ഡാളസ്: ഭാഷയേയും എഴുത്തുകാരേയും മലയാളികളെപ്പോലെ ഇത്രയേറെ സ്‌നേഹിക്കുന്ന മറ്റൊരു സമൂഹവുമില്ലെന്ന് ലാന കണ്‍വന്‍ഷന്‍ സമാപന യോഗത്തില്‍ ബന്യാമിന്‍ അനുഭവങ്ങളിലൂടെ ചൂണ്ടിക്കാട്ടി. സിനിമാനടന്മാരേക്കാള്‍ വലിയ ആദരവ് സഹിത്യകാരന്മാര്‍ക്ക് ലഭിക്കുന്നു.

ചവറയില്‍ ഒരു യോഗത്തിനു ചെന്നപ്പോള്‍ ഗ്രാമത്തിലെ വീടുകള്‍ക്കു മുന്നില്‍ നിലവിളക്ക് കൊളുത്തി വെച്ചിരിക്കുന്നതു കണ്ടു. ഏതോ ഉത്സവം പ്രമാണിച്ചായിരിക്കാമെന്നു കരുതി അന്വേഷിച്ചപ്പോള്‍ പറഞ്ഞത് സമ്മേളനത്തിനെത്തുന്ന എഴുത്തുകാരെ ആദരിക്കാനായി ഗ്രാമവാസികളെല്ലാം നിലവിളക്ക് കത്തിച്ചുവെച്ചതാണെന്ന്.

ദൈവതുല്യമാണ് എഴുത്തുകാരെ മലയാളി കാണുന്നത്. കണ്ണൂരില്‍ ഒരു ഗ്രാമത്തിലെ ലൈബ്രറി സന്ദര്‍ശിക്കാനെത്തിയത് രാത്രിയിലാണ്. പോകുംവഴി ആളുകള്‍ ചൂട്ടുകറ്റയും വീശി പോകുന്നു. എന്തോ അപകടം സംഭവിച്ചിട്ട് ആളുകള്‍ പോകുകയാണെന്നാണ് കരുതിയത്. വണ്ടി നിര്‍ത്തി വിവരം ചോദിച്ചപ്പോള്‍ ബന്യാമിന്‍ ലൈബ്രറിയില്‍ വരുന്നുണ്ടെന്നും കാണാന്‍ പോകുകയാണെന്നും പറഞ്ഞത് അപൂര്‍വ്വാനുഭവമായി. മറ്റൊരു അവസരത്തില്‍ ട്രെയിന്‍ പാളംതെറ്റി സമ്മേളനത്തിനെത്താന്‍ പ്രയാസമാണെന്നറിയിച്ചപ്പോള്‍ എത്ര വൈകിയാലും എത്തണമെന്നായിരുന്നു അഭ്യര്‍ത്ഥന. അങ്ങനെ രാത്രി രണ്ടുമണിക്ക് ചെല്ലുമ്പോള്‍ ഗ്രാമം മുഴുവന്‍ ഉറക്കമിളച്ച് കാത്തിരിക്കുന്നു.

ഇത് ബന്യാമിനെ കാണാനല്ല എന്നറിയാം. ബന്യാമിന്‍ എന്ന എഴുത്തുകാരനെ കാണാനാണ്. ലാനാ സമ്മേളനത്തിലേക്ക് ക്ഷണിച്ചതും ഈ സ്‌നേഹ ബഹുമാനങ്ങള്‍ ചൊരിഞ്ഞതും അതുകൊണ്ടുതന്നെ- അദ്ദേഹം ചൂണ്ടിക്കാട്ടി.

ലാന സമ്മേളനത്തില്‍ ആള്‍ക്കൂട്ടത്തെ ഒരിക്കലും പ്രതീക്ഷിച്ചിട്ടില്ലെന്ന് പ്രസിഡന്റ് ഷാജന്‍ ആനിത്തോട്ടം ചൂണ്ടിക്കാട്ടി. ആയിരം അരസികന്മാരേക്കാള്‍ അഞ്ച് രസികരെയാണ് ലാന ആഗ്രഹിക്കുന്നത്.

ലാന എന്തു കൂന എന്ന് ആദ്യകാലത്ത് ചിന്തിച്ചവരുണ്ട്. എന്നാല്‍ രണ്ടു പതിറ്റാണ്ട് ആകുമ്പോള്‍ ലാന ശക്തിപൂര്‍വ്വം മുന്നോട്ടുപോകുകയാണ്.