കെ പി സി സി യുടെ അമരക്കാരനായി കെ സുധാകരൻ കടന്നുവരുമ്പോൾ പ്രതീക്ഷകളുടെ നല്ല നാളെകളാണ് കേരളവും പ്രതിപക്ഷവും സ്വപ്നം കാണുന്നത്. തകർന്നു നിൽക്കുന്ന പാർട്ടിയ്ക്ക് ഒരു തുരുത്ത് തന്നെയാണ് കെ സുധാകരന്റെ നേതൃത്വം. കോൺഗ്രസിന്റെ പ്രതാപകാലം തിരികെപ്പിടിക്കുക എന്നത് തന്നെയാണ് അദ്ദേഹത്തെ ഈ സ്ഥാനമേൽപ്പിച്ചതിന്റെ പ്രധാന ഉദ്ദേശവും. സ്വതന്ത്ര ഇന്ത്യയിലെ ഫാസിസ്റ് നയങ്ങൾക്കെതിരെയും, കൊലപാതക രാഷ്ട്രീയത്തിനെതിരെയും കെ സുധാകരൻ സന്ധിയില്ലാത്ത സമരങ്ങൾ സംഘടിപ്പിക്കും എന്ന ഉറച്ച പ്രതീക്ഷയുണ്ട് കേരളത്തിലെ കോൺഗ്രസ്‌ പാർട്ടിയ്ക്ക്

കെ സുധാകരനെപ്പോലെ ഒരു പരിചയ സമ്പന്നനെ കെ പി സി സി യുടെ അമരക്കാരനായി കൊണ്ട് വരുമ്പോൾ  ഈ ജനാധിപത്യ രാജ്യത്തിലെ കോൺഗ്രസ്‌ പാർട്ടിയുടെ യശസ്സ് ഉയരുകയാണ്. താഴെത്തട്ടിലുള്ള മനുഷ്യർക്ക് പറയാനുള്ളതും നാടും അധികാരികളും ഇനിമുതൽ കേൾക്കും.

''ഗ്രൂപ്പുകളെ സഹകരിപ്പിക്കാൻ തനിക്ക് അറിയാം. നല്ല രാഷ്ട്രീയ പരിചയമുള്ളയാളാണ് താൻ. പുതുമുഖമൊന്നുമല്ല. പത്തമ്പത് കൊല്ലമായി രാഷ്ട്രീയം തുടങ്ങിയിട്ട്. അതുകൊണ്ട് തനിക്ക് അറിയാം അവരെയൊക്കെ എങ്ങനെ സഹകരിപ്പിക്കണമെന്ന്. '' എന്ന് പറഞ്ഞ് വിമർശകരുടെ വായടപ്പിക്കാൻ മാത്രമല്ല നിവർന്നു നിന്ന് ചോദ്യം  ചെയ്യാനുമുള്ള ചങ്കൂറ്റവും ഇനി മുതൽ സുധാകരന്റെ നേതൃത്വത്തിലൂടെ കെ പി സി സി കൈവരിക്കും.

ഇന്ത്യയിലെ ഏറ്റവും ശക്തമായ പ്രതിപക്ഷവും ഭരണപക്ഷവുമായിരുന്നു കൊണ്ഗ്രെസ്സ് പാർട്ടിയുടേത്, പക്ഷെ ചില നേതൃത്വങ്ങളിൽ സംഭവിച്ച പിഴവാണ് ചരിത്രത്തിലെ ഏറ്റവും വലിയ പരാജയങ്ങളിലേക്ക് നീങ്ങാൻ കാരണമായത്. എന്നാൽ നേതൃത്വത്തിൽ വന്ന പിഴവുകൾ എല്ലാം ഇത്തവണ തിരുത്തി കുറിക്കുകയാണ് കോൺഗ്രസ്‌.

നേതൃത്വം നന്നായാൽത്തന്നെ ഒരു പാർട്ടിയുടെ ജീവൻ ജനങ്ങളിലേക്ക് ഒഴുകുമെന്നാണ്, ഇവിടെ അതാണ്‌ സംഭവിക്കാൻ പോകുന്നത്. സുധാകരൻ ജനങ്ങളെയും അവരുടെ ജീവിത മാർഗ്ഗങ്ങളെയും ഏറ്റവും അടുത്തറിയുന്ന ഒരാളാണ്. അതുകൊണ്ട് തന്നെ കോൺഗ്രസ്‌ ഇനി കൂടുതൽ ശക്തിപ്രാപിക്കും. ജനങ്ങളിലേക്ക് ഇറങ്ങിച്ചെന്ന് പ്രവർത്തിക്കാൻ സുധാകരനെപ്പോലെയുള്ള നേതാക്കളുള്ളപ്പോൾ ഇനിയും തോറ്റുപോകാൻ കേരളത്തിലെ ഐക്യ ജനാധിപത്യ മുന്നണിയ്ക്ക് കഴിയില്ല.

ജനങ്ങൾ അർപ്പിച്ച വിശ്വാസം നിറവേറ്റുക എന്നുള്ളതാണ് ഒരു ജനപ്രതിനിധിയുടെ കർത്തവ്യം. അത് നിറവേറ്റാൻ സദാ ജാഗ്രത പുലർത്തുന്നവരാണ് കോൺഗ്രസ് പ്രവർത്തകർ .പരാജയപ്പെട്ട ഇടങ്ങളിൽ നിന്നെല്ലാം കോൺഗ്രസ്‌ വളരട്ടെ. അതിൽ കെ സുധാകരൻ എന്ന കെ പി സി സി പ്രസിഡന്റിന്റെ ഉറച്ച നിലപാടുകളും വ്യക്തമായ കാഴ്ചപ്പാടുകളും നിഴലിച്ചു കിടക്കട്ടെ.