ശിഷ്യ സമൂഹത്തിന്റെ യേശുവിനെക്കുറിച്ചുള്ള കാഴ്ചപ്പാട് മഗ്ദലനയോട് യൂദാ വിവരിക്കുന്നത് ശ്രദ്ധിക്കാം.  നീ അവനെ അറിഞ്ഞതുപോലെ ഞങ്ങളിലാരും അവനെ അറിഞ്ഞില്ല. അവന്‍ സ്ഥാപിക്കുന്ന പുതിയ രാജ്യത്തെക്കുറിച്ചായിരുന്നു ഞങ്ങള്‍ക്കെല്ലാം താത്പര്യം. അവന്റെ വാക്കുകളെല്ലാം ഞങ്ങള്‍ വായിച്ചെടുത്തത് അങ്ങനെയായിരുന്നു.അതു വൈകുന്നതിലായിരുന്നു ഞങ്ങളുടെ പ്രയാസം. പണസഞ്ചി എന്റെ കൈയ്യിലായിരുന്നതുകൊണ്ട് ധനകാര്യം എനിക്കു ലഭിക്കുമെന്ന് ഉറപ്പായിരുന്നു... യേശു സ്ഥാപിക്കുന്ന പുതിയ രാജ്യത്തില്‍ ഓരോരുത്തരും എന്തു സ്ഥാനം സ്വീകരിക്കണമെന്നതിനെപ്പറ്റി ഞങ്ങള്‍ക്കിടയില്‍ ചര്‍ച്ചയും തര്‍ക്കങ്ങളും നടന്നിരുന്നു..  പുരോഹിത ഭരണം മടുത്ത ജനങ്ങളുടെ സഹകരണവും റോമിനോട് എതിരല്ലാതിരുന്നതുകൊണ്ട് റോമന്‍ സൈനികരുടെ സഹായവും പ്രതീക്ഷിച്ചിരുന്നു. പുരോഹിത സൈന്യവുമായി ഒരു കലാപം  പ്രതീക്ഷിച്ചിരുന്നു. അതുകൊണ്ട്  അരയില്‍   രഹസ്യമായി വാളുകളും കരുതിയിരുന്നു. അവനും അതു പ്രതീക്ഷിച്ചിരുന്നു. അതുകൊണ്ടാണല്ലോ യെറുശലേം ദേവാലയത്തല്‍ വെച്ച് പതിവുള്ള സൗമ്യതയുപേക്ഷിച്ച് ദൈവാലയത്തിലുണ്ടായിരുന്ന വ്യാപാരികളെയെല്ലാം ചാട്ടവാറുവീശി ആട്ടിയകറ്റിയതും ശക്തമായ ഭാഷയില്‍ പ്രതികരിച്ചതും.... മുപ്പതു വെള്ളിനാണയത്തിന് ചുംബനംകൊണ്ട് ഒറ്റിക്കൊടുക്കുന്ന നാടകത്തിനു രൂപംകൊടുത്ത് നടപ്പാക്കിയത് ഞാനാണ്. യേശുവിനെ പുരോഹിത സൈന്യം പിടികൂടിയാല്‍ സ്വാഭാവികമായും ഏറ്റുമുട്ടലുണ്ടാകും. ആ ഏറ്റുമുട്ടലില്‍ പ്രധാന പുരോഹിതനെ വധിക്കുക, അധികാരം പിടിച്ചെടുക്കുക, അതായിരുന്നു ലക്ഷ്യം. എന്നാല്‍ യേശു അവിടം മുതല്‍ കാര്യങ്ങള്‍ തകിടം മറിച്ചു. പുരോഹിത സൈന്യത്തലവന്റെ ചെവി വെട്ടിയ പത്രോസിനോട് അവന്‍ വാള്‍ ഉറയിലിടുവാന്‍ പറഞ്ഞു. സ്വയം ഏല്പിച്ചു കൊടുത്ത്, സൗമ്യനായി ചെവി പോയവന്റെ ചെവി ചേര്‍ത്തുവെച്ച് സുഖപ്പെടുത്തി കാറ്റുലയ്ക്കാത്ത ദീപം പോലെ, നിശ്ശബ്ദമായി, ശാന്തമായ് അവര്‍‍ക്കൊപ്പം പോയി. യേശുവിന്റെ മനം മാറ്റം അതുവരെ പേടിച്ചു നിന്നവരെ ധൈര്യപ്പെടുത്തി. യേശുവിന്റെ കീഴടങ്ങല്‍ ഞങ്ങളെയെല്ലാം നിരാശപ്പെടുത്തി. അവസാന നിമിഷമെങ്കിലും കലാപത്തിന് സമ്മതം നല്‍കുമെന്നായിരുന്നു ഞങ്ങളുടെ പ്രതീക്ഷ. പക്ഷെ അവന്‍ നിരുപാധികം കീഴടങ്ങുകയായിരുന്നു..

  കുരിശുമരണത്തിനു ശേഷം    പത്രോസുള്‍പ്പെടെ ശിഷ്യന്മാരെല്ലാം പകച്ചു നില്‍ക്കുകയും പലരും തങ്ങളുടെ പഴയ പണികളിലേയ്ക്കു തിരിച്ചു പോവുകയും ചെയ്തെങ്കിലും  തങ്ങളുടെ ആത്മീയ ഗുരുവും നാഥനും എല്ലാമെല്ലാമായിരുന്ന     യേശുവിനുവേണ്ടി ജീവിക്കാനും മരിക്കാനും തയ്യാറായി മുമ്പോട്ടു വന്നത് അമ്മ മറിയവും മഗ്ദലന മറിയവും മാര്‍ത്തയും മറിയയും മറ്റു ചില സ്ത്രീകളുമടങ്ങുന്ന ചെറിയ ഒരു കൂട്ടായ്മയായിരുന്നു. അമ്മ മറിയം തന്റെ മകനെക്കുറിച്ച് ആവേശത്തോടെ സംസാരിക്കുവാന്‍ തുടങ്ങിയപ്പോള്‍ അതു കേള്‍ക്കാനായി സ്ത്രീകളും പുരുഷന്മാരും എത്തിത്തുടങ്ങി.  അവര്‍ ജെറുസലേമിന്റെ തെരുവുകളില്‍  ആടിയും പാടിയും   അവന്റെ സുവിശേഷവുമായി ഓടി നടന്നു. അവന്‍ പഠിപ്പിച്ചതുപോലെ ജീവിക്കുകയും അവന്റെ സുവിശേഷം ജനങ്ങളെ അറിയിക്കുകയും അതുവഴി അവന്‍ പ്രസംഗിച്ച ദൈവരാജ്യം ഭൂമിയില്‍ യാഥാര്‍ത്ഥ്യമാക്കുകയും ചെയ്യുക എന്ന ഉദ്ദേശം മാത്രമെ അവര്‍ക്കുണ്ടായിരുന്നുള്ളു. നിയമങ്ങള്‍ക്കും ചട്ടങ്ങള്‍ക്കുമെതിരായിരുന്ന യേശുവിന്റെ അനുയായികള്‍ക്ക് തെരഞ്ഞെടുക്കപ്പെട്ട നേതൃത്വമോ അധികാരാവകശാങ്ങളോടുകൂടിയ പൗരോഹിത്യ നിരയോ ആവശ്യമില്ലെന്ന് അവര്‍ വിശ്വസിച്ചു. ചുരുക്കത്തില്‍ യേശുവിന്റെ സ്നേഹസുവിശേഷം ലോകം മുഴുവനുള്ള ജനങ്ങളെ അറിയിക്കുക  എന്നതു   മാത്രമായിരുന്നു അവരുടെ ലക്ഷ്യം. പക്ഷെ ആളു കൂടിത്തുടങ്ങിയപ്പോള്‍ സ്ഥിതിഗതികള്‍ മാറി. പത്രോസ് തന്റെ അധികാരം ഉപയോഗിച്ച് ആ സ്ത്രീ സമാജത്തിനെ ഹൈജാക്ക് ചെയ്തു. ആദ്യമായി ചെയ്തത് മഗ്ദലനയെ  അവള്‍ ശരിയല്ല എന്ന രണ്ടു വാക്കുകളിലൊതുക്കി ഒഴിവാക്കുകയായിരുന്നു.   യേശു പാപം ക്ഷമിച്ച വേശ്യയായും, ഭൂതത്തെ പുറത്താക്കിയ സ്ത്രീയായും അഞ്ചു ഭര്‍ത്താക്കന്മാരുണ്ടായിരുന്നവളും ആറാമനോടൊപ്പം പൊറുത്തിരുന്നവളും, കണ്ണുനീര്‍കൊണ്ട് കാല്‍ കഴുകി തൈലം പുരട്ടിയ നഗരത്തിലെ പ്രശസ്ത ഗണിക തുടങ്ങി സകല തിന്മകളുടെയും ഉടമയായ സ്ത്രീയും ഗുരുവിനെ വഴിപിഴപ്പിക്കുവാന്‍ കൂടെ കൂടിയവളുമെല്ലാമായി ചിത്രീകരിക്കപ്പെട്ടു. അതോടെ സ്ത്രീസമാജത്തിന്റെ പ്രധാനവക്താവും വീറുറ്റ പ്രചാരകയുമെല്ലാമായ മഗ്ദലന മറിയം നയിക്കുന്ന സംഘങ്ങളില്‍ പോകുന്നതിന് അവരുടെ ഭര്‍ത്താക്കന്മാര്‍ വിലക്കേര്‍പ്പെടുത്തി. അങ്ങനെ സ്ത്രീ സമാജങ്ങളില്‍ ആളെത്താതായി. അവര്‍ തുടങ്ങിവെച്ച പ്രസ്ഥാനം പുരുഷമേധാവിത്വത്തില്‍ വളര്‍ന്നു ശക്തി പ്രാപിക്കുകയും ചെയ്തു." അവര്‍ യേശുവിനെ ക്രിസ്തുവാക്കി. പഴയതും പുതിയതും കൂട്ടിച്ചേര്‍ത്തു."   ദൈവം സ്നേഹമാണെന്ന് യേശു പറഞ്ഞെങ്കിലും പഴയനിയമത്തിലെ ഉഗ്രപ്രതാപിയും കഠിന ശിക്ഷകനുമായിരുന്ന പിതാവാം ദൈവത്തെത്തന്നെ ആവര്‍‍ പുനപ്രതിഷ്ഠിച്ചു. യേശു കൂദാശകളും അടയാളങ്ങളും അത്ഭുതങ്ങളും രോഗശാന്തിയുമൊക്കെയായി. അവര്‍ക്കാവശ്യമുള്ള ഒരു ക്രിസ്തുവിനെ അവര്‍ യേശുവിലൂടെ നേടിയെടുത്തു. കുരിശ് രാജാധികാരത്തിന്റെ ചിഹ്നമായി സ്വീകരിക്കപ്പെട്ടു. 

മഗ്ദലന മറിയം ക്രിസ്തു സഭയുടെ പരിണാമത്തെ ചരിത്രത്തിലെതന്നെ ഏറ്റവും വലിയ വഞ്ചനയെന്നാണ് വിശേഷിപ്പിക്കുന്നത്. സ്ത്രീകളെ തുല്യ പരിഗണനയോടെ ചേര്‍ത്തു നിര്‍ത്തിയ യേശുവിന്റെ പേരിലുണ്ടാക്കിയ സഭ അവരെ നേതൃത്വത്തില്‍നിന്ന് പാടെ ഒഴിവാക്കി നിലനിര്‍ത്തി.  സ്ത്രീകള്‍ പാപഹേതുക്കളും പ്രലോഭനകാരികളുമാണെന്ന പഴയനിയമ വ്യാഖ്യാനങ്ങള്‍ നിലനിര്‍ത്തി.  യേശു ഏറ്റവും അധികം എതിര്‍ത്ത പൗരോഹിത്യത്തെ പത്രോസ് പൗലോസ് മാരുടെ നേതൃത്വത്തില്‍ അതേ അധികാരത്തോടെ പുന:പ്രതിഷ്ഠിച്ചു. പുരുഷന്മാരായ ശിഷ്യന്മാരെല്ലാം അവന്റെ പ്രതിപുരുഷന്മാരായി. ബലിയല്ല, കരുണയാണ് ദൈവത്തിന് പ്രീതികരമെന്നു പഠിപ്പിച്ച അവന്റെ മരണംതന്നെ അവര്‍ ദൈവ പ്രീതിയ്ക്കുള്ള ബലിയാക്കിത്തീര്‍ത്തു. ബലിയര്‍പ്പണമായി പുരോഹിതര്‍ നിത്യവും അവനെ കൊന്നുകൊണ്ടിരിക്കുന്നു. അവന്റെ പേരില്‍ അരമനകളും കൊട്ടാരങ്ങളുമുണ്ടാക്കി. നൂറ്റാണ്ടുകള്‍ കുരിശു യുദ്ധം നടത്തി ഹെരോദാസ് അവന്റെ പേരില്‍ നടത്തിയതിനേക്കാള്‍ എത്രയോ ഭീകരമായ രക്തപ്പുഴകള്‍ ഒഴുക്കി. യേശു ഒരിക്കലും പാപ പുണ്യങ്ങളായി കണക്കാക്കുകപോലും ചെയ്യാത്ത ബ്രഹ്മചര്യം അവര്‍ പരമപുണ്യമാക്കി. സ്ത്രീകള്‍ സഭയില്‍ പ്രവേശിക്കുന്നത് പാപമായി. സ്ത്രീ സാന്നിധ്യംതന്നെ അശുദ്ധിയായി. അവന്‍ ഒരിക്കലും സ്ത്രീകളില്‍നിന്ന് മുഖം തിരിച്ചില്ല.മറിച്ച് അവന്‍ സ്ത്രീകളോടൊപ്പം അടുത്തിടപഴകുകയും ജീവന്റെ പാതിയായ അവളെ സമൂഹത്തില്‍ ദൃശ്യമാക്കുകയുമായിരുന്നു. ലൈംഗികത പാപമോ പുണ്യമോ എന്നവന്‍ വിധിച്ചില്ല. പാപം ചെയ്യാത്തവന്‍ കല്ലെറിയട്ടെ എന്നാണവന്‍ പറഞ്ഞത്. അതിലപ്പുറം മനോഹരമായി എന്താണ് ഭൂമിയില്‍ എഴുതപ്പെട്ടിരിക്കുന്നത്. " ജലം അതിന്റെ വഴി കണ്ടെത്തുന്നു. ലൈംഗികതയും.. അതിലപ്പുറം രണ്ടു വ്യക്തികള്‍ തമ്മിലുള്ള സ്നേഹത്തില്‍നിന്ന് യേശു ഒന്നും പഠിപ്പിച്ചില്ല". 

കേവലമൊരു അഭിസാരികയായി ചിത്രീകരിക്കപ്പെട്ടിരുന്ന മഗ്ദലനയെ ക്രിസ്തുചൈതന്യം തുടിക്കുന്ന കഥാപാത്രമായി വാർത്തെടുത്തിരിക്കുന്നു എന്നതാണ് ഈ നോവലിന്റെ സവിശേക്ഷത.

DC Books ആണ് ഇത് പബ്ലിഷ് ചെയ്തിരിക്കുന്നത്.  Online eBook ഡിസിയുടെ website ൽ കിട്ടും 

Prof. Rosy Thampy https://www.facebook.com/rosy.thampy.3