ന്യൂജേഴ്സി: നവംബര് മാസം 18,19,20 തീയതികളിലായി ന്യൂജേഴ്സിയിലെ ഇസ്ലിന് ടൗണിലെ
റിനൈസന്സ് ഹോട്ടലില് ഒരു അന്താരാഷ്ട്ര കണ്വെന്ഷന്കൂടി അരങ്ങേറി. ഗ്ലോബല്
ഓര്ഗനൈസേഷന് ഓഫ് പീപ്പിള് ഓഫ് ഇന്ത്യന് ഒറിജിന് (ഗോപിയോ) എന്ന സംഘടനയുടെ
കണ്വെന്ഷനായിരുന്നു ഇത്. ആ കണ്വെന്ഷനില് പങ്കെടുക്കാന് സാധിച്ചത് നല്ലൊരു
അവസരമായി ഈ ലേഖകന് കരുതുന്നു.
പേര് സൂചിപ്പിക്കുന്നതുപോലെ തന്നെ ഈ
സംഘടനയുടെ പ്രവര്ത്തനമേഖലയും വളരെ വിശാലമാണ്. ഈ ഭൂലോകത്ത് എവിടെ
താമസിക്കുന്നവര്ക്കും ഈ സംഘടനയില് അംഗമാകാം. പ്രവര്ത്തിക്കാം. എന്നാല് ഇവര്
ഇന്ത്യക്കാരോ, ഇന്ത്യന് വംശജരോ ആയിരിക്കണമെന്നുമാത്രം.
ഒരു മലയാളി ഈ
പ്രസ്ഥാനത്തിന്റെ അന്താരാഷ്ട്ര വൈസ് പ്രസിഡന്റായി ഈവര്ഷം തെരഞ്ഞെടുക്കപ്പെട്ടു
എന്നതില് നമുക്ക് അഭിമാനിക്കാം. ബഹറിന് കേന്ദ്രമായി പബ്ലിക്കേഷന് രംഗത്ത്
വിജയകരമായി പ്രവര്ത്തിച്ചുവരുന്ന സണ്ണി കുലത്താക്കല് ആണ് ഈ വിഖ്യാത മലയാളി. ആഗോള
മലയാളി പ്രവാസികളുടെ സംഘടിത ശബ്ദമായി ഗോപിയോയില് പ്രവര്ത്തിക്കാന്
അദ്ദേഹത്തിന് സാധിക്കട്ടെ എന്ന് ആശംസിക്കുന്നു.
ഈ കണ്വെന്ഷന്റെ ഭാഗമായി
നടന്ന പ്രവാസി പ്രശ്നങ്ങളെക്കുറിച്ചുള്ള സെമിനാറുകളും, അതിനുശേഷം നടന്ന ഡിന്നര്
റിസപ്ഷനിലും കുറെയേറെ മലയാളികള് പങ്കെടുത്തു എന്നതും ശ്രദ്ധേയമായി. അമേരിക്കയിലെ
ഇന്ത്യന് അംബാസിഡര് ശ്രീമതി നിരുപമ റാവു ഈ ഡിന്നര് റിസപ്ഷനില്
മുഖ്യാതിഥിയായിരുന്നു.
വേള്ഡ് മലയാളി കൗണ്സില്, ഇന്ത്യന് പ്രവാസി
ആക്ഷന് കൗണ്സില്, കേരളാ സെന്റര്, കേരളാ അസോസിയേഷന് ഓഫ് ന്യൂജേഴ്സി,
ഐ.എന്.ഒ.സി എന്നീ സംഘടനകളുടെ പ്രതിനിധികള് ഈ ഡിന്നര് റിസപ്ഷനില് പങ്കെടുത്തു.
കൈരളി ടിവിയും, ഏഷ്യാനെറ്റും ടെലിവിഷന് കവറേജ് നല്കാന് എത്തിയിരുന്നു.