കേരളത്തില്‍ ലൗ ജിഹാദ് ശക്തമാണെന്ന കത്തോലിക്കാ സഭയുടെ ആരോപണം കേരള രാഷ്ട്രീയത്തെ പ്രകമ്പനം കൊള്ളിച്ചു കൊണ്ട് നിലനില്‍ക്കുമ്പോള്‍ കേരളത്തിലെ ക്യാംപസുകളില്‍ യുവതികളെ തീവ്രവാദത്തിലേയ്ക്ക് ആകര്‍ഷിക്കാന്‍ ബോധപൂര്‍വ്വം ശ്രമം നടക്കുന്നു എന്ന ആരോപണവുമായി സിപിഎമ്മും.

സിപിഎം സമ്മേളനങ്ങളുടെ ഉദ്ഘാടന പ്രസംഗത്തിനായി നല്‍കിയ കുറിപ്പിലാണ് യുവതികളെ തീവ്രവാദത്തിലേയ്ക്ക് ആകര്‍ഷിക്കാന്‍ ബോധപൂര്‍വ്വമായ ശ്രമം നടക്കുന്നു എന്ന് പറഞ്ഞിരിക്കുന്നത്. ലൗ ജിഹാദ് എന്ന് എടുത്തു പറയാതെ ലൗ ജിഹാദിനെ തന്നെയാണ് സിപിഎം ഇവടെ അവതരിപ്പിച്ചിരിക്കുന്നത്. 

ന്യൂനപക്ഷ വര്‍ഗ്ഗീയതയെക്കുറിച്ച് പരാമര്‍ശിക്കുന്ന സ്ഥലത്ത് ഇപ്രകാരമാണ് പറഞ്ഞിരിക്കുന്നത്. 

' മുസ്ലീം സംഘടനകളില്‍ നുഴഞ്ഞു കയറി പ്രശ്‌നങ്ങള്‍ സൃഷ്ടിക്കാന്‍ മുസ്ലീം വര്‍ഗ്ഗീയ തീവ്രവാദ രാഷ്ട്രീയം ശ്രമിക്കുന്നു. മുസ്ലീം വിഭാഗത്തിലെ ബഹുഭൂരിപക്ഷവും തള്ളിക്കളയുന്ന താലിബാന്‍ പോലുള്ള സംഘടനകളെ പോലും പിന്തുണയ്ക്കുന്ന ചര്‍ച്ചകള്‍ കേരള സമൂഹത്തില്‍ ഉയര്‍ന്നു വരുന്നത് അപകടകരമാണ്. വര്‍ഗ്ഗീയതയിലേയ്ക്കും തീവ്രവാദ സ്വഭാവങ്ങളിലേയ്ക്കും യുവജനങ്ങളെ ആകര്‍ഷിക്കുന്നതിനുള്ള ബോധപൂര്‍വ്വമായ ശ്രമങ്ങളാണ് നടക്കുന്നത്. പ്രഫഷണല്‍ കോളേജുകള്‍ കേന്ദ്രീകരിച്ച് വിദ്യാസമ്പന്നരായ യുവതികളെ ആ വഴിയിലേയ്ക്ക് ചിന്തിപ്പിക്കുന്നതിനുള്ള ബോധപൂര്‍വ്വമായ ശ്രമങ്ങള്‍ നടന്നു വരുന്നുണ്ട്' 

സിപിഎം പഠനം നടത്തി പുറത്തുവിട്ട ഈ രേഖ കത്തോലിക്കാ സഭയുടെ നിലപാടിന് പരോക്ഷമായി കരുത്തു പകരുന്നതാണ്. മുസ്ലീം രാഷ്ട്ര സ്ഥാപനമെന്ന ലക്ഷ്യത്തില്‍  പ്രവര്‍ത്തിക്കുന്ന ജമാ അത്തെ ഇസ്ലാമി ഈ ആശയം സമൂഹത്തില്‍ മാധ്യമങ്ങളിലൂടെയും സോഷ്യല്‍ മീഡിയയിലൂടെയും പ്രചരിപ്പിക്കാന്‍ ശ്രമിക്കുന്നുണ്ടെന്നും രേഖയില്‍ പറയുന്നു.