കൊച്ചി: നടിയെ ആക്രമിച്ച കേസില് വിചാരണക്കോടതി നടപടികള് ചോദ്യം ചെയ്ത് സര്ക്കാര് സമര്പ്പിച്ച അപ്പീലില് ഹൈക്കോടതി തിങ്കളാഴ്ച്ച വിധി പറയും. കേസില് എട്ട് സാക്ഷികളെ വീണ്ടും വിസ്തരിക്കണമെന്ന പ്രോസിക്യൂഷന് ആവശ്യം തള്ളിയതിനെതിരെയാണ് സര്ക്കാര് ഹൈക്കോടതിയെ സമീപിച്ചത്.
മതിയായ കാരണം വേണമെന്നും പ്രോസിക്യൂഷന് വീഴ്ച്ചകള് മറികടക്കാനാകരുത് വീണ്ടും സാക്ഷികളെ വിസ്തരിക്കുന്നതെന്നും വാദത്തിനിടെ സിംഗിള് ബെഞ്ച് സര്ക്കാരിനെ ഓര്മ്മിപ്പിച്ചിരുന്നു. മാസങ്ങള്ക്ക് ശേഷം വീണ്ടും വിസ്താരം ആവശ്യപ്പെടുന്നതില് കോടതി സംശയവും പ്രകടിപ്പിച്ചിരുന്നു.
സംവിധായകന് ബാലചന്ദ്രകുമാറിന്റെ പുതിയ വെളിപ്പെടുത്തല് കേസിനെ എങ്ങനെ ബാധിക്കുമെന്നും കോടതി സര്ക്കാരിനോട് ആരാഞ്ഞിരുന്നു. ജസ്റ്റീസ് കൗസര് എടപ്പഗത്തിന്റെ സിംഗിള് ബെഞ്ചാണ് ഹര്ജിയില് വിധി പറയുക.