ശബരിമല സന്നിധാനത്തെ മൂന്നാം ഘട്ട പൊലീസ് വിന്യാസത്തില്‍ ചുമതല നല്‍കിയിരുന്ന ഐ.ജി ശ്രീജിത്ത് ഡ്യൂട്ടി ഏറ്റെടുക്കാനെത്തിയില്ല. തുടര്‍ന്ന് ചുമതല ഡിഐജി കെ സേതുരാമന് കൈമാറി.

ഔദ്യോഗിക തിരക്കുകള്‍ കാരണമാണ് ഐ ജി ചുമതല ഏല്‍ക്കാത്തതെന്നാണ് പൊലീസിന്റെ ഔദ്യോഗിക വിശദീകരണം. മൂന്നാം ഘട്ടത്തില്‍ നിയമിച്ച മറ്റ് എല്ലാം ഉദ്യോഗസ്ഥരും ചുമതല ഏറ്റെങ്കിലും ശ്രീജിത്ത് മാത്രമാണ് എത്താതിരുന്നത്.

ശബരിമലയില്‍ പ്രതിഷേധങ്ങള്‍ അല്‍പ്പം ഒതുങ്ങി നില്‍ക്കുന്ന വേളയില്‍ വീണ്ടും പ്രകോപനം സൃഷ്ടിക്കേണ്ട എന്ന സര്‍ക്കാര്‍ നിര്‍ദേശത്തെ തുടര്‍ന്നാണ് ഐ ജി ശ്രീജിത്ത് ചുമതല ഏല്‍ക്കാത്തതെന്നും റിപ്പോര്‍ട്ടുണ്ട്.

ശബരിമലയില്‍ സന്ദര്‍ശനം നടത്താനെത്തിയ ആക്ടിവിസ്റ്റ് രഹ്ന ഫാത്തിമയ്ക്ക് പൂര്‍ണ്ണ സുരക്ഷ നല്‍കി സന്നിധാനത്ത് എത്തിക്കാന്‍ ശ്രമിച്ചതിന്റെ പേരില്‍ ശ്രീജിത്ത് ഏറെ പഴി കേട്ടിരുന്നു. പിന്നീട് അയ്യപ്പന് മുന്നിലെത്തി കണ്ണുനിറഞ്ഞു പ്രാര്‍ത്ഥിച്ചതുമൊക്കെ ഏറെ ചര്‍ച്ചയായിരുന്നു.