പ്രളയക്കെടുതി നേരിടുന്ന കേരളത്തിന്‌ വിദേശ ധനസഹായം നിഷേധിച്ച കേന്ദ്രസര്‍ക്കാര്‍ നിലപാടിനെതിരെ സി പി ഐ നേതാവ്‌ ബിനോയ്‌ വിശ്വം സുപ്രീം കോടതിയില്‍ ഹര്‍ജി നല്‍കി. നാശനഷ്ടം കണക്കാക്കുന്നതിനു മുമ്പ്‌ സഹായം നിഷേധിച്ചത്‌ നിയമവിരുദ്ധമാണെന്ന്‌ രാജ്യസഭാ എം പി കൂടിയായ ഹര്‍ജിക്കാരന്‍ ആരോപിച്ചു.

പ്രളയം മൂലമുണ്ടായ ആകെ നാശനഷ്ടങ്ങള്‍ കണക്കാക്കേണ്ടതുണ്ട്‌. നാശനഷ്ടങ്ങളുടെ കണക്കെടുക്കുന്നതിനു മുമ്പേ വിദേശസഹായം വേണ്ടെന്നു വയ്‌ക്കുന്നത്‌ ദുരന്തനിവാരണ നിയമത്തിന്റെയും ചട്ടങ്ങളുടെയും ലംഘനമാണെന്നാണ്‌ ബിനോയ്‌ വിശ്വത്തിന്റെ വാദം.


യുഎഇ ഭരണാധികാരിയുടെ സഹായവാഗ്‌ദാനം പുറത്തുവന്നത്‌ കഴിഞ്ഞ 18നായിരുന്നു. `ദുരിതബാധിതരെ സഹായിക്കാന്‍ യുഎഇയും ഇന്ത്യന്‍ സമൂഹവും ഒരുമിച്ച്‌ പ്രവര്‍ത്തിക്കും. അടിയന്തരസഹായം നല്‍കാന്‍ ഞങ്ങള്‍ ഒരു കമ്മിറ്റി രൂപീകരിച്ചിട്ടുണ്ട്‌' എന്നതായിരുന്നു ട്വീറ്ററിലൂടെയുള്ള സന്ദേശം.


എന്നാല്‍, 22ന്‌ കേരളം വിദേശസഹായം സ്വീകരിക്കുന്നത്‌ തടഞ്ഞ്‌ വിദേശ മന്ത്രാലയം വാര്‍ത്താകുറിപ്പിറക്കി. ഇതിനെതിരെ വ്യാപക പ്രതിഷേധം ഉയര്‍ന്നപ്പോഴാണ്‌ സംഘപരിവാറും ബിജെപി അനുകൂലികളും തെളിവ്‌ ആവശ്യപ്പെട്ട്‌ രംഗത്തുവന്നത്‌.