വാരാണസി: സ്വന്തം
തട്ടകത്തിലെ തെരഞ്ഞെടുപ്പ് പ്രചാരണത്തിന് ഔദ്യോഗിക തുടക്കം കുറിച്ച്
പ്രധാനമന്ത്രി നരേന്ദ്ര മോദി. വാരാണാസിയില് റോഡ് ഷോയോടെയാണ് മോദി പ്രചാരണത്തിന്
തുടക്കം കുറിച്ചത്. ഏഴ് കിലോമീറ്റര് നീളുന്ന റോഡ്ഷോയില് വലിയ
ജനപങ്കാളിത്തമുണ്ട്. റോഡ് ഷോ വലിയ ശക്തിപ്രകടനമാക്കി കിഴക്കന് യുപിയില് വലിയ
തരംഗമുണ്ടാക്കാനാണ് ബി.ജെ.പിയുടെ ശ്രമം.
നാളെ നാമനിര്ദ്ദേശ പത്രിക
സമര്പ്പിക്കാനിരിക്കെയാണ് ബനാറസില് നിന്ന് നരേന്ദ്രമോദിയുടെ റോഡ് ഷോ
തുടങ്ങിയത്. ബനാറസ് ഹിന്ദു സര്വകലാശാല കവാടം മുതല് ദശാശ്വമേധ് ഘാട്ടുവരെയാണ്
റോഡ് ഷോ. ഹിന്ദു മഹാ സഭാ നേതാവ് മദന് മോഹന് മാളവ്യയുടെ പ്രതിമയില്
പുഷ്പാര്ച്ചന നടത്തിയശേഷമാണ് മോദി റോഡ് ഷോ ആരംഭിച്ചത്.
വാഹനത്തില്
ഒറ്റക്കാണ് മോദി സഞ്ചരിച്ചത്. യോഗി ആദിത്യനാഥ്, അനുപ്രിയ പട്ടേല് തുടങ്ങിയ
നേതാക്കള് മറ്റൊരു വാഹനത്തില് മോദിയെ അനുഗമിച്ചു.