു
വന്നത് !
പതിനഞ്ചിലധികം ബില്യണ് വര്ഷങ്ങള്ക്ക് മുന്പ് പ്രപഞ്ചം
രൂപപ്പെട്ടുവെന്നും, എന്നിട്ടും 35 ലക്ഷം വര്ഷങ്ങള്ക്ക് മുന്പ്
മാത്രമാണ് ആദിമ മനുഷ്യന് വന്നതെന്നും ശാസ്ത്രം പറയുന്പോള് ' അന്നം ഹി
ഭൂതനാം ജേഷ്ഠം ' എന്ന ഗീതാ ദര്ശനം അര്ത്ഥവത്താകുന്നു. സകല
സൃഷ്ടികള്ക്കും അവസാനമായിട്ടാണ് മനുഷ്യ സൃഷ്ടി നടന്നത് എന്ന ബൈബിള്
പ്രഖ്യാപനവും ഇവിടെ അന്വര്ത്ഥമാകുന്നതായി കാണാം. രണ്ടും രണ്ട്
കാലഘട്ടങ്ങളിലെ ദാര്ശനികരുടെ ചിന്താ സരണിയില് കത്തിയ വിളക്കുകള് !!