തിരുവനന്തപുരം: ശബരിമലയെ രാഷ്ട്രീയ ലക്ഷ്യത്തിന്‌ ആര്‍ക്കും വിട്ടു തരില്ലെന്നും സംഘപരിവാര്‍ അജണ്ട ശബരമലയില്‍ നടപ്പാക്കാന്‍ അനുവദിക്കില്ലെന്നും മുഖ്യമന്ത്രി പിണറായി വിജയന്‍. തിരുവനന്തപുരത്ത്‌ വാര്‍ത്താ സമ്മേളനത്തിലാണ്‌ ശബരിമല വിഷയത്തില്‍ നിലപാട്‌ വീണ്ടും കടുപ്പിച്ച്‌ മുഖ്യമന്ത്രി രംഗത്തെത്തിയത്‌.


ഒരു കേന്ദ്രമന്ത്രി കഴിഞ്ഞ ദിവസം ശബരിമല സന്ദര്‍ശിച്ചിട്ട്‌ സുപ്രീംകോടതി വിധിയെക്കുറിച്ച്‌ ഒന്നും പറഞ്ഞു കണ്ടില്ല. ബിജെപിയുടെ ദേശീയ നേതാക്കള്‍ ശബരിമല ദര്‍ശനത്തിന്‌ വരുമെന്ന്‌ കേള്‍ക്കുന്നു. ദര്‍ശനത്തിനാണ്‌ വരുന്നതെങ്കില്‍ അവര്‍ക്ക്‌ എല്ലാ സൗകര്യവും ചെയ്‌തു കൊടുക്കും. മറിച്ച്‌ സംഘര്‍ഷമുണ്ടാക്കുകയാണ്‌ ലക്ഷ്യമെങ്കില്‍ ആ നിലയ്‌ക്ക്‌ അതിനെ കാണേണ്ടി വരുമെന്നും മുഖ്യമന്ത്രി മുന്നറിയിപ്പ്‌ നല്‍കി.

ശബരിമലയെ കലാപ ഭൂമിയാക്കാന്‍ അനുവദിക്കുന്ന പ്രശ്‌നമില്ല. അവിടെ പ്രഖ്യാപിച്ചിരിക്കുന്ന നിരോധനാജ്ഞ കൂട്ടം കൂടാന്‍ പാടില്ല എന്ന ഉദ്ദേശം വച്ചുള്ളതല്ല. ക്രമസമാധാന പ്രശ്‌നമുണ്ടായപ്പോള്‍ പ്രതിഷേധങ്ങള്‍ സന്നിധാനത്ത്‌ വരാതിരിക്കുന്നതിനും പ്രതിഷേധക്കാര്‍ കൂട്ടംകൂടി ഭക്തരെ തടയുന്ന സ്ഥിതിയുണ്ടാകാതിരിക്കാനുമാണെന്നും മുഖ്യമന്ത്രി വ്യക്തമാക്കി.