വോട്ടെടുപ്പ് കഴിഞ്ഞതോടെ കിറ്റ് വിതരണം നിര്ത്തിയത് വഞ്ചന: രമേശ് ചെന്നിത്തല
Published on 16 April, 2021
തിരുവനന്തപുരം: വോട്ടെടുപ്പ് കഴിഞ്ഞതോടെ വിഷുക്കിറ്റ് വിതരണം നിറുത്തിവച്ച് സിപിഎമ്മും സര്ക്കാരും ഒരിക്കല് കൂടി തങ്ങളുടെ ജനവഞ്ചന തെളിയിച്ചിരിക്കുകയാണെന്ന് പ്രതിപക്ഷ നേതാവ് രമേശ് ചെന്നിത്തല. വോട്ടെടുപ്പിന് മുമ്പ് വിഷുക്കിറ്റ് വിതരണം ചെയ്യാന് എന്തൊരു ഉത്സാഹമായിരുന്നു സര്ക്കാരിന്. എന്നാല് കാര്യം കഴിഞ്ഞപ്പോള് ജനങ്ങള് വേണ്ടാതായി. സംസ്ഥാനത്ത് 85 ലക്ഷം കാര്ഡുടമകള്ക്ക് വിഷുക്കിറ്റ് നല്കണമെങ്കിലും കഷ്ടിച്ച് 26 ലക്ഷം പേര്ക്ക് മാത്രമേ നല്കിയിട്ടുള്ളൂ.
കിറ്റിന്റെ വിതരണം ഇപ്പോള് പൂര്ണ്ണമായും നിര്ത്തി വച്ചിരിക്കുകയാണെന്ന് അദ്ദേഹം പ്രസ്താവനയില് ആരോപിച്ചു. ജനങ്ങളെ പറ്റിച്ച് വോട്ട് പിടിക്കുക മാത്രമാണ് സര്ക്കാരിന്റെ ലക്ഷ്യമെന്ന് പ്രതിപക്ഷം പറഞ്ഞത് ഒരിക്കല് കൂടി ശരിയാണെന്ന് തെളിഞ്ഞിരിക്കുകയാണ്.
ഏപ്രില് 14 ആണ് വിഷു എങ്കിലും ഏപ്രിലിന് മുന്പ് തന്നെ കിറ്റ് വിതരണം ചെയ്യാന് തിടുക്കം കാട്ടിയവരാണിവര്. വോട്ടെടുപ്പ് കഴിഞ്ഞ സ്ഥിതിക്ക് ഇനി ജനങ്ങളെ അവര്ക്ക് ആവശ്യമില്ലല്ലോ? വോട്ട് തട്ടുന്നതിനുള്ള കള്ളക്കളിയാണ് സര്ക്കാരിന്റെതെന്ന സത്യം തുറന്നു പറഞ്ഞതിന് പ്രതിപക്ഷ നേതാവ് അന്നം മുടക്കുകയാണെന്ന് പറഞ്ഞ് അപഹസിച്ച മുഖ്യമന്ത്രിക്ക് ഇപ്പോള് എന്താണ് പറയാനുള്ളതെന്നും രമേശ് ചെന്നിത്തല ചോദിച്ചു.
മലയാളത്തില് ടൈപ്പ് ചെയ്യാന് ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്ത്തികരവുമായ പരാമര്ശങ്ങള് പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര് നിയമപ്രകാരം കുറ്റകരമാണ്. അഭിപ്രായങ്ങള് എഴുതുന്നയാളുടേത് മാത്രമാണ്. ഇ-മലയാളിയുടേതല്ല