കൊച്ചി: സമീപകാലത്ത് ലഹരിമൂലം കേരളത്തിലെ യുവാക്കൾ നടത്തിവരുന്ന അക്രമസംഭവങ്ങൾ ഏതൊരു മലയാളിയിലും ആശങ്ക ഉയർത്തുന്നുണ്ട്. അതുകൊണ്ടുതന്നെ നാടിനോട് പ്രതിബദ്ധതയുള്ള സംഘടന എന്ന നിലയിൽ, വേൾഡ് മലയാളി ഫെഡറേഷൻ (ഡബ്ല്യൂഎംഎഫ്) ലഹരിവ്യാപനത്തിനെതിരെ ശക്തമായി പോരാടാൻ തയ്യാറെടുത്തുകഴിഞ്ഞു. 

ഇതിന്റെ ഭാഗമായി, Anti Drug Battle Campaign എന്ന ബാനറിൽ കേരളത്തിലെ 14 ജില്ലകളിലും ലഹരി വിരുദ്ധ പരിപാടികൾ സംഘടിപ്പിക്കും. മലയാളികളുടെ സാന്നിധ്യമുള്ള വിവിധ രാജ്യങ്ങളിലും  അതാത് മേഖലകളിലെ പ്രമുഖരെ പങ്കെടുപ്പിച്ചുകൊണ്ട്  ക്യാമ്പയിൻ നടത്തും. നമ്മുടെ യുവതലമുറയിൽ നിന്നും ലഹരി വിരുദ്ധ അംബാസഡർമാരെ കണ്ടെത്തിക്കൊണ്ട് സ്കൂൾ കോളേജ് വിദ്യാർത്ഥികളെ ലഹരിക്കെതിരെയുള്ള യുദ്ധപ്പോരാളികളാക്കുന്ന  ഒരു വർഷം നീണ്ടു നിൽക്കുന്ന വിവിധ പരിപാടികൾ നടപ്പാക്കാനാണ്  പദ്ധതി.

 കൊച്ചിയിൽ സംഘടിപ്പിക്കുന്ന ജനകീയ മാരത്തോൺ, ലഹരിക്കെതിരെ സാഹിത്യ-ചിത്രകലാമത്സരങ്ങൾ, ബോധവൽക്കരണ ഷോർട്ട് ഫിലിമുകൾ, പോസ്റ്ററുകൾ, മനഃശാസ്ത്രജ്ഞരെ ഉൾപ്പെടുത്തി കൗൺസിലിംഗ് സേവനങ്ങൾ, ഹെൽപ്‌ലൈൻ/ഡീ അഡിക്ഷൻ സംവിധാനങ്ങൾ, സംഗീത നൃത്ത ആവിഷ്കാരങ്ങൾ തുടങ്ങിയുള്ള പരിപാടികൾക്കായി സംഘടന ഇതിനോടകം സുസജ്ജമായിട്ടുണ്ട്. 

ക്യാമ്പയിന്റെ  ആഗോള ചുമതല ഗ്ലോബൽ കോർഡിനേറ്റർ ഡോ. ആനി ലിബുവിനാണ്. ഡബ്ല്യൂഎംഎഫിന്റെ തന്നെ ഗ്ലോബൽ യൂത്ത് ഫോറം, ഗ്ലോബൽ പി ആർ ഫോറം എന്നിവയും പദ്ധതികളുടെ സുഗമമായ നടത്തിപ്പിന് കൈകോർക്കും.  

വിവിധ കൗൺസിലുകളുടെ നേതൃത്വത്തിൽ 166 രാജ്യങ്ങളിൽ ലഹരിവിരുദ്ധ പ്രവർത്തനങ്ങൾ ഉണ്ടാകും.  കേരളത്തിൽ തദ്ദേശ സ്വയംഭരണ സ്ഥാപനങ്ങൾ,  രാഷ്ട്രീയ സാമൂഹ്യ പ്രവർത്തകർ, സ്കൂൾ പിടിഎ,  സംസ്ഥാന പോലീസ്-എക്സൈസ് വിഭാഗങ്ങൾ, മറ്റു സന്നദ്ധ സംഘടനകൾ എന്നിവരോടൊപ്പം  അണിചേർന്ന്  ഒരു വർഷം നീണ്ടു നിൽക്കുന്ന ക്യാമ്പയിനു മാർച്ച്‌ മാസം തന്നെ തുടക്കമാകുമെന്ന് ഗ്ലോബൽ ഫൗണ്ടർ ചെയർമാൻ ഡോ പ്രിൻസ് പള്ളിക്കുന്നേൽ, ഗ്ലോബൽ  ചെയർമാൻ ഡോ. ജെ. രത്നകുമാർ, ഗ്ലോബൽ പ്രസിഡന്റ്‌ പൗലോസ് തേപ്പാല, ഗ്ലോബൽ കോർഡിനേറ്റർ ഡോ. ആനി ലിബു, ഗ്ലോബൽ സെക്രട്ടറി നൗഷാദ് ആലുവ, ഗ്ലോബൽ ട്രഷറർ ടോം ജേക്കബ്, ഗ്ലോബൽ ജോയിന്റ് സെക്രട്ടറി റിജാസ്, ഗ്ലോബൽ ജോയിന്റ് ട്രഷറര്‍ വി എം സിദ്ദിഖ്, കേരള സ്റ്റേറ്റ് പ്രസിഡന്റ്‌ റഫീഖ് മരക്കാർ, ഗ്ലോബൽ പി ആർ ഒ നോവിൻ വാസുദേവ് തുടങ്ങിയവർ അറിയിച്ചു.