സുല്‍ത്താന്‍ ബത്തേരി: നരേന്ദ്രമോദിയെപ്പോലെ മന്‍ കി ബാത്തിനല്ല താന്‍ വയനാട്ടിലെത്തിയതെന്ന്‌ കോണ്‍ഗ്രസ്‌ അധ്യക്ഷന്‍ രാഹുല്‍ ഗാന്ധി. നിങ്ങളുടെ ഹൃദയമറിയാനും നിങ്ങളിലൊരാളായി പ്രവര്‍ത്തിക്കാനുമാണ്‌ താന്‍ എത്തിയതെന്നും വയനാട്ടുകാര്‍ക്കൊപ്പം എക്കാലവും താനുണ്ടാകുമെന്നും അദ്ദേഹം സുല്‍ത്താന്‍ ബത്തേരിയില്‍ തിരഞ്ഞെടുപ്പ്‌ പ്രചാരണ പരിപാടിയില്‍ പ്രസംഗിക്കവെ പറഞ്ഞു.


കുറച്ചുകാലത്തേയ്‌ക്കു മാത്രമായല്ല താന്‍ വയനാട്ടിലെത്തിയിരിക്കുന്നതെന്നും രാഹുല്‍ ഗാന്ധി പറഞ്ഞു. നിങ്ങളുടെ മകനും സഹോദരനുമാണ്‌ ഞാന്‍ നിങ്ങള്‍ക്കുമുന്നിലെത്തിയിരിക്കുന്നത്‌. അതുകൊണ്ട്‌ ജീവിതകാലം മുഴുവന്‍ നിങ്ങളോടൊപ്പം ഞാനുണ്ടാകുമെന്ന്‌ ഉറപ്പു നല്‍കുന്നതായും രാഹുല്‍ ഗാന്ധി പറഞ്ഞു.

സമാധാനപൂര്‍ണമായ സഹവര്‍ത്തിത്വത്തിന്റെ ഉത്തമ മാതൃകയാണ്‌ കേരളം. രാജ്യത്തിന്റെ ഇതര ഇടങ്ങളിലുള്ളവര്‍ക്ക്‌ ഈ നാട്ടില്‍നിന്ന്‌ പഠിക്കാനുണ്ടെന്നും മറ്റുള്ളവരെ എങ്ങനെ ആദരിക്കണമെന്നും ബഹുമാനിക്കണമെന്നും കേരളീയര്‍ക്കറിയാമെന്നും രാഹുല്‍ പറഞ്ഞു.