കൊല്ലം; ശാസ്താംകോട്ടയ്ക്കടുത്ത് ശാസ്തനടയില് യുവതിയെ ഭര്ത്താവിന്റെ വീട്ടില് തൂങ്ങി മരിച്ച നിലയില് കണ്ടെത്തി.നിലമേല് കൈതോട് സ്വദേശിനി വിസ്മയ (24) ആണ് മരിച്ചത്.
ഭര്തൃഗൃഹത്തില് വച്ച് മര്ദ്ദനമേറ്റെന്നു കാട്ടി കഴിഞ്ഞ ദിവസം വിസ്മയ ബന്ധുക്കള്ക്ക് വാട്ട്സ്ആപ്പ് സന്ദേശം അയച്ചിരുന്നു. മര്ദ്ദനത്തില് പരിക്കേറ്റ ദൃശ്യങ്ങളും ബന്ധുക്കള്ക്ക് കൈമാറിയിരുന്നു. ഇതിനു പിന്നാലെയാണ് ഇന്നു പുലര്ച്ചെ യുവതിയെ തൂങ്ങി മരിച്ച നിലയില് കണ്ടെത്തിയത്.സ്ത്രീധന പീഡനത്തെ തുടര്ന്നുള്ള കൊലപാതകമാണെന്ന് ബന്ധുക്കള് ആരോപിച്ചു.
മോട്ടോര് വാഹന വകുപ്പ് ഉദ്യോഗസ്ഥനായ കിരണ് ആണ് വിസ്മയയുടെ ഭര്ത്താവ്.
അതേസമയം മരണം കൊലപാതകമാണെന്ന ആരോപണവുമായി പെണ്കുട്ടിയുടെ ബന്ധുക്കള് രംഗത്തെത്തി.വിസ്മയ ആത്മഹത്യ ചെയ്യില്ലെന്നും ഇത് കൊലപാതകമാണെന്നുമാണ് പിതാവ് ത്രിവിക്രമന് നായര് പോലീസിനെ അറിയിച്ചത്.
വിവാഹത്തിന് ശേഷം ഇവര് തമ്മില് നേരത്തെയും പ്രശ്നങ്ങളുണ്ടായിരുന്നു. തുടര്ന്ന് വിസ്മയ സ്വന്തം വീട്ടിലേക്ക് വരികയും ചെയ്തു. പിന്നീട് പ്രശ്നങ്ങള് ഒത്തുതീര്പ്പാക്കി അടുത്തിടെയാണ് വിസ്മയ ഭര്തൃവീട്ടിലേക്ക് തിരിച്ചുപോയത്. എന്നാല്, ഇതിനു ശേഷവും ഭര്ത്താവില്നിന്ന് സ്ത്രീധനത്തിന്റെ പേരില് മര്ദനമേറ്റിരുന്നതായാണ് വാട്സാപ്പ് സന്ദേശങ്ങളില് പറയുന്നത്.
അതേസമയം, സംഭവത്തില് വനിതാ കമ്മീഷന് സ്വമേധയാ കേസെടുത്തു. കൊല്ലം റൂറല് എസ്പിയോട് റിപ്പോര്ട്ട് തേടുകയും ചെയ്തിട്ടുണ്ട്.
വിവരമറിഞ്ഞ് ബന്ധുക്കള് വീട്ടില് എത്തുന്നതിന് മുമ്ബ് മൃതദേഹം ഇവിടെനിന്നും മാറ്റിയെന്നും യുവതിയുടെ മാതാപിതാക്കള് ആരോപിച്ചു