ന്യൂഡല്ഹി: പെഗാസസ് സോഫ്റ്റ്വെയര് ഉപയോഗിച്ച് കോണ്ഗ്രസ് നേതാവ് രാഹുല് ഗാന്ധിയുടെയും സുഹൃത്തുക്കളുടെയും ഫോണ് വിവരങ്ങളും ചോര്ത്തിയെന്ന് റിപ്പോര്ട്ട്. രണ്ട് പ്രതിപക്ഷനേതാക്കളുടെ ഫോണ് വിവരങ്ങള് ചോര്ത്തിയെന്ന വാര്ത്തകള് നേരത്തെ തന്നെ പുറത്തുവന്നിരുന്നു. എന്നാല് അതാരാണെന്ന് വ്യക്തമായിരുന്നില്ല.
2019 തെരഞ്ഞെടുപ്പിന് മുന്പ് രാഹുല് ഗാന്ധിയുടെ മൊബൈല് നമ്ബറുകളിലെ വിവരങ്ങള് ചോര്ത്തിയെന്നാണ് കരുതുന്നത്. രാഹുല് ഗാന്ധിയുടെ അഞ്ച് സുഹൃത്തുക്കളുടെ ഫോണ് വിവരങ്ങളും ചോര്ത്തിയെന്ന് അന്താരാഷ്ട്ര മാധ്യമമായ 'ദി ഗാര്ഡിയന്' റിപ്പോര്ട്ട് ചെയ്തു.
പ്രശാന്ത് കിഷോര്, അഭിഷേക് ബാനര്ജി എന്നിവരും ഫോണ് ചോര്ത്തലിന് വിധേയമായതായി കണ്ടെത്തി. പ്രശാന്ത് കിഷോറിന്റെ ഫോണ് പരിശോധിച്ചതില് നിന്ന് അദ്ദേഹത്തിന്റെ ഫോണില് പെഗാസസ് ഉപയോഗിക്കപ്പെട്ടതായി തെളിഞ്ഞിട്ടുണ്ട്.
ചാരസോഫ്റ്റ്വെയറായ പെഗാസസ് ഉപയോഗിച്ച് ഇന്ത്യയിലെ മന്ത്രിമാര്, പ്രതിപക്ഷനേതാക്കള്, മാധ്യമപ്രവര്ത്തകര്, അഭിഭാഷകര്, ശാസ്ത്രജ്ഞര്, സര്ക്കാര് ഉദ്യോഗസ്ഥര്, മനുഷ്യാവകാശപ്രവര്ത്തകര് തുടങ്ങി 300ഓളം പേരുടെ ഫോണ് ഇസ്രായേല് കമ്ബനി ചോര്ത്തിയെന്നാണ് വെളിപ്പെടുത്തല്.
40 മാധ്യമപ്രവര്ത്തകര്, മൂന്നു പ്രമുഖ പ്രതിപക്ഷനേതാക്കള്, ജുഡീഷ്യറിയിലെ ഒരു പ്രമുഖന്, മോദി സര്ക്കാറിലെ രണ്ടു മന്ത്രിമാര്, ഇന്ത്യന് സുരക്ഷ ഏജന്സികളുടെ നിലവിലുള്ളവരും വിരമിച്ചവരുമായ മേധാവികള്, ഉദ്യോഗസ്ഥര്, വ്യവസായപ്രമുഖര് എന്നിവര് ചാരവൃത്തിക്ക് ഇരയായതായാണ് 'ദ വയര്' വാര്ത്ത പോര്ട്ടല് വ്യക്തമാക്കി