തിരുവനന്തപുരം: ജോണ് ബ്രിട്ടാസിനെയും ഡോ.വി.ശിവദാസനെയും രാജ്യസഭയിലേക്ക് മത്സരിപ്പിക്കാന് സിപിഎം സംസ്ഥാന സെക്രട്ടേറിയേറ്റ് തീരുമാനിച്ചു.
കൈരളി ടിവി എംഡിയും മുഖ്യമന്ത്രിയുടെ മുന് മാധ്യമ ഉപദേഷ്ടാവുമായിരുന്നു ജോണ് ബ്രിട്ടാസ്. സിപിഎം മുഖപത്രമായ ദേശാഭിമാനിയില് ഡല്ഹി കേന്ദ്രീകരിച്ച് പ്രവര്ത്തിച്ചിരുന്ന ജോണ് ബ്രിട്ടാസ് പിന്നീടാണ് കൈരളിയിലേക്കെത്തുന്നത്.
ഡോ.വി.ശിവദാസന് എസ്.എഫ്.ഐയുടെ ദേശീയ പ്രസിഡന്റ് ആയിരുന്നു. ഇപ്പോള് സിപിഎം സംസ്ഥാനസമിതി അംഗമായി പ്രവര്ത്തിക്കുകയാണ്.
വിജു കൃഷ്ണന്, കെ.കെ.രാകേഷ് എന്നിവര് അടക്കമുളളവരുടെ പേര് പരിഗണനയിലുണ്ടായിരുന്നു. എന്നാല് രണ്ടുപുതുമുഖങ്ങള് വരട്ടേ എന്ന തീരുമാനത്തിലേക്കാണ് അവസാനം സിപിഎം എത്തിയിരിക്കുന്നത്. വൈകീട്ട് നാലുമണിക്ക് എല്ഡിഎഫ് യോഗമുണ്ട്. യോഗത്തില് ഇതുസംബന്ധിച്ച ഔദ്യോഗിക പ്രഖ്യാപനമുണ്ടാകും.
യു ഡി എഫില് പി വി അബ്ദുള് വഹാബാണ് സ്ഥാനാര്ത്ഥി. ഇന്ന് രാവിലെ അദ്ദേഹം നാമനിര്ദ്ദേശ പത്രിക സമര്പ്പിച്ചു.