ഏതൊരു പ്രവാസിയുടേയും മനസ്സില് ഗൃഹാതുരത്വം ഉണര്ത്തുന്ന വാക്കാണ് ഓണം.
ഓര്മ്മകളിലെ ഓണത്തിന് നിറമേറെയാണ്. മലയാളിയുടെ മനസിലെ നിറമേറിയ ഓണമോര്മ്മകള്
പലപ്പോഴും കുട്ടിക്കാലത്തെ ഓണങ്ങളുടെതാണ്. ഉത്തരവാദിത്വങ്ങളുടേയും
പ്രാരാബ്ദങ്ങളുടെയും അല്ലലുകളില്ലാതെ , പൂത്തുമ്പിയോടു കൂട്ടുകൂടിയും ,
പൂവട്ടിയുമായി പൂക്കള് തേടി നടന്നും, പിന്നെ മത്സരിച്ച് പൂക്കളങ്ങള് തീര്ത്തും
,കൂട്ടുകാരോടൊത്ത് ഊഞ്ഞാലാടി തിമിര്ത്തും നടന്ന ഓണക്കാലങ്ങള് ! അഛനും , അമ്മയും,
മുത്തശ്ശനും , മുത്തശ്ശിയും , ബന്ധുജനങ്ങളുമൊക്കെയായി തറവാടുവീടുകളില്
ആഘോഷിച്ചിരുന്ന ഓണം കുടുംബസമാഗമങ്ങളുടെ വേദിയായിരുന്നു. എല്ലാവരും
ഒത്തുചേര്ന്നുണ്ടാക്കുന്ന സദ്യവട്ടങ്ങള് ഓണത്തിന്റെ രുചിഭേദങ്ങള്
സൃഷ്ടിക്കുന്നതിനൊപ്പം , കുടുംബബന്ധങ്ങളുടെ രസക്കൂട്ടും ഭദ്രമാക്കി
.
കാലച്ചക്രത്തിനനുസരിച്ചു വരുന്ന മാറ്റങ്ങള് ഒഴിച്ചുകൂടാന്
പറ്റാത്തവയാണ്. ഇന്ന് ആഘോഷങ്ങളൊക്കെ കച്ചവടവത്ക്കരിക്കപ്പെട്ടിരിക്കുന്നു
.പ്ലാസ്റ്റിക് പൂക്കളും , പ്ലാസ്റ്റിക് ഇലകളും , ഓര്ഡര് കൊടുത്താല്
വീട്ടിലെത്തുന്ന ഓണസദ്യയുമൊക്കെ , മലയാളിയുടെ ഓണാഘോഷങ്ങളെ
ആയാസരഹിതമാക്കിയിരിക്കുന്നു.
കച്ചവടവത്ക്കരണം നല്ലതോ ചീത്തയോ ആവട്ടെ ,
ആഘോഷങ്ങളുടെ ആത്മാവ് നഷ്ടപ്പെടാതെ സൂക്ഷിക്കാന് നമുക്ക് സാധിക്കുന്നുണ്ടോ
?
സമത്വത്തിന്റെയും , സാഹോദര്യത്തിന്റെയും, നന്മയുടേയും സന്ദേശമാണ് ഓണം
മലയാളിക്ക് നല്കുന്നത്
ഓണം ഒരു ഓര്മ്മപ്പെടുത്തലാണ്; ഒരു നല്ല
നാളിന്റെ ഓര്മ്മപ്പെടുത്തല് ! ഓണം ഒരു ആഹ്വാനമാണ് . നന്മ നിറഞ്ഞ ഒരു
പുതുതലമുറക്കായി ; അതുവഴി ആപത്തും , അനര്ത്ഥവും , പൊളിവചനവും ഇല്ലാത്ത ഒരു നല്ല
നാളേക്കായുള്ള ആഹ്വാനം !
നമ്മുടെ ബാല്യത്തിലെ നിറമേറിയ ഓര്മ്മകള് പോലെ
നമ്മുടെ കുഞ്ഞുങ്ങളുടെ മനസിലും തങ്ങി നില്ക്കുന്ന , നന്മയുടെ ഓര്മ്മകള്
സമ്മാനിക്കുന്ന ഒരോണം നമ്മുക്കൊരുക്കാം. പൂക്കള് പ്ലാസ്റ്റിക് ആയാലും ,
മുറ്റത്ത് പൂവിട്ടതായാലും നമ്മളിടുന്ന പൂക്കളങ്ങള് , നമ്മുടെ പൈതൃകത്തിന്റെ ,
സംസ്കാരത്തിന്റെ പ്രതീകങ്ങളാവട്ടെ .
എല്ലാവര്ക്കും
ഓണാശംസകള്.
ജെയിന് ജോസഫ്