ദൂരേ കിഴക്കിന്റെ ചക്രവാളത്തിലെ

സൂര്യക്കുടത്തിന്റെ താരാട്ട്

താഴത്തെ മണ്ണിന്റെ മാറത്തു പ്രേമത്തിൻ

തൂവൽ സ്പർശത്തിന്റെ നീരാട്ട്‌ !

.

പൂവായി ഭൂമിയെ മൂടുന്ന രോമാഞ്ച

ലീലാ വിലാസങ്ങളിൽ

ഓരോരോ കാലമാം കാലാടിപ്പാടിലും

കോരിത്തരിപ്പായി സ്നേഹ ബിന്ദു !

മായാ പ്രപഞ്ച നിഗൂഢ നിമഞ്ജതാ

രൂപമെൻ നക്ഷത്ര ധൂളീ ലയം

സാധകം ! ബോധമായ് എന്നിൽ തെളിയുന്ന ഞാനെന്ന

തേജസാം ദൈവ പ്രഭ !

ഓരോ പ്രഭാതത്തുടുപ്പിലും സ്വപ്നമായ്

നാളേകൾ  താണ്ടുമീ ജീവ ലോകം

ആറടി മണ്ണിൽ അലിഞ്ഞു ചേരാനുള്ള

യാതനാ യാത്രാ വഴിയിലല്ലോI ?

ആര് ഞാൻ ?  നക്ഷത്ര ധൂളികൾ ക്കപ്പുറ -

ത്താളുന്ന സത്യ സമസ്ഥതയിൽ

ചേതസ്സായ്  മുൻ ചിന്താ രൂപം പ്രപഞ്ചത്തിൻ

സാരമായ് ശക്തിയായ് പിന്നരങ്ങിൽ ?

സ്നേഹമാണെങ്ങും കണികകൾ ഒന്നിച്ച

പ്രേമം രചിച്ചൊരീ വിശ്വ രൂപം !

പ്രേമിച്ചു പ്രേമിച്ചു മണ്ണും മനുഷ്യനും

ഭൂമിയിൽ സ്വർഗ്ഗം പണിഞ്ഞു വയ്ക്കും !

ലോകാവസാനം മത / ശാസ്ത്ര ചൂഷണ

കാപാലികർ വിറ്റ  ക്രൂരം  നുണ

പോരിക മണ്ണിൽ മനുഷ്യനും ദൈവവും

ചേരുന്ന സ്വർഗ്ഗ കവാടങ്ങളിൽ !

നാളത്തെ സൗര മഹാ സ്പോടനങ്ങളിൽ

ധൂളികളായി വഴി പിരിഞ്ഞാൽ

കാലത്തിൻ മാറിലെ ചൂടിൽ അനശ്വര

നാളങ്ങളായി നാം വീണ്ടും വരും !