ലക്നോ: തെരഞ്ഞെടുപ്പ് പ്രചാരണത്തിനിടെ വീണ്ടും വിവാദ പരാമര്ശവുമായി കേന്ദ്ര വനിത ശിശുക്ഷേമ മന്ത്രി മേനക ഗാന്ധി. വോട്ടു കുറഞ്ഞാല് വികസനം കുറയുമെന്നും വോട്ടുകളുടെ എണ്ണമനുസരിച്ച് ഗ്രാമങ്ങളെ എ, ബി, സി, ഡി എന്നിങ്ങനെ തരംതിരിച്ചാകും വികസനം നടത്തുകയെന്നും മേനക ഗാന്ധി പറഞ്ഞു. സുല്ത്താന്പുരിലെ ബിജെപി തെരഞ്ഞെടുപ്പ് റാലിയിലായിരുന്നു കേന്ദ്രമന്ത്രിയുടെ വിവാദ പരാമര്ശം. ബിജെപിക്കു 80 ശതമാനം വോട്ടു കിട്ടുന്ന ഗ്രാമങ്ങള് എ കാറ്റഗറി, 60 ശതമാനം വോട്ടു കിട്ടുന്ന ഗ്രാമങ്ങള് ബി കാറ്റഗറി, 50 ശതമാനം വോട്ടു ലഭിക്കുന്ന ഗ്രാമങ്ങള് സി കാറ്റഗറി, 30 ശതമാനവും അതിനു താഴെയും വോട്ടു കിട്ടുന്ന ഗ്രാമങ്ങള് ഡി കാറ്റഗറി എന്നിങ്ങനെ തരംതിരിച്ച് വികസനം നടത്തുമെന്ന് മേനക ഗാന്ധി ജനങ്ങളോടു പറഞ്ഞു. താന് മുന്പ് മത്സരിച്ച പിലിഭിത്തില് ഈ സംവിധാനം മികച്ച രീതിയില് നടത്തിയിരുന്നെന്നും ഇവിടെ ഏതു കാറ്റഗറിയില് ഉള്പ്പെടണം എന്നത് ജനങ്ങള് തീരുമാനിക്കട്ടെയെന്നും സുല്ത്താന്പൂരിലെ ബിജെപി സ്ഥാനാര്ഥിയായ മേനക പറഞ്ഞു.നേരത്തെ, തനിക്കു വോട്ട് ചെയ്തില്ലെങ്കില് മുസ്ലിംകള്ക്കു തൊഴില് നല്കാനാവില്ലെന്നു പറഞ്ഞും മേനക ഗാന്ധി ഭീഷണി മുഴക്കിയിരുന്നു. സുല്ത്താന്പൂരിലെ മുസ്ലിം ഭൂരിപക്ഷ ഗ്രാമമായ തുറാബില് തെരഞ്ഞെടുപ്പു റാലിയില് പ്രസംഗിക്കവെയായിരുന്നു കേന്ദ്രമന്ത്രിയുടെ വിവാദ പരാമര്ശം.
മകന് വരുണ് ഗാന്ധി മത്സരിച്ചിരുന്ന സുല്ത്താന്പൂരിലാണ് ഇത്തവണ മേനക ഗാന്ധി മത്സരിക്കുന്നത്. മേനക മത്സരിച്ചിരുന്ന പിലിഭിത്തില് വരുണ് ഗാന്ധി ബിജെപി സ്ഥാനാര്ഥിയായി മത്സരിക്കും.