സിനിമാ പ്രേമികളുടെ ഇഷ്ട ചിത്രമായ മായാനദി അടുത്തതായി ബോളിവുഡിലേക്ക് റീമേക്ക് ചെയ്യുന്നുവെന്ന തരത്തില് റിപ്പോര്ട്ടുകള് വന്നിരിക്കുകയാണ്. അടുത്തിടെ നടന്ന മോഹന്ലാലിന്റെ നീരാളി എന്ന സിനിമയുടെ ഓഡിയോ ലോഞ്ചിനിടയിലാണ് പ്രഖ്യാപനമുണ്ടായത്. ഓഡിയോ ലോഞ്ചില് നടന് ടൊവിനോ തോമസും പങ്കെടുത്തിരുന്നു. മായാനദിയുടെ ബോളിവുഡ് റീമേക്കിലും ആഷിഖ് അബുവും സന്തോഷ് ടി കുരുവിളയും സഹനിര്മ്മാതാക്കളാണ്. ബോളിവുഡ് മറാത്തി നടന് പില്ഗോങ്കറും ചിത്രത്തിന്റെ നിര്മ്മാണ പങ്കാളികളില് ഒരാളാണ്. ചിത്രത്തിന്റെ മറ്റു അണിയപ്രവര്ത്തകരെക്കുറിച്ചുളള വിവരങ്ങളൊന്നും പുറത്തുവന്നിട്ടില്ല.
മായാനദിയിലെ പാട്ടുകളെല്ലാം തന്നെ ഹിറ്റ് ചാര്ട്ടുകളില് ഇടം നേടിയവയായിരുന്നു. റെക്സ് വിജയന് സംഗീതമൊരുക്കിയ ചിത്രത്തില് നാലു പാട്ടുകളായിരുന്നു ഉണ്ടായിരുന്നത്. ഇതില് എല്ലാ പാട്ടുകളും പ്രേക്ഷകര്ക്ക് ഇഷ്ടപ്പെട്ടവയായിരുന്നു. കൂട്ടത്തില് ഷഹബാസ് അമന് പാടിയ മിഴിയില് നിന്നും എന്ന് തുടങ്ങുന്ന ഗാനത്തിനായിരുന്നു കൂടുതല് സ്വീകാര്യത ലഭിച്ചിരുന്നത്. ഷഹബാസിന്റെ ആലാപനത്തിനൊപ്പം റെക്സിന്റെ സംഗീതവും ചേര്ന്നപ്പോഴാണ് പാട്ട് കൂടുതല് പ്രണയാര്ദ്രമായി മാറിയിരുന്നത്. ഈ പാട്ടിലൂടെ മികച്ച ഗായകനുളള സംസ്ഥാന പുരസ്കാരം ഷഹബാസ് അമന് ലഭിച്ചിരുന്നു.