ലോകത്തിന്റെ ഒരു കോണിലുള്ള കേരളമെന്ന ഇന്ത്യയുടെ ഒരു ചെറു സംസ്ഥാനത്തിൽ നടക്കുന്ന രാഷ്ട്രീയ മത കോലാഹലങ്ങൾക്ക് പിന്തുണയുമായി അമേരിക്കൻ ഹൈന്ദവ മലയാളികൾ ശബ്ദകോലാഹലങ്ങൾ ഉയർത്തുന്നത് വിചിത്രം തന്നെ. 

പാരമ്പര്യത്തെ കാത്തു സൂക്ഷിക്കണമെന്ന് അവകാശപ്പെടുന്ന അമേരിക്കൻ ഹിന്ദു മലയാളികളെ, നിങ്ങൾ അയ്യപ്പൻറെ പാരമ്പര്യം എന്തെന്ന് വിലയിരുത്തിയിട്ടുണ്ടോ? ആര്യ ബ്രാഹ്മണർ കേരളത്തിൽ വരുന്നതിനു മുമ്പ് അതൊരു ബുദ്ധ സങ്കേതമായിരുന്നു. 

അമേരിക്കയും അയ്യപ്പനുമായി യാതൊരു ബന്ധവുമില്ല. പത്തു കാശ് നിങ്ങൾ അമേരിക്കയിൽ ഉണ്ടാക്കി തിരിച്ചുപോകാനാണ് പദ്ധതിയെങ്കിൽ ഒരു വിമാന ടിക്കറ്റ് എടുത്ത് കേരളത്തിൽ പോയി സമരം ചെയ്തുകൂടെ? ഈ നാട്ടിൽ കിടന്നു ഭ്രാന്ത് കളിച്ച് അന്ധവിശ്വാസങ്ങൾ സായിപ്പിനെയും അറിയിച്ച് അവരുടെ പരിഹാസം ഏറ്റുവാങ്ങണോ?

അയ്യപ്പൻറെ നൈഷ്ഠിക ബ്രഹ്മചര്യം എന്നൊക്കെ പറഞ്ഞാൽ സായിപ്പിന് മനസിലാവില്ല. ആർത്തവകാലം വൃത്തികെട്ടതെന്നു പറഞ്ഞു സ്ത്രീകളും സമരത്തിൽ ഏർപ്പെട്ടാൽ ശാസ്ത്ര ലോകം വരെ നിങ്ങളെ ചിരിച്ചു കളിയാക്കും. സ്ത്രീയെ കണ്ടാൽ അയ്യപ്പന് ബ്രഹ്മചര്യം ഇടിഞ്ഞു പോവുന്നുവെങ്കിൽ അയ്യപ്പൻറെ ദിവ്യത്വം ചോദ്യം ചെയ്യേണ്ടി വരും. 

അമേരിക്കയിൽ വന്നു കുടുംബം മെച്ചമാക്കാൻ ശ്രമിക്കുന്ന നിങ്ങൾ കുറച്ചുകൂടി യുക്തിസഹജമായി ചിന്തിക്കൂ. താണ ജാതികളിൽ അടിമത്ത്വം കൊണ്ടുവന്ന ഒരു ഹിന്ദു സമൂഹമാണ് ശബരിമല നിയന്ത്രിക്കുന്നത്. നായന്മാർ തൊട്ടു താഴ്ന്നവർ വരെയുള്ള സ്ത്രീജനങ്ങൾ ഒരു കാലത്ത് അവരുടെ മുമ്പിൽ മാറ് മറയ്ക്കാതെ ചെല്ലണമായിരുന്നു. ഇത്തരത്തിലുള്ള പാരമ്പര്യ ചരിത്രമുള്ളവരാണ് സുപ്രീം കോടതിയുടെ വിധിയെ ധിക്കരിച്ചുകൊണ്ടു സമരത്തിനിറങ്ങിയിരിക്കുന്നത്.

സതി, വർണ്ണ വിവേചനം, തൊട്ടുകൂടായ്മ, നഗ്ന സന്യാസികൾ എന്നതുപോലെ രക്തസ്രാവം അശുദ്ധമാണെന്നുള്ള ഇത്തരം പ്രചരണങ്ങൾ നടത്തി സായിപ്പിന്റെ നാട്ടിൽ ജീവിക്കുന്ന മറ്റു മലയാളികളെയും അയ്യപ്പ ഭക്തന്മാർ നാണം കെടുത്തുന്നു. സ്ത്രീകളെ കാണുമ്പോൾ പൊട്ടുന്ന അയ്യപ്പന്മാരുടെ വൃതാനുഷ്ഠാനത്തിന് എന്ത് അർത്ഥമാണുള്ളത്? ഹിന്ദു ഉണരുന്നത് ഇങ്ങനെയോ? 

ഈ വിധി നടപ്പാക്കുന്നതിൽ പിണറായി സർക്കാർ കാണിക്കുന്ന ആർജ്ജവത്തെ പിന്തുണക്കുന്നു. ബ്രിട്ടീഷ് ഭരണം ആയതു കൊണ്ട് മാത്രമാണ് ഭാരതത്തിൽ സതി നിറുത്തലാക്കാൻ സാധിച്ചത്. ഇന്നാണെങ്കിൽ  ഇങ്ങു അമേരിക്കയിലും സതി നടപ്പാക്കാൻ വേണ്ടി white house ലേക്കും മറ്റും റാലി നടത്തിയേനെ. ഹിന്ദു സഹോരങ്ങളോട് സഹതാപവും പുച്ഛവും തോന്നുന്നു. 

ഈ വിഷയത്തിൽ ക്രിസ്ത്യൻ പുരോഹിതരും മുസ്ലിം മുളളക്കമാരും കാണിക്കുന്ന താല്പര്യം ആണ് ഏറ്റവും രസകരം. ഒരു പുരോഹിതൻ ഇന്നലെ പറയുന്നത് കേട്ടു സുപ്രീം കോടതി വിധി മറികടക്കാൻ കേന്ദ്ര സർക്കാർ നിയമ ഭേദഗതി നടത്തണം എന്ന്. ഒരു സുപ്രീം കോടതി വിധിയുടെ പേരിൽ തമ്മിൽ അടി കൂടുന്ന യാക്കോബാ/ ഓർത്തഡോൿസ്  പാതിരി ആണെന്നതാണ് അതിലേറെ കൗതുകം.