മിനിസ്‌ക്രീന്‍ പ്രക്ഷകരുടെ പ്രിയ പരന്പരയായ ഉപ്പും മുളകും ‘എരിവും പുളിയും’ എന്ന പേരില്‍ തിരിച്ചെത്തുകയാണ്. അമ്മയുടെ മരണം നല്‍കിയ ആഘാതത്തില്‍ നിന്നും തിരികെ കയറുകയാണ് നടി ജൂഹി രുസ്തഗി. വേദനയില്‍ നിന്നും ജൂഹി അതിജീവിച്ച് വരികയാണ് എന്നാണ് നടി നിഷ സാരംഗ് പറയുന്നത്.

ജൂഹിക്ക് ഒപ്പമുള്ള ചിത്രങ്ങള്‍ പങ്കുവച്ചപ്പോള്‍ നിരവധി കമന്റുകള്‍ എത്തിയിരുന്നതായും നിഷ പറയുന്നു. തങ്ങളുടെ ലുക്കിലെ വ്യത്യസ്തത എല്ലാവര്‍ക്കും കൗതുകമാണ്. വിഷമങ്ങളില്‍ നിന്ന് അവള്‍ അതിജീവിച്ച് വരുകയാണ്. എല്ലാവരുടെയും കൂടെയാകുമ്പോള്‍ മനസ്സിന് ആശ്വാസം കിട്ടുമല്ലോ. അമ്മയെക്കുറിച്ച് എപ്പോഴും പറയുമെങ്കിലും വന്നതിനെക്കാള്‍ ഒരുപാട് മാറിയിട്ടുണ്ട് എന്നാണ് വനിത ഓണ്‍ലൈന് നല്‍കിയ അഭിമുഖത്തില്‍ നിഷ പറയുന്നത്.

എരിവും പുളിയും എന്ന പരന്പരയെ കുറിച്ചും നിഷ വ്യക്തമാക്കി. പുതിയ പരമ്പരയിലും അച്ഛനും അമ്മയും മക്കളുമൊക്കെ തന്നെയാണ് തങ്ങള്‍. മറ്റൊരു രീതിയിലാകും അവതരണം. ഉപ്പും മുളകും നിര്‍ത്തിയിട്ട് പതിനൊന്ന് മാസമായി. ഒരു ഇടവേളയ്ക്ക് ശേഷം കാണുകയാണെങ്കിലും എല്ലാവരും പഴയപോലെ ത്തന്നെയാണ്. സ്‌നേഹം കൂടിയിട്ടേയുള്ളൂ. കുറഞ്ഞിട്ടില്ല. അഞ്ച് വര്‍ഷം ഒന്നിച്ചുണ്ടായിരുന്നതല്ലെ.

കുട്ടികള്‍ക്കെല്ലാം താന്‍ അമ്മയെ പോലെയാണ്. അവരെ കാണാതിരുന്നതിന്റെ വിഷമം ഇപ്പോഴാണ് തീര്‍ന്നത്. പാറുക്കുട്ടിയൊക്കെ പുതിയ പരമ്പരയില്‍ ധാരാളം സംസാരിക്കുന്നുണ്ട്. ഭയങ്കരമായി ഡയലോഗുകളൊക്കെ പറയും. അഭിനയിക്കുകയല്ല, ജീവിക്കുകയാണ്. കുറേയധികം സര്‍പ്രൈസുകളുണ്ടാകും എന്നും നിഷ വ്യക്തമാക്കി.