കേന്ദ്ര പ്രവാസി കമ്മീഷന്‍: ഹര്‍ജി ഡല്‍ഹി ഹൈക്കോടതി ഡിവിഷന്‍ ബഞ്ച് പരിഗണിക്കുന്നു
Published on 18 April, 2021
കുവൈറ്റ് സിറ്റി: ജുഡീഷ്യല്‍ അധികാരങ്ങളോടുകൂടിയ കേന്ദ്ര പ്രവാസി ( NRI)
കമ്മീഷന്‍ വേണമെന്നുള്ള ഹര്‍ജി ഏപ്രില്‍ 22 നു ഡല്‍ഹി ഹൈക്കോടതി
ഡിവിഷന്‍ ബെഞ്ചു പരിഗണിക്കുമെന്നു ജസ്റ്റിസ് പ്രതിഭ എസ്. സിംഗ് അറിയിച്ചു. ഹര്‍ജിക്കാരനായ പ്രവാസി ലീഗല്‍ സെല്‍ ഒമാന്‍ കണ്‍ട്രി ഹെഡ് അനിസൂര്‍ റഹ്മാന്റെ ഹര്‍ജിയില്‍ പ്രവാസി ലീഗല്‍ സെല്‍ ഗ്ലോബല്‍ പ്രസിഡന്റും സുപ്രീം കോടതി അഭിഭാഷകനുമായ ജോസ് എബ്രഹാം ഹൈകോടതിയില്‍ പ്രവാസികള്‍ കാലാകാലങ്ങളായി അനുഭവിക്കുന്ന പ്രശ്‌നങ്ങളും ചൂഷണങ്ങളും, ഇന്ത്യയുടെ ഓരോ വളര്‍ച്ചയുടെയും തളര്‍ച്ചയുടെയും ഘട്ടത്തില്‍ പ്രവാസികളുടെ സംഭാവനകളും വിശദമാക്കിയിരുന്നു.
ഹര്‍ജിയുടെ പൊതു താത്പര്യം മുന്‍ നിര്‍ത്തി ഡിവിഷന്‍ ബെഞ്ച് ഹര്‍ജി പരിഗണിക്കുന്നതു ഉചിതമാണെന്ന് ജസ്റ്റിസ് പ്രതിഭ സിംഗ് ഉത്തരവില്‍ പ്രസ്ഥാവിച്ചു. ഗോവ, പഞ്ചാബ്, കേരളം എന്നീ സംസ്ഥാനങ്ങളില്‍ പ്രവാസി കമ്മീഷന്‍ പ്രവര്‍ത്തിക്കുന്നുണ്ട്. എന്നാല്‍ വിദേശ എംബസികളും കോണ്‍സുലെറ്റുകളും കേന്ദ്ര സര്‍ക്കാരിന്റെ നേരിട്ടുള്ള നിയന്ത്രണത്തില്‍ ആകയാല്‍ കേന്ദ്ര ജുഡീഷ്യല്‍ അധികാരത്തോട് കൂടിയ ഒരു പ്രവാസി കമ്മീഷന്‍ പ്രവാസികള്‍ക്ക് അവരുടെ മരുഭൂമിയിലെ ചുട്ടുപൊള്ളിക്കുന്ന ജീവിത പ്രതിസന്ധികള്‍ക്ക് ഒട്ടേറെ പരിഹാരം ആകുമെന്നു ഹര്‍ജിയില്‍ ചൂണ്ടികാണിക്കുന്നു.പ്രവാസികള്‍കായി ദേശീയ പ്രവാസി കമ്മീഷന്‍ സ്ഥാപിക്കുവാനായി കഴിഞ്ഞ വര്‍ഷം ജൂണില്‍ പ്രധാനമന്ത്രിക്ക് പ്രവാസി ലീഗല്‍ സെല്‍ നിവേദനം നല്‍കിയിരുന്നു.
ഇന്ത്യയിലെ കുടിയേറ്റക്കാരുടെ പ്രശ്‌നങ്ങള്‍ പഠിക്കുന്നതിനായി കേന്ദ്ര സര്‍ക്കാര്‍ ഒരു ഏകാംഗ കമ്മീഷനെ നിയോഗിച്ചിരുന്നു. കോവിഡിനെ തുടര്‍ന്ന് കഴിഞ്ഞ ഒരു കൊല്ലമായി നിരവധി പ്രവാസികള്‍ നാട്ടിലേക്ക് മടങ്ങുന്ന സാഹചര്യത്തില്‍ ഈ കമ്മീഷന്റെ പ്രസക്തി ഏറെയാണ്. അഡ്വ.ബ്ലസ്സന്‍ മാത്യു, അഡ്വ. അഞ്ചു എന്നിവര്‍ കോടതിയില്‍ ഹാജരായി.
ദീര്‍ഘനാളുകളായിട്ടുള്ള പ്രവാസികളുടെ ദേശീയ പ്രവാസി കമ്മീഷന്‍ വേണമെന്ന ന്യായമായ ആവശ്യം ഹൈകോടതി ഇടപെടലിലുടെ വേഗത്തില്‍ നടപ്പിലാകുമെന്നു പ്രതീക്ഷിക്കുന്നതായി പ്രവാസി ലീഗല്‍ സെല്‍ കുവൈറ്റ് കണ്‍ട്രി ഹെഡ് ബാബു ഫ്രാന്‍സീസും ജനറല്‍ സെക്രട്ടറി ബിജു സ്റ്റീഫനും പത്രക്കുറിപ്പില്‍ അറിയിച്ചു.
Facebook Comments
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്ത്തികരവുമായ പരാമര്ശങ്ങള് പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര് നിയമപ്രകാരം കുറ്റകരമാണ്. അഭിപ്രായങ്ങള് എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala