ടീച്ചറും കുട്ടിയും: കഥ, സൂസൻ പാലാത്ര
Published on 17 August, 2021
"മക്കളെ, നമുക്ക് ടീച്ചറും കുട്ടിയും കളിക്കാം"
" ഉവ്വാ അമ്മേ "
"എന്നാലേ അമ്മ ടീച്ചറാവട്ടെ "
"ശരി, ഞാൻ കുട്ടിയും "
" ശരി, സമ്മതിച്ചു "
" എന്താ അമ്മ ടീച്ചർ ഇന്നു പടിപ്പിക്കുന്നേ "
" പടിപ്പിക്കുകയല്ല "
"പിന്നെ "
"പഠിപ്പിക്കുക എന്നു പറയണം നമുക്ക് അക്ഷരശുദ്ധിയോടെ, ഭാഷാശുദ്ധിയോടെ വാക്കുകൾ ഉച്ചരിക്കാം"
"സമ്മതിച്ചു "
" എന്നാലേ, നമ്മുടെ മലയാള വർഷത്തെക്കുറിച്ച് പഠിക്കാം"
" പഠിക്കാം - വട്ടം O അല്ലേ വടയുടെ ട അല്ലല്ലോ "
" മക്കളു മിടുക്കിയാണല്ലോ"
"മലയാള വർഷത്തെയാണ് നമ്മൾ കൊല്ലവർഷമെന്നു പറയുന്നത് "
"ഉം "
"കൊല്ലവർഷത്തിൽ എത്ര മാസമുണ്ടെന്നറിയാമോ?"
"ഇല്ലല്ലോ "
"12 മാസമുണ്ട് "
"ഏതെല്ലാമാണ് ടീച്ചറെ"
"പറയാം, എഴുതിയെടുത്ത് പഠിച്ചോണേ"
"ശരി എഴുതിയെടുത്ത് പഠിച്ചോളാം"
" മന:പാഠമാക്കണേ"
"ശരി, പറഞ്ഞു താ "
" ആദ്യത്തെ മാസം ചിങ്ങം, അവസാനത്തെ മാസം കർക്കിടകം "
" പറ്റത്തില്ല, എല്ലാം പഠിപ്പിയ്ക്കണം"
"സമ്മതിച്ചു "
" ഇന്ന് ചിങ്ങം 1 ആണ്, ആകെ 12 മാസങ്ങളുണ്ട്"
"ഉം"
"28 മുതൽ 32 വരെ ദിവസങ്ങൾ വീതമുള്ള 12 മാസങ്ങൾ "
"ആദ്യം നമുക്ക് പറഞ്ഞു പഠിച്ചിട്ട് എഴുതാം"
"ശരി, ടീച്ചർ "
" ചിങ്ങം കന്നി തുലാം
വൃശ്ചികം ധനു മകരം
കുംഭം മീനം മേടം
ഇടവം മിഥുനം കർക്കിടകം.
ഇങ്ങനെ മുമ്മൂന്ന് എണ്ണം കൂട്ടി പദ്യ രീതിയിൽ പഠിക്കാം. അപ്പോൾ ഓർമ്മയിൽ നില്ക്കും"
"ഇനി മക്കളൊന്നു പറഞ്ഞേ "
"ചിങ്ങം കന്നി തുലാം
വൃശ്ചികം ധനു മകരം
കുംഭം മീനം മേടം
ഇടവം മിഥുനം കർക്കിടകം "
" മക്കളു നന്നായി പഠിച്ചല്ലോ, ഇനി എഴുതി സൂക്ഷിച്ചോളൂ"
" ശരി"
" എന്നാണ് കൊല്ലവർഷം ആരംഭിച്ചതെന്നറിയാമോ?
"ഇല്ലല്ലോ "
"AD 825-ൽ "
"നമ്മുടെ മലയാള വർഷമെത്രയായെന്നു കണ്ടു പിടിക്കാൻ എളുപ്പവഴി ടീച്ചർ പറയട്ടെ "
"ങാ "
"നമ്മൾ എപ്പോഴും പറയുന്ന ക്രിസ്തുവർഷമില്ലേ ... അതായത് ഇപ്പോൾ ഇത് ഏതു വർഷമാ"
"2021 "
" ആ 2021ൽ നിന്ന് 825 കുറച്ചാൽ നമ്മുടെ കൊല്ലവർഷം എന്ന മലയാള വർഷം കിട്ടും "
" ഇപ്പോൾ എല്ലാം പിടി കിട്ടിയോ "
"പിടി കിട്ടി, എളുപ്പം മനസ്സിലായി "
" അപ്പോൾ ശരി എല്ലാർക്കും പറഞ്ഞു കൊടുക്കണം കേട്ടോ, എല്ലാരും മിടുമിടുക്കരാകട്ടെ "
" നന്ദി ടീച്ചർ "
"വെറും ടീച്ചറല്ല, അമ്മ ടീച്ചർ "
ടീച്ചറും കുട്ടിയും പൊട്ടിച്ചിരിച്ചു.
Facebook Comments
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala