വിരോധാഭാസം (കവിത : ശ്രീകുമാര്‍ പുരുഷോത്തമന്‍ )
ശ്രീകുമാര്‍ പുരുഷോത്തമന്‍ Published on 28 February, 2014
സാമ്രാജ്യത്ത ശക്തിയാണെങ്കിലും
ബര്‍മിങ്ങാമില്‍ മോനെ അയക്കണം
കാപ്പിറ്റേഷന്‍ നിഷിദ്ധമാണെങ്കിലും
ഊട്ടിയില്‍ വിട്ടു ഡോക്ടറാക്കീടേണം
സ്വാശ്രയങ്ങള്‍ വിരുദ്ധമാണെങ്കിലും
മറ്റാശ്രയങ്ങള്‍ ഒന്നുമേ ഇല്ലഹോ !!!
തൊഴിലില്ലാപ്പട പെരുകുമെന്നാകിലും
സോഫ്റ്റ്‌വെയറില്‍ ഭാവി കണ്ടീടുന്നു
ഒരു ദൈവമെന്നോതിയ വര്യനെ
ദൈവമാക്കി പൂജ നടത്തുന്നു
ഗുരുവചനങ്ങള്‍ ഉച്ചത്തില്‍ ഘോഷിച്ചു
ഗുരുവിനെ വിറ്റു പോക്കറ്റിലാക്കുന്നു
മദ്യപാനം ഗുരുദോഷമെങ്കിലും
മദ്യം വിറ്റു കീശ വീര്‍പ്പിക്കുന്നു
ജാതിഭേദം വളര്‍ത്തി കൊഴുപ്പിച്ചു
ജാതിസ്പര്‍ദ്ധ ഇരട്ടിയാക്കീടുന്നു
തീവ്രവാദികള്‍ ദിവ്യന്മാരാകുന്നു
വേദി പങ്കിട്ടു കുശലം പറയുന്നു
എതിര് നിന്ന് കടകം പയറ്റിയോര്‍
കൈകള്‍ കോര്‍ത്ത് സുഹൃത്തുക്കളാകുന്നു
കാവിമണ്ണില്‍ കരിഞ്ഞ തീവണ്ടിയില്‍
സോദര സ്‌നേഹം ഉച്ചത്തിലാകുന്നു
മാപ്പപേക്ഷിച്ചു കൊഞ്ഞനം കുത്തുന്നു
അവസരത്തിനായ് കാതോര്‍ത്തു നില്ക്കുന്നു
ഗാന്ധിചിത്രം തൂക്കിയതിന്‍ താഴെ
ഗാന്ധി നോട്ടുകള്‍ കൈമാറ്റം ചെയ്യുന്നു
ശുഭ്രവസ്ത്രം കളങ്കിതമാകുന്നു
അഴിമതിയില്‍ മുങ്ങിക്കുളിക്കുന്നു
സായിപ്പിന്‍ ഭാഷ വര്‍ജ്യമാണെങ്കിലും
മക്കളൊക്കെയും ഇംഗ്ലീഷ് മൊഴിയണം
ഇവ്വിധങ്ങളൊക്കെയുമെന്‍ നാട്ടില്‍
വാക്കിനെതിരെ പ്രവര്‍ത്തിയൊഴുകുന്നു !!!
Facebook Comments
Comments
Baby thottakara 2014-03-12 14:25:14
Very good...keep writing more.
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala