കോഴിക്കോട്‌: ശബരിമലയില്‍ യുവതിപ്രവേശനത്തെ പിന്തുണച്ച്‌ ആര്‍.എസ്‌.എസ്‌ നേതാവ്‌ ആര്‍.ഹരിയുടെ പുതിയ പുസ്‌തകം. ശബരിമലയില്‍ വര്‍ഷത്തില്‍ 365 ദിവസവും ദര്‍ശനസൗകര്യമേര്‍പ്പെടുത്തണമെന്നും തിരക്ക്‌ കുറയ്‌ക്കാന്‍ പതിനെട്ടാംപടിയുടെ നീളംകൂട്ടണമെന്നും ഹരി എഴുതിയ `മാറ്റുവിന്‍ ചട്ടങ്ങളെ' എന്ന പുസ്‌തകത്തിലുണ്ടെന്ന്‌ ദേശാഭിമാനി റിപ്പോര്‍ട്ട്‌ ചെയ്യുന്നു.

സ്‌ത്രീകളെ വിലക്കി സമരം നടത്തുന്നതിനെയും അദ്ദേഹം എതിര്‍ക്കുന്നു. ആര്‍.എസ്‌.എസ്‌ അഖില ഭാരതീയ ബൗദ്ധിക്‌ പ്രമുഖായ ആര്‍.ഹരി ദീര്‍ഘകാലം കേരള പ്രാന്ത പ്രചാരകുമായിരുന്നു. പതിനഞ്ചോളം പുസ്‌തകങ്ങള്‍ രചിച്ച ഹരിയുടെ പുതിയ ഗ്രന്ഥമാണ്‌ `മാറ്റുവിന്‍ ചട്ടങ്ങളെ'.

ശബരിമല പ്രശ്‌നത്തില്‍ സംഘര്‍ഷവും സമരവും സൃഷ്ടിക്കുന്നതിനെയും പുസ്‌തകത്തില്‍ നിശിതമായി വിമര്‍ശിക്കുന്നുണ്ട്‌.


ദര്‍ശനവിലക്ക്‌ നീക്കുന്നതോടൊപ്പം സ്‌ത്രീകളെ ബോധവല്‍ക്കരിച്ച്‌ പ്രബുദ്ധകളാക്കണം. പ്രവേശനകാര്യത്തില്‍ തുടക്കത്തില്‍ പരിഷ്‌കരണക്കാര്‍ പരാജയപ്പെട്ടാലും ഒടുക്കം വിജയമുണ്ടാകും- പുസ്‌തകത്തില്‍ പറഞ്ഞു.

ആര്‍.എസ്‌.എസിലെ ഒരുവിഭാഗത്തിന്റെ എതിര്‍പ്പിനെ തുടര്‍ന്ന്‌ പുസ്‌തകം പ്രസാധകരായ കുരുക്ഷേത്ര പ്രകാശന്‍ അടുത്തകാലത്ത്‌ പിന്‍വലിച്ചു. എന്നാല്‍, പുസ്‌തകത്തിന്‌ വിലക്കില്ലെന്നും വില്‍പ്പനയിലില്ലെന്നുമാണ്‌ ഇതിനെക്കുറിച്ച്‌ പ്രസാധകര്‍ നല്‍കുന്ന വിശദീകരണം.

നേരത്തെ ശബരിമലയില്‍ എല്ലാ പ്രായത്തിലുമുള്ള സ്‌ത്രീകളെ പ്രവേശിപ്പിക്കണമെന്നായിരുന്നു ആര്‍.എസ്‌.എസും ബി.ജെ.പിയും സ്വീകരിച്ച നിലപാട്‌.