ന്യൂഡല്‍ഹി: അടുത്ത ലോക്‌സഭാ തെരഞ്ഞെടുപ്പിന്‌ മുമ്പ്‌ അയോധ്യയില്‍ രാമക്ഷേത്ര നിര്‍മാണം ആരംഭിക്കുമെന്ന്‌ ബിജെപി അധ്യക്ഷന്‍ അമിത്‌ ഷാ പറഞ്ഞതായുള്ള വാര്‍ത്തകള്‍ നിഷേധിച്ച്‌ പാര്‍ട്ടി നേതൃത്വം രംഗത്ത്‌. ബിജെപി ദേശീയ എക്‌സിക്യൂട്ടീവ്‌ അംഗം പെരള ശേഖര്‍ജിയുടെ വാക്കുകളെ ഉദ്ധരിച്ചാണ്‌ ദേശീയ മാധ്യമങ്ങള്‍ ഈ വാര്‍ത്ത റിപ്പോര്‍ട്ട്‌ ചെയ്‌തത്‌.

എന്നാല്‍, വാര്‍ത്ത പൂര്‍ണമായും തെറ്റാണെന്ന്‌ ബിജെപി ഹൈദരാബാദ്‌ ഘടകം വ്യക്തമാക്കി. തെലങ്കാനയില്‍ നടന്ന ചടങ്ങില്‍ രാമക്ഷേത്ര നിര്‍മാണവുമായി ബന്ധപ്പെട്ട ഒരു കാര്യവും ഷാ പരാമര്‍ശിച്ചില്ലെന്നാണ്‌ ബിജെപി നേതൃത്വം ട്വിറ്ററിലൂടെ അറിയിച്ചിരിക്കുന്നത്‌.

പാര്‍ട്ടി അധ്യക്ഷന്റെ വാക്കുകള്‍ തെറ്റായി വ്യാഖ്യാനിക്കപ്പെട്ടതാണെന്നും വിശദീകരണത്തിലുണ്ട്‌.