ലക്നൗ: യുട്യൂബ് വീഡിയോയുടെ സഹായത്തോടെ വീട്ടില് പ്രസവിച്ച അവിവാഹിതയായ ഇരുപത്താറുകാരിയും ആണ് കുഞ്ഞും മരിച്ചു.
ലക്നൗവിലെ ബിലാദ്പൂരിലെ വാടക വീട്ടിലാണ് സംഭവം.ബഹ്റെയ്ച്ച് സ്വദേശിനിയാണ് യുവതി.
ഗര്ഭിണിയാണെന്ന വിവരം യുവതി വീട്ടുകാരില് നിന്നുപോലും മറച്ചുവച്ചു. പ്രസവം അടുത്തതോടെ നാലുദിവസം മുമ്ബാണ് യുവതി വാടക വീടെടുത്തത്. അവിവാഹിതയായ താന് പ്രസവിച്ചാല് ഉണ്ടാകാവുന്ന പ്രശ്നങ്ങളെ ഭയന്നാണ് യുവതി യുട്യൂബ് വീഡിയോയുടെ സഹായത്തോടെ പ്രസവിക്കാന് തീരുമാനിച്ചതെന്നാണ് പൊലീസ് കരുതുന്നത്. കുഞ്ഞിനെ പുറത്തെടുക്കുന്നതില് വന്ന പാളിച്ചയും അമിത രക്തസ്രാവവുമാണ് മരണകാരണമെന്നാണ് ആശുപത്രി അധികൃതര് പറയുന്നത്.
മുറിക്ക് പുറത്തേക്ക് രക്തം ഒഴുകിവരുന്നതുകണ്ട അയല്വാസിയാണ് വിവരം പൊലീസിനെ അറിയിച്ചത്. മുറി തുറന്ന് പരിശോധിച്ചപ്പോഴാണ് മൃതദേഹങ്ങള് കണ്ടെത്തിയത്.മുറിയില് നിന്ന് യുവതിയുടെ ഫോണും കത്രികയും ബ്ലേഡും നൂലും പൊലീസിന് ലഭിച്ചു.
നാല് വര്ഷമായി ഗൊരക്പൂരില് താമസിച്ച് മത്സരപരീക്ഷകള്ക്കായി തയാറെടുക്കുകയായിരുന്നു യുവതി.
മകള് അവിവാഹിതയാണെന്ന് മാതാപിതാക്കളും സമ്മതിച്ചു. സംഭവത്തില് പരാതിപ്പെടാനോ യുവതിയുമായി ബന്ധമുണ്ടായിരുന്ന യുവാവിനെപ്പറ്റിയുള്ള ബന്ധങ്ങള് വെളിപ്പെടുത്താനോ കുടുംബം തയ്യാറായിട്ടില്ല. പൊലീസ് കേസെടുത്ത് അന്വേഷണം ആരംഭിച്ചു.