ഷാനിമോൾ ഉസ്മാൻ എന്ന പേര് മലയാളികൾക്ക്  പ്രത്യേകിച്ച്  കോൺഗ്രസ് അനുഭാവികൾക്ക്  സുപരിചിതമാണ്. അവരുടെ  സ്വതസിദ്ധമായ കഴിവുകൾ നിയമസഭയിലേക്കുള്ള വാതിൽ എളുപ്പം തുറന്നുകിട്ടാൻ സഹായിക്കുമെന്ന് ഞങ്ങളിൽ പലർക്കും തോന്നിയിരുന്നെങ്കിലും  ദീർഘനാളത്തെ കാത്തിരിപ്പിനൊടുവിലാണ്  അതിന് വഴി ഒരുങ്ങിയത്. 

2019 ലെ ഉപതിരഞ്ഞെടുപ്പിൽ യുഡിഎഫിനായി അരൂർ നിയോജകമണ്ഡലത്തിൽ മാറ്റുരയ്ക്കാൻ ഷാനിമോൾക്ക് ലഭിച്ച സുവർണ്ണാവസരം അവർ നല്ല രീതിയിൽ വിനിയോഗിച്ചു. എ. എം. ആരിഫ്  ലോക്സഭയിലേക്ക് വിജ‌യിച്ചപ്പോൾ സ്ഥാനമൊഴിഞ്ഞതോടെയാണ് ഉപതെരഞ്ഞെടുപ്പ് വേണ്ടി വന്നത്. ലോക്സഭാ ഇലക്ഷനിൽ  എൽഡിഎഫ് നേടിയ ഒരേയൊരു വിജയമായിരുന്നു ആരിഫിന്റേത് എന്നതും സ്മരണീയം.

ഉപതെരഞ്ഞെടുപ്പ് വിജയിച്ചത് മുതൽ  അരൂരിലെ നിറസാന്നിധ്യമായി ഷാനിമോൾ മാറി. അരൂരിലെ ജനങ്ങളെ സേവിക്കുക മാത്രമായിരുന്നില്ല അവർ ചെയ്തത്, മറിച്ച് നിരന്തരമായ പ്രചാരണപർവ്വത്തിൽ ഏർപ്പെടുക കൂടിയായിരുന്നു. 15 കോടിയുടെ വികസന ഫണ്ട്  ഉപയോഗിക്കാതെ കിടന്നത് ശ്രദ്ധയിൽപ്പെട്ടത്, ആ ശ്രമത്തിൽ അവരെ ഏറെ തുണച്ചു. വിവിധ പദ്ധതികൾക്കായി അവർ ആ പണം ശരിയായ രീതിയിൽ വിനിയോഗിച്ചു. എറണാകുളത്തിനു സമീപം  സ്ഥിതിചെയ്യുന്ന അരൂർ, ഉൾനാടൻ കനാലുകളും തടാകങ്ങളും മനോഹരമായ കടൽത്തീരങ്ങളും എല്ലാംചേർന്ന്  പ്രകൃതി സൗന്ദര്യത്താൽ അനുഗ്രഹീതമായ ഭൂമികയാണ്.

യുഡിഎഫ്  സ്ഥാനാർത്ഥിക്കൊപ്പം  എഴുപുന്ന പഞ്ചായത്തിന്റെ വിദൂര പ്രദേശങ്ങളിലേക്ക് ഇറങ്ങിച്ചെല്ലാൻ  എനിക്ക് അവസരം ലഭിച്ചു. അവിടുത്തെ സാധാരണക്കാരായ ജനങ്ങളുടെ  കണ്ണുകളിൽ, ഷാനിമോളോട് പ്രത്യേക വാത്സല്യവും സ്നേഹവായ്പ്പും പ്രകടമായിരുന്നു.

അരൂരിനെ മികച്ച വിനോദ സഞ്ചാര കേന്ദ്രമാക്കി മാറ്റുക എന്ന ലക്ഷ്യത്തോടെ ഷാനിമോൾ തുടക്കംകുറിച്ച അനവധി പദ്ധതികളെക്കുറിച്ചാണ് യാത്രയ്ക്കിടെ  അവർ പ്രത്യാശയോടെ സംസാരിച്ചത്. കാക്കത്തുരുത്ത് ദ്വീപ് വികസന പദ്ധതിയുമായി ബന്ധിപ്പിച്ച് സഞ്ചാരികളെ ആകർഷിക്കുന്നതിനെക്കുറിച്ച് എടുത്ത് പറഞ്ഞു. പൂർത്തിയാക്കിയതും അന്തിമഘട്ടത്തിൽ എത്തിനിൽക്കുന്നതുമായ പ്രൊജക്ടുകളുടെ വിശദാംശങ്ങൾ പങ്കുവയ്ക്കുന്ന ഫ്ളക്സ് ബോർഡുകളും വഴിയിലുടനീളം കണ്ടു.

ഷാനിമോളുടെ സന്ദേശം ശരിയായ രീതിയിൽ വോട്ടർമാരുടെ മനസ്സിൽ ഓളങ്ങൾ സൃഷ്ടിക്കുമോ എന്നത് കാത്തിരുന്നേ അറിയാൻ കഴിയൂ. എൽഡിഎഫ് കളത്തിൽ ഇറക്കിയിരിക്കുന്ന എതിരാളിയും പ്രബലയാണ്. മലയാളസിനിമാ  പിന്നണി ഗായികയും നിലവിലെ ജില്ലാ പഞ്ചായത്ത് വൈസ്  പ്രസിഡന്റുമായ ദലീമ ജോജോ നാട്ടുകാർക്ക് സുപരിചിതയാണ്. ക്രിസ്തീയ ഭക്തിഗാനങ്ങൾ പാടി, ഇവിടെയുള്ള ക്രിസ്ത്യൻ സമൂഹത്തിനിടയിൽ പ്രത്യേക സ്ഥാനം അവർ നേടിയിട്ടുണ്ട്. 'രമ്യ ഹരിദാസ് മോഡൽ' പിന്തുടർന്ന് പാട്ടുംപാടി ദലീമ വോട്ടർമാരെ 'പാട്ടിലാക്കുമോ' എന്നും കണ്ടറിയണം.

എൽ‌ഡി‌എഫ് സ്ഥാനാർത്ഥി ഇതുവരെ ഷാനിമോൾ നടത്തിയ വികസന ശ്രമങ്ങൾ അംഗീകരിക്കാൻ കൂട്ടാക്കിയിട്ടില്ലെങ്കിലും , ഈ പ്രദേശത്ത് പുരോഗതി കൊണ്ടുവരാൻ നോക്കുമ്പോഴൊക്കെ  പിണറായി സർക്കാർ നിരവധി തടസ്സങ്ങൾ സൃഷ്ടിച്ചിട്ടുണ്ടെന്ന ആരോപണം നിഷേധിക്കാൻ മുതിരുന്നില്ല. മണ്ഡലത്തിൽ  ഏത് പാർട്ടി വിജയം നേടിയാലും ജനങ്ങൾ പ്രതീക്ഷിക്കുന്നത്  വെള്ളപ്പൊക്കവും പ്രളയവും പോലെയുള്ള  ദുരിതക്കയങ്ങളിൽ നിന്നുള്ള രക്ഷയും കൈത്താങ്ങുമാണ്. ആഴക്കടൽ മത്സ്യബന്ധനം സംബന്ധിച്ച വിവാദം തീരദേശവാസികളായ വോട്ടർമാർ കൂടുതലുള്ള മണ്ഡലം എന്നനിലയിൽ പ്രതിഫലനം സൃഷ്ടിക്കാനുള്ള സാധ്യത വളരെ കൂടുതലാണ്. പ്രചാരണത്തിൽ  ഇക്കാര്യം പ്രധാന വിഷയമാകുന്നുണ്ടെന്നതിലും സംശയമില്ല.

ബിജെപി സ്ഥാനാർത്ഥി ടി. അനിയപ്പന് 25000 ത്തിൽപ്പരം വോട്ടുകൾ ലഭിച്ചേക്കാം. തങ്ങൾക്ക് ലഭിക്കേണ്ട ഒരു വോട്ടും ചോർന്നു പോകാതിരിക്കാൻ ബിജെപി നേതാക്കൾ ഇത്തവണ കിണഞ്ഞു പരിശ്രമിക്കുന്നുണ്ട്. കേരളത്തിന്റെ  രാഷ്ട്രീയ ഭൂപടത്തിൽ ബിജെപിയുടെ വോട്ട് നില  മെച്ചപ്പെടുത്തിക്കൊണ്ടു വരിക എന്നതാണ് അവരുടെ ലക്ഷ്യം. അരൂരിലെ ജനവിധി പ്രവചനാതീതമായി തുടരുന്ന സാഹചര്യത്തിലും, യുഡിഎഫ് അരൂർ മണ്ഡലം തിരിച്ചുപിടിക്കുമെന്ന വിശ്വാസം ഷാനിമോൾ കൈവിടുന്നില്ല. നാടിന്റെ വികസനത്തിനായി സ്വയം സമർപ്പിച്ച് നടത്തിയ പ്രവർത്തനങ്ങളും, മതേതര മൂല്യങ്ങൾ സംരക്ഷിക്കാൻ കൈക്കൊണ്ട നിലപാടുകളും വോട്ടർമാർ തിരിച്ചറിയുമെന്ന് അവർ ഉറപ്പിച്ച് പറയുന്നു. 

സിപിഎം സ്ഥാനാർത്ഥിയായും ജെഎസ്എസ് സ്ഥാനാർത്ഥിയായും ഗൗരിയമ്മ മത്സരിച്ച  അവസരങ്ങളിൽ, വിജയം നൽകിയ മണ്ഡലമാണ് അരൂർ. അതുകൊണ്ട് തന്നെ, ഒരു മുന്നണിക്കും  അരൂരിൽ മേൽക്കൈ ഉണ്ടെന്ന് അവകാശപ്പെടാൻ സാധിക്കില്ല.