ഭൂമിയില് സമാധാനം വരുത്തുവാന് ഞാന് വന്നിരിക്കുന്നു എന്നു തോന്നുവോ? അല്ലല്ല ഛിദ്രം വരുത്തുവാന് അേ്രത എന്നു ഞാന് നിങ്ങളോടു പറയുന്നു- ഇനിമേല് ഒരു വീട്ടില് ഇരുവരോടു മൂവരും, മൂവരോടു ഇരുവരും അങ്ങിനെ അഞ്ചുപേര് തമ്മില് ഛിദ്രിച്ചിരിക്കും. അപ്പന് മകനോടും, മകന് അപ്പനോടും, അമ്മ മകളോടും, മകള് അമ്മയോടും, മരുമകള് അമ്മാവിയമ്മയോടും ഛിദ്രിച്ചിരിക്കും'.(ലൂക്കോസ് എഴുതിയ സുവിശേഷം- അദ്ധ്യായം 12:51-53)
ഈ വചനങ്ങളുടെ നാണം കെട്ട പൂര്ത്തീകരണമാണ് കഴിഞ്ഞ കുറേ നാളുകളായി കേരളത്തിലെ ചില ക്രിസ്തീയ വിഭാഗങ്ങള് അരങ്ങേറിക്കൊണ്ടിരിക്കുന്നത് ആചാര അനുഷ്ഠാനങ്ങളില് യാതൊരു വ്യത്യാസവും ഇല്ലാത ത പണ്ട് ഒന്നായിരുന്ന, ഇപ്പോള് അധികാരത്തിനും പണത്തിനും വേണ്ടി മാത്രം രണ്ടായി പിരിഞ്ഞ് തെരുവില് തമ്മില്ത്തല്ലുന്ന ഒരു സഭയുടെ ഹീനമായ പ്രവൃത്തികള് കാണുമ്പോള്, മുകളില് പറഞ്ഞിരിക്കുന്ന ദൈവവചനങ്ങള് വലിയ വ്യാഖ്യാനങ്ങള്ക്കൊന്നും പോകാതെ, അക്ഷരാര്ത്ഥത്തില് തന്നെ എടുക്കുന്നതാണു നല്ലതെന്നു തോന്നുന്നു.
1934-ലെ സുപ്രീംകോടതി വിധിയുടെ അടിസ്ഥാനത്തില് പള്ളിയുടെ സ്ഥാവരവസ്തുജംഗമങ്ങളുടേയും, ഭരണത്തിന്റേയും അധികാരം ഓര്ത്തഡോക്സ് സഭയ്ക്കും, ആത്മീയ ഉന്നാധികാര പദവി അന്ത്യോക്യാ പാത്രിയര്ക്കീസിനുമാണത്രേ!
ഈ വിധി വന്നതിനുശേഷം ഈ രണ്ടു വിഭാഗങ്ങള് തമ്മിലുള്ള തമ്മില്ത്തല്ല് നിരന്തരം തുടരുകയാണ്.
മൃതശരീരം സെമിത്തേരിയില് അടക്കുവാന് സമ്മതിക്കാതെ, ദിവസങ്ങളോളം വഴിയില് തടഞ്ഞുവെയ്ക്കുക, കമ്പിപ്പാരയും, ഇരുമ്പുകൂടങ്ങളും, കരിങ്കല്ലുകളും ഉപയോഗിച്ച് പള്ളിവാതിലുകള് അടിച്ചുതകര്ത്ത്് അകത്തുകയറി വിശുദ്ധ കുര്ബാന അര്പ്പിച്ച് ദൈവത്തെ സന്തോഷഷിപ്പിക്കുക, അതിനുശേഷം വീണ്ടും പുറത്തിറങ്ങി കൈയാങ്കളിയില് ഏര്പ്പെടുക, പോലീസുകാരെ തെറിപറയുക, പരസ്പരം ജൗളി പൊക്കി കാണിക്കുക തുടങ്ങിയ കലാപരിപാടികള് ദിനംപ്രതി അരങ്ങേറുന്നുണ്ട്.
ഈയടുത്ത കാലത്ത് ഒരു പുരോഹിതന്, തന്റെ കൂപ്പായം പൊക്കിക്കാണിക്കുവാന് ബുദ്ധിമുട്ടുള്ളതുകൊണ്ട് അടുത്തു നിന്ന കപ്യാരുടെ മുണ്ടുപൊക്കിക്കാണിച്ച് പ്രതിഷേധം പ്രകടിപ്പിച്ചത്ര.
'എന്റെ ആലയം പ്രാര്ത്ഥനാലയം എന്നു വിളിക്കപ്പെടും-
നിങ്ങളോ അതിനെ കള്ളന്മാരുടെ ഗുഹയാക്കിത്തീര്ത്തിരിക്കുന്നു.(മത്തായി 21:13)
അടി നടക്കുന്നത് പ്രധാനമായും പണവും പദവിയുമുള്ള പള്ളികള്ക്കു വേണ്ടിയാണ്- പിറവം വലിയ പള്ളി, മണാര്കാട് പള്ളി, കോതമംഗലം പള്ളി- തുടങ്ങിയവ. ഇവിടെയെല്ലാം തൊണ്ണൂറു ശതമാനത്തിലധികം ആളുകള് അന്ത്യോക്യാ സിംഹാസനത്തിന്റെ മേധാവിത്വം അംഗീകരിക്കുന്നവരാണ്. സുപ്രീംകോടതിയല്ല, സാക്ഷാല് ദൈവം തമ്പുരാന് ഇറങ്ങി വന്നാലും ഈ പള്ളികളൊന്നും യാക്കോബായ വിഭാഗം, ഓര്ത്തഡോക്സുകാര്ക്കു വിട്ടു കൊടുക്കില്ല.
വിധിയില് കടിച്ചുതൂങ്ങി നില്ക്കാതെ, ഒരു സമവായത്തിലൂടെ, കിട്ടാനുള്ള വിഹിതവും വാങ്ങിപ്പിരിയുന്നതാണ് ഇരുകൂട്ടര്ക്കും നല്ലത്.
അല്ലെങ്കില് ഇനിയും കോടിക്കണക്കിനു രൂപാ കേസു നടത്തിപ്പിനു വേണ്ടി പ്രഗത്ഭരായ അഭിഭാഷകര്ക്കു കൊടുത്തു കൊണ്ടേയിരിക്കാം.
അതിനുവേണ്ടി സുനാമി, ഓഖി, പ്രളയക്കെടുതി തുടങ്ങിയ പേരുകളില് ഇഷ്ടം പോലെ ഫണ്ടു പിരിക്കാം.
മെത്രാന്മാര് വിവാഹകൂദാശകള്ക്കു വാങ്ങിക്കുന്ന 'കൈമുത്തിനു' വല്ല കണക്കുമുണ്ടോ-
സഭയുടെ വിദ്യാഭ്യാസ സ്ഥാപനങ്ങളിലെ നിയമനത്തിനു 'ഡൊണേഷന്' എന്ന ഓമനപ്പേരില് വാങ്ങുന്ന കോടിക്കണക്കിനു രൂപയ്ക്കു വല്ല കണക്കുമുണ്ടോ- ഇതൊക്കെ എവിടേക്കാണ് ഒഴുകുന്നത്?
കേരളത്തില് നിന്നും അമേരിക്കയിലേക്കു കുടിയേറിപ്പാര്ക്കുന്ന ക്രിസത്യന് വിഭാഗങ്ങള്, ഭാവിയില് ഇന്ത്യയേപ്പോലെയുള്ള വിദേശ ശക്തികളുടെ മേല്ക്കോയ്മ അംഗീകരിക്കില്ല എന്നു വന്നാല്, കേരളത്തിലെ സഭകള്ക്കു ഏതു കോടതിയില് കേസു ഫയലു ചെയ്യുവാന് കഴിയും? ഒന്നാം തലമുറ ഭക്തന്മാര് മിക്കവാറും മണ്മറഞ്ഞു-രണ്ടാം തലമുറയില്പ്പെട്ട തൊണ്ണൂറു ശതമാനത്തിലധികവും അമേരിക്കന് സിറ്റിസണ്ഷിപ്പ് എടുത്തവരാണ്. മൂന്നാം തലമുറ പൂര്ണ്ണമായും അമേരിക്കയില് ജനിച്ച അമേരിക്കന് പൗരന്മാരാണ്.
അവരൊന്നു മാറിചിന്തിക്കുന്ന കാലം അനതിവിദൂരമല്ല. അതിനുള്ള ചരടുവലികള് അണിയറയില് തുടങ്ങിക്കഴിഞ്ഞിരിക്കുന്നു എന്നാണ് പിന്നാമ്പുറ വാര്ത്തകള്- അമേരിക്കയിലും ഒരു സ്വതന്ത്ര ഭരണാധികാരമുള്ള സഭ വരുവാന് പോകുന്നു.
വഴക്കുണ്ടാക്കുവാന് ഏറ്റവും അനുകൂലമായ സാഹചര്യം ഈ വലിയ നോമ്പുകാലമാണ്.
യഹൂദന്മാര് ഒരു തവണ യേശുക്രിസ്തുവിനെ ക്രൂശിച്ചുള്ളൂ- ക്രിസ്ത്യാനികള് ക്രിസ്തുവിനെ നിരന്തരം ക്രൂശിച്ചുകൊണ്ടേയിരിക്കുന്നു.
എല്ലാവര്ക്കും ഈസ്റ്റര് മംഗങ്ങള്!