വാർദ്ധക്യകാലത്ത് വാപൊത്തി നിൽക്കും.

അക്ഷരം തെളിയുന്നില്ല 

അർത്ഥവും അവ്യക്തമാണ് 

വാർദ്ധക്ക്യം വന്നതാവാം 

കാലത്തിൻ ലീലകളെ 

തട്ടി നീക്കാവതല്ലാർക്കും 

വന്നു കേറും ഒരിക്കൽ 

തലയിൽ വെള്ളി കെട്ടും 

പല്ലിളക്കും, നടുവോടിക്കും 

കാൽ വളക്കും, കയ്യിൽ 

വച്ചുതരുമൊരു വളഞ്ഞ വടി

നടന്നുകൊൾക നീ 

അങ്ങ് കാണുമാ കുഴിമാടത്തിലേക്ക് 

വില്ലനാം മനുഷ്യാ നീ

എന്ന് കാസരോഗിയെ പോലെ 

ശാന്തമായി ചൊല്ലിടും-

വാർദ്ധക്ക്യം എന്റെ പിതാമഹാൻ 

വളരുന്ന കാലത്ത്  വടി കൊണ്ടാടിച്ചോർ 

വാർദ്ധക്യം വന്നു വടിയായി പോയി 

വാപൊത്താൻ കഴിയാതെ വൃദ്ധനായെന്നെ   

വളർന്നെന്റെ മക്കൾ  വൃദ്ധസദനത്തിലാക്കി 

അഭിപ്രായ കവിതകൾക്കും നമ്മളെ ചിന്തിപ്പിക്കാൻ കഴിയും എന്നതിന്റെ പല ഉദാഹരണങ്ങളും ഈ-മലയാളിയുടെ പ്രതികരണ ഭാഗത്ത് കാണാൻ കഴിയും.  

"വളരുന്നകാലത്ത് വടികൊണ്ടടിച്ചാൽ

വാർദ്ധക്യകാലത്ത് വാപൊത്തി നിൽക്കും."  എന്ന വായനക്കാരന്റെ അഭിപ്രായത്തോട് വിദ്യാധരൻ പ്രതികരിച്ചത് നോക്കുക 

"വളരുന്ന കാലത്ത്  വടി കൊണ്ടാടിച്ചോർ 

വാർദ്ധക്യം വന്നു വടിയായി പോയി 

വാപൊത്താൻ കഴിയാതെ വൃദ്ധനായെന്നെ   

വളർന്നെന്റെ മക്കൾ  വൃദ്ധസദനത്തിലാക്കി"

അച്ചടക്കം ഇല്ലായ്മ  ജീവിതത്തിന്റെ എല്ലാ തലങ്ങളിലും  കുഴപ്പങ്ങൾ സൃഷ്ടിക്കുന്നു. വളരുന്ന കാലത്ത് ശിക്ഷണത്തിൽ (സ്പാങ്കിംഗ് പണ്ട് അമേരിക്കയിൽ അനുവതിച്ചിരുന്നു) വളർത്തിയിരുന്നു എങ്കിൽ എന്നുള്ള വായനക്കാരന്റെ അഭിപ്രായത്തോട് വിദ്യാധരൻ കൂട്ടി ചേർത്തിരിക്കുന്നത് ചിന്തനീയം തന്നെയാണ്.  വാർദ്ധക്ക്യത്തിന്റെ ഏകാന്തത ഭയാനകം ആണ്. ജീവിതത്തിൽ അച്ചടക്കം ഇല്ലായ്മയും, മൂല്യങ്ങളുടെ നാശവും, പണവും കീർത്തിയിലൂടയും പ്രതാപത്തിലൂടെയും എല്ലാം നേടാം എന്നുള്ള മനുഷ്യന്റെ മനോഭാവം പല പ്രായം ആയവരേയും വൃദ്ധസദനങ്ങളിൽ എത്തിച്ചിരിക്കുകയാണ്. ഇതിൽ പ്രായം ആയ എന്നെ പോലെയുള്ളവരും കുറ്റക്കാരാണ്. ഒരു പക്ഷെ കർമ്മ ഫലം എന്നൊക്കെ പറയുന്നത് ഇതൊക്കെ തന്നെ ആയിരിക്കും. വിദ്യാധരന്റെ  പല ചെറു അഭിപ്രായ  കവിതകളും ചിന്തോദ്ദീപകമാണ്. നന്ദി