ചിക്കാഗോ: ലോകസമാധാനത്തിനും, മനുഷ്യനന്മയ്ക്കുമായി, ചിക്കാഗോയിലെ സെന്റ്
മേരീസ്, സേക്രഡ് ഹാര്ട്ട് ക്നാനായ ഇടവകകളിലെ, പ്രാര്ത്ഥനാ ഗ്രൂപ്പിന്റെ
ആഭിമുഖ്യത്തില് നടത്തപ്പെടുന്ന അഞ്ചു ലക്ഷം കൊന്തകള് ചൊല്ലുവാനുള്ള റോസറി
ശൃംഖല, ക്നാനായ വികാരി ജനറാള് മോണ് അബ്രഹാം മുത്തോലം ഔപചാരികമായി
ഉദ്ഘാടനം ചെയ്തു.
ഡിസംബര് 31-ാം തീയതി വൈകീട്ട്, മോമട്ടല് ഗ്രോവ് സെന്റ് മേരീസ്
ക്നാനായ ദേവാലയത്തില് വച്ചു നടത്തപ്പെട്ട പുതുവര്ഷ കര്മ്മങ്ങള്ക്കു
ശേഷമുള്ള ചടങ്ങില് വച്ചും, ചെമ്മാച്ചേല് മത്തച്ചന് , മേരി കുട്ടി
ദമ്പതികളില് നിന്നും റോസറി ശൃംഖലയുടെ ആദ്യ സമ്മതപത്രം സ്വീകരിച്ചാണ് മോണ്
അബ്രഹാം മുത്തോലം പ്രാര്ത്ഥനാശൃംഖല ഉദ്ഘാടനം ചെയ്തത്. ലോകത്ത്
അസമാധാനവും, അക്രമവും കൂടുന്ന ഈ സാഹചര്യത്തില് , മനുഷ്യന്റെ മനം
മാറ്റത്തിനും, ദൈവത്തിങ്കലേയ്ക്ക് അവനെ കൂടുതല് അടുപ്പിക്കാനും,
ഇതുപോലുള്ള പ്രാര്ത്ഥനസംരംഭങ്ങള് കൂടതല് പ്രയോജനം ചെയ്യുമെന്ന്, അദ്ദേഹം
അഭിപ്രായം പ്രകടിപ്പിച്ചു.
വിവിധ പ്രാര്ത്ഥനാ ഗ്രൂപ്പിന്റെ പ്രതിനിധികള്
ചടങ്ങില് സന്നിഹിതരായിരുന്നു. ആദ്യദിവസം തന്നെ നൂറുകണക്കിന് കുടുംബങ്ങള്
, ഈ ശൃംഖലയില് പങ്കെടുത്തു കൊണ്ടുള്ള, ആയിരകണക്കിന് റോസറികള്ക്കുള്ള
സമ്മതപത്രം ഒപ്പിട്ട് നല്കി. നിങ്ങള്ക്കും ഈ ശൃംഖലയില്
കണ്ണികളാക്കാവുന്നതാണ്. ഓരോ വ്യക്തിയ്ക്ക് അല്ലെങ്കില് കുടുംബങ്ങള്ക്ക്,
തങ്ങളാല് കഴിയാവുന്ന കൊന്തകള് പൂര്ത്തീകരിച്ച്, ഈ നല്ല സംരംഭത്തില്
പങ്കാളികളാക്കാം. കൂടുതല് വിവരങ്ങള്ക്ക് ഇരു ദേവാലയത്തിലെയും,
പ്രാര്ത്ഥന ഗ്രൂപ്പുമായോ, വികാരി ജനറാല് മോണ് . അബ്രഹാം മുത്തോലവുമായോ
ബന്ധപ്പെടുക.