Image

ഓണവും ഞാനും (കവിത): രമാ പിഷാരടി

Published on 22 August, 2021
ഓണവും ഞാനും (കവിത): രമാ പിഷാരടി



ഓണമാണെന്ന്
 നാട്ടുമാവിൻ മണം
ഓണമാണെന്ന്
 കാട്ടുപൂഞ്ചോലകൾ

ഓണമാണെന്ന്
 തിത്തിരിപ്പക്ഷികൾ
ഓണമാണെന്ന്
 കൈതപ്പടർപ്പുകൾ

തെക്കിനിപ്പച്ച-
 ചേനക്കുടകളിൽ,
കപ്പലോട്ടം മധുര- 
 നെല്ലിക്കയിൽ

കൂട്ടിനുണ്ടെന്ന്
 തീവെയിൽപ്പൂവുകൾ
പാട്ടതുണ്ടെന്ന്
 നീലക്കുയിലുകൾ

കുത്തി നിർത്തിയ
 കുമ്പളച്ചോട്ടിലെ-
പച്ചമഞ്ഞൾ, ഇല-
 ച്ചീര,. ഇഞ്ചിയും 

കണ്ണുകാണാതെ-
  യോടിപ്പുറപ്പെട്ട്
ഒന്ന് പെറ്റവൾ
 മഞ്ഞമത്തങ്ങയായ്

അമ്മ കാണാതെ
 കാട്ട് തേൻ തുള്ളികൾ
കൈയിലിറ്റിച്ച് പോയ
 തേനീച്ചകൾ 

പൂവിളിയ്ക്കെന്ന് 
 നക്ഷത്രവള്ളികൾ
പൂവ് വേണമോ?
 ചെമ്പരത്തിപ്പൂക്കൾ

ചോന്ന മഞ്ചാടി,
 കുന്നിക്കുരുക്കളിൽ
ഭൂമി തൊട്ട ചായ-
 ത്തിൻ്റെ ചാരുത

ആമ്പൽ, നന്ത്യാറു-
 വട്ടം കടുംഗന്ധ-
രാജ, പാരിജാത-
 ത്തിൻ്റെ പൂമുഖം

പൂക്കളാൽ നിറഞ്ഞെ-
   ങ്കിലും ഈർച്ചവാൾ
കോർത്ത് കീറിപ്പറിഞ്ഞ്
   പോകുന്നുവോ

നോവ് കണ്ട് നടുക്കം
 മുഖത്തേറ്റി
യാത്രയാവുന്നു
 ഞാനുമീയോണവും

അഷ്ടമിക്കനൽ
 തൊട്ട് നീറുമ്പോഴും
കഷ്ടകാലം കഴി-
 ഞ്ഞെന്ന്  പക്ഷിക:ൾ

ധ്യാനരൂപസമാധി-
  യിൽ   നിന്നോരു
പൂവണർന്നത് 
   ചിത്രശലഭമോ?

കണ്ട് നിൽക്കുന്നു-
  ബാല്യം! ഒരു തുമ്പ-
കൈയിൽ മെല്ലെ-  
 തലോടുന്നു - സാന്ത്വനം!

 
Join WhatsApp News
Rajiv thomas 2021-08-23 23:17:03
Beautiful!
Thejaswini Rema 2021-09-02 12:03:39
Thank you for reading my poem. Nalla vayanaykkku Nandi..
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക