ജമ്മു കശ്മീര്‍ മഹാത്മാഗാന്ധിയുടെ ഇന്ത്യയിലേക്കാണ് യോജിച്ചത്, നാഥുറാം ഗോഡ്‌സെയുടെ ഇന്ത്യയിലേക്കല്ലെന്നും ഈ രാജ്യത്തെ നാഥുറാം ഗോഡ്‌സെയുടെ രാഷ്‌ട്രമാക്കാന്‍ തങ്ങള്‍ അനുവദിക്കില്ലെന്നും മെഹബൂബ മുഫ്തി പറഞ്ഞു.

'എഴുപത്തിയഞ്ച് വര്‍ഷം മുമ്ബ് ഈ രാജ്യത്തെ ജനങ്ങള്‍ക്ക് ബ്രിട്ടീഷുകാര്‍ക്കെതിരെ സ്വാതന്ത്ര്യത്തിനായി പോരാടാന്‍ അവസരം ലഭിച്ചു. ബിജെപിയെ തുരത്താനുള്ള അവസരമാണ് ഇപ്പോള്‍ ലഭിച്ചിരിക്കുന്നത്. യുപിയില്‍ ബിജെപിയെ ഒഴിവാക്കുന്നത് 1947 നെക്കാള്‍ വലിയ 'ആസാദി' ആയിരിക്കും. ചരിത്രം വായിക്കണം. അതില്‍ നിന്ന് പ്രചോദനം ഉള്‍ക്കൊണ്ട് സ്വന്തം വിധി എഴുതണം.' മെഹബൂബ മുഫ്തി പറഞ്ഞു.

'ജമ്മു കശ്മീര്‍ മഹാത്മാഗാന്ധിയുടെ ഇന്ത്യയിലേക്കാണ് യോജിച്ചത്, നാഥുറാം ഗോഡ്‌സെയുടെ ഇന്ത്യയിലേക്കല്ല. ഈ രാജ്യത്തെ നാഥുറാം ഗോഡ്‌സെയുടെ രാഷ്‌ട്രമാക്കാന്‍ ഞങ്ങള്‍ അനുവദിക്കില്ല. അവര്‍ ഗോഡ്‌സെയോട് പ്രാര്‍ത്ഥിക്കുന്നു, എന്നാല്‍ ഗാന്ധി ഏറ്റവും വലിയ ഹിന്ദുവായിരുന്നു, സസ്യാഹാരിയും മതേതര നേതാവുമായിരുന്നു, അദ്ദേഹം ആരോടും, മാംസാഹാരികളോട് പോലും വിദ്വേഷം പുലര്‍ത്തിയിരുന്നില്ല.' മെഹബൂബ മുഫ്തി പറഞ്ഞു.