(ജീവിതമാണ് കളിക്കളം. കളിയും സംഗരവുമൊരുപോലെ. അവിടെ തട്ടിത്തെറിച്ച് കറങ്ങിത്തിരിയുന്നത്, എക്കാലവും ഒരേയൊരു പന്ത്.)
പന്തുകളിയാണ്!
ആവേശത്തിലാകാശം മുഴങ്ങുന്നൂ ജനാരവം.
യുദ്ധവീരന്മാര്, ഭടന്മാര്
പൊരുതുകയാണിരുഭാഗവും,
സംഗരകേളീരംഗം കളിക്കളം.
മുറുകുന്നൂ കളി,
മൈതാനമദ്ധ്യത്തില്,
പറന്നതാ പരുന്തുപോലൊരുവന്,
റാഞ്ചിയ പന്തുണ്ടു കാല്പിടിയില്,
ഉള്ളംകയ്യിലെ നെല്ലിക്കപോലത്ര സുരക്ഷിതം !
ഇടതുവലതു കോണിലൂടെ ലക്ഷ്യം തേടി
മിന്നല്പോല് കുതിക്കയാണവന്.
കാണികളിരമ്പുന്നൂ,
കയ്യടികളുദ്വേഗങ്ങള്,
ഒന്നാംനിരയിലെ പടക്കുതിര,
പന്തൊന്നു തൊട്ടാല് വലയില് !
കളിയെപ്പൊഴും കളിയോ!
അടിക്കാന് കാലുയരുംമുന്നേ കുത്തിവീഴ്ത്തിയോ,
വീണുപിടയുന്നവന്.
ഒടിഞ്ഞിട്ടുണ്ടാം കൈകാല്കളോ നടുവോ.
താങ്ങുന്നുണ്ടാരൊക്കെയോ,
പൊക്കി നീക്കുന്നുണ്ടെങ്ങോട്ടോ.
ഇല്ലാ കളിക്കളത്തിലയാളിനി,
ഇല്ലാ കളിയ്ക്കരനിമിഷ വിരാമം.
പല കാല്കളില് തട്ടിത്തെറിച്ചും കറങ്ങിയും
എന്തെന്നുമേതെന്നുമറിയാ-
തുരുളുകയാണാപ്പന്ത്,
വിസ്തൃത മൈതാനത്തില്!