ഓജോ ബോർഡ് - രാത്രി - മൂന്നുമണി മുതൽ നാലേമുക്കാൽ വരെ ( കവിത : നീത ജോസ്)

ഉറക്കം കിറുങ്ങിയുണരുമ്പോൾ

മണി മൂന്ന്

കഥ പറയാൻ വന്ന ആത്മാവ്

കുടിച്ച് ലക്കുകെട്ട്

അക്ഷരങ്ങൾക്കും

അക്കങ്ങൾക്കുമിടയിൽ

ചുരുണ്ടു കിടക്കുന്നു.

ഗ്ലാസിനുള്ളിലെ

തണുത്ത ലഹരി

കൈതട്ടി വീണ്

പതിവുപോലെ ഇന്നും എഴുതിയതൊക്കെ

മാഞ്ഞു പോയിരിക്കുന്നു

ആ കടലാസു ചുരുട്ടി

മേശപ്പുറം വൃത്തിയാക്കണം

മെഴുകുതിരികൾ

ഉരുകിപ്പടർന്നത്

ചുരണ്ടിക്കളയുന്നതൊരു

മടുപ്പിക്കുന്ന പണിയാണ്

പട്ടണങ്ങളിൽ

ചെന്നായ്ക്കളുടെ

ഓരിയിടൽ

കേൾക്കാറില്ലെന്നു

പറയുന്നവരെപ്പറ്റിയോർത്ത്

ചിരി വരുന്നു

ഹോ

ബോർഡു മടക്കുന്നതിനു മുൻപതിൽ

കിറുങ്ങിക്കിടക്കുന്നവളെ

ഉരുട്ടിയെണീപ്പിച്ച്

പറഞ്ഞു വിടണമല്ലോ .

നടക്കാത്ത

ദൂരങ്ങളെപ്പറ്റിയോർത്ത്

കാൽപ്പാദങ്ങൾ

വിണ്ടുകീറി വേദനിച്ചു

മേശമേൽ ചോർന്നു വീണ

എണ്ണ കുടിച്ചോ മറ്റോ

ഉറുമ്പുകൾ

ഓരോന്നായി

ചത്തു കൊണ്ടിരുന്നു

നാലേമുക്കാലായി.

ഒന്നുറങ്ങാൻ സമയമുണ്ട്.