Image

കുറ്റിയാടി പ്രകടനം: 32 പേര്‍ക്കെതിരേ നടപടിയുമായി സി.പി.എം

Published on 30 July, 2021
കുറ്റിയാടി പ്രകടനം: 32 പേര്‍ക്കെതിരേ നടപടിയുമായി സി.പി.എം
കുറ്റിയാടി: കുറ്റിയാടി സീറ്റ് കേരള കോണ്‍ഗ്രസിന് നല്‍കിയതിനെതിരേ നടന്ന പ്രകടനത്തിന്റെ പേരില്‍ സി.പി.എമ്മിനുള്ളില്‍ നടപടി തുടരുന്നു. കുറ്റിയാടി ലോക്കല്‍ കമ്മിറ്റി പിരിച്ചുവിട്ടതിനു പിന്നാലെ കുറ്റിയാടി, വടയം ലോക്കല്‍ കമ്മിറ്റി അംഗങ്ങളും ബ്രാഞ്ച് സെക്രട്ടറിമാരും പാര്‍ട്ടി അംഗങ്ങളും ഉള്‍പ്പെടെ 32 പേര്‍ക്കെതിരേ നടപടി സ്വീകരിച്ചു. അഞ്ച് ലോക്കല്‍ കമ്മിറ്റി അംഗങ്ങളെ പാര്‍ട്ടിയില്‍നിന്ന് പുറത്താക്കി. ആറുപേരെ ഒരുവര്‍ഷത്തേക്കും ബാക്കിയുള്ളവരെ ആറുമാസത്തേക്കും പാര്‍ട്ടിയുടെ പ്രാഥമികാംഗത്വത്തില്‍ നിന്ന് നീക്കിയിട്ടുമുണ്ട്. പ്രകടനത്തില്‍ പങ്കെടുത്ത പാര്‍ട്ടി അംഗങ്ങളെ താക്കീത് ചെയ്യാനും തീരുമാനിച്ചു.

പ്രകടനത്തില്‍ പങ്കെടുക്കുകയും ഒത്താശ ചെയ്യുകയും ചെയ്ത കുറ്റിയാടി ലോക്കല്‍ കമ്മിറ്റി അംഗങ്ങളായ കെ.കെ. ഗിരീഷ്, പാലേരി ചന്ദ്രന്‍, കെ.പി. ബാബുരാജ്, ഊരത്ത് ബ്രാഞ്ച് സെക്രട്ടറി ഷിജില്‍, കെ.എം. അശോകന്‍ എന്നിവരെയാണ് പാര്‍ട്ടിയില്‍നിന്ന് പുറത്താക്കിയത്. കുറ്റിയാടി ലോക്കല്‍ അംഗമായിരുന്ന കെ.പി. വത്സന്‍, സി.കെ. സതീശന്‍, കെ.വി. ഷാജി വടയം ലോക്കല്‍ കമ്മിറ്റി അംഗങ്ങളായ എ.എം. അശോകന്‍, എം.കെ. ചന്ദ്രന്‍ എന്നിവരെയാണ് ഒരുവര്‍ഷത്തേക്ക് നീക്കിയത്. ബാക്കിയുള്ളവരെ ആറുമാസത്തേക്കും നീക്കി. 23ന് ചേര്‍ന്ന കുന്നുമ്മല്‍ ഏരിയാ കമ്മിറ്റി യോഗത്തില്‍ 32 പേര്‍ നല്‍കിയ വിശദീകരണം ചര്‍ച്ചചെയ്തിരുന്നു. ഇതിനുശേഷമാണ് നടപടി സംബന്ധിച്ച് തീരുമാനമായത്. ജില്ലാ കമ്മിറ്റിയും ഇതിന് അംഗീകാരം നല്‍കി.

കുറ്റിയാടി ലോക്കല്‍ കമ്മിറ്റി പിരിച്ചുവിട്ടതിനുശേഷം നിലവില്‍വന്ന അഡ്‌ഹോക് കമ്മിറ്റി ലോക്കലിനു കീഴിലെ ബ്രാഞ്ച് കമ്മിറ്റികള്‍ വിളിച്ചുചേര്‍ത്ത് പ്രകടനത്തില്‍ പങ്കെടുത്തവരെ താക്കീത് ചെയ്തുതുടങ്ങി. രണ്ടുദിവസമായി ബ്രാഞ്ച് കമ്മിറ്റികള്‍ ചേരുന്നുണ്ട്. ഏരിയാ കമ്മിറ്റി അംഗങ്ങളാണ് ബ്രാഞ്ചുകളില്‍ നടപടി റിപ്പോര്‍ട്ട് ചെയ്യുന്നത്.

നിയമസഭാ തിരഞ്ഞെടുപ്പില്‍ കുറ്റിയാടി സീറ്റ് കേരള കോണ്‍ഗ്രസിന് വിട്ടുനല്‍കിയതിനെതിരേ വ്യാപക പ്രതിഷേധമാണ് സി.പി.എമ്മിലുണ്ടായത്. പ്രതിഷേധിച്ച് സീറ്റ് പിന്നീട് സി.പി.എം ഏറ്റെടുത്തശേഷം മത്സരിച്ച് വിജയിച്ച കെ.പി. കുഞ്ഞമ്മദ് കുട്ടിക്കെതിരേയും നടപടി സ്വീകരിച്ചിരുന്നു. ഒരു ഏരിയാ കമ്മിറ്റി അംഗത്തെ പുറത്താക്കുകയും ഒരാളെ തരംതാഴ്ത്തുകയും കുറ്റിയാടി ലോക്കല്‍ കമ്മിറ്റി പിരിച്ചുവിടുകയും ചെയ്തു. 32 പേരെ പുറത്താക്കിയതോടെ നടപടികള്‍ അവസാനിച്ചെന്നാണ് സൂചന.

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക